కోహ్లీ రిటైర్మెంట్‌పై మాజీలు, ఫ్యాన్స్ ఆశ్చర్యం

టీమిండియా స్టార్ బ్యాటర్ విరాట్ కోహ్లీ.. టెస్టులకు గుడ్‌బై చెప్పి అందర్నీ ఆశ్చరపరిచాడు. టీ20 ప్రపంచకప్ 2024 తర్వాత అంతర్జాతీయ టీ20లకు విరాట్ వీడ్కోలు పలికాడు. అయితే ఆ నిర్ణయం పట్ల అభిమానులెవరూ పెద్దగా ఆశ్చర్యపోలేదు. యువ ఆటగాళ్లకు ఛాన్స్ ఇచ్చేందుకు.. టీ20 ప్రపంచకప్ 2026 నాటికి జట్టు కూర్పును సెట్ చేసేందుకు కోహ్లీ ఈ నిర్ణయం తీసుకున్నాడని అంతా భావించారు. టీ20 ప్రపంచకప్ టైటిల్‌ సాధించిన రోజే రిటైర్మెంట్ పలకడం పట్ల కోహ్లీ ఫ్యాన్స్ కూడా సంతోషం వ్యక్తం చేశారు.

తట్టుకోలేకపోతున్న ఫ్యాన్స్..

2011లో టెస్టు క్రికెట్‌లోకి అడుగుపెట్టిన కోహ్లీ.. ప్రపంచ క్రికెట్‌లో తనదైన ప్రత్యేకత చాటుకున్నాడు. ముఖ్యంగా కోహ్లీ వల్లే టెస్టు క్రికెట్‌కు ఆదరణ పెరిగిందనేది బహిరంగ రహస్యమే. ఈ విషయాన్ని ఎంతోమంది విదేశీ ప్రస్తుత, మాజీ క్రికెటర్లు సైతం చెప్పారు. సంప్రదాయ క్రికెట్ అయిన రెడ్ బాల్ క్రికెట్‌పై మక్కువ చూపించే కోహ్లీ.. అదే తీవ్రతో మైదానంలో చురుగ్గా కనిపించేవాడు. ఫిట్‌నెస్‌లో 20 ఏళ్ల యువకుడితో పోటీ పడే కోహ్లీ.. మరో 3-4 ఏళ్లు ఈజీగా టెస్టు క్రికెట్ ఆడేస్తాడని అంతా భావించారు. కానీ కోహ్లీ నిర్ణయం పట్ల ఫ్యాన్స్ విస్మయం వ్యక్తం చేస్తున్నారు. ఇది అస్సలు ఎక్స్‌పెక్ట్ చేయలేదని కామెంట్లు చేస్తున్నారు.

మిస్టర్ డిఫెండబుల్‌గా పేరుగాంచిన రాహుల్ ద్రవిడ్ 39 ఏళ్ల వయసులో టెస్టు క్రికెట్‌కు గుడ్‌బై చెప్పారు. భారత క్రికెట్ దిగ్గజం సచిన్ టెండూల్కర్ 39 ఏళ్ల వరకూ టెస్టు క్రికెట్‌లో కొనసాగాడు. వీవీఎస్ లక్ష్మణ్‌, ఇటీవలే టెస్టు క్రికెట్‌కు గుడ్‌బై చెప్పిన రోహిత్ శర్మ సైతం 38 ఏళ్ల వయసులో టెస్టు క్రికెట్ నుంచి తప్పుకున్నారు. కానీ వారితో పోలిస్తే ఫిట్‌నెస్ పరంగా ఎంతో మెరుగ్గా ఉన్న కోహ్లీ 36 ఏళ్ల వయసులోనే రిటైర్మెంట్ ప్రకటించడాన్ని ఫ్యాన్స్ తట్టుకోలేకపోతున్నారు. ‘ఎందుకు ఇలా చేశావ్ కోహ్లీ?’ అని ప్రశ్నిస్తున్నారు. నువ్‌ లేని టెస్టు క్రికెట్‌ను ఊహించుకోలేమంటూ కామెంట్లు చేస్తున్నారు. నువ్ ఎందుకు ఇలాంటి నిర్ణయం తీసుకున్నావో.. అస్సలు అర్థం కావడం లేదని పేర్కొంటున్నారు. మరికొందరు ఫ్యాన్స్ మాత్రం బీసీసీఐపై విమర్శలు గుప్పిస్తున్నారు. హోంగ్రౌండ్‌లో కోహ్లీ రిటైర్మెంట్ ప్లాన్‌ చేయాల్సిందని కామెంట్లు చేస్తున్నారు. ఇతర దేశాల క్రికెట్ బోర్డులను ఈ విషయంలో ఆదర్శంగా తీసుకోవాలని జేమ్స్ అండర్సన్ రిటైర్మెంట్‌ను ప్రస్తావిస్తున్నారు.