బెజవాడ దుర్గమ్మకు తెలంగాణ భక్తుడి అరుదైన కానుక

విజయవాడ ఇంద్రకీలాద్రిపై కొలువైన కనకదుర్గమ్మకు అరుదైన కానుక అందింది. తెలంగాణకు చెందిన భక్తుడు బెజవాడ కనకదుర్గమ్మకు అరుదైన కానుక అందించారు. తెలంగాణలోని సిరిసిల్ల జిల్లాకు చెందిన నల్ల విజయ్ కుమార్.. అగ్గిపెట్టెలో పట్టేంత చీరను కనకదుర్గమ్మకు సమర్పించారు. ఐదున్నర మీటర్ల పొడవు, 40 ఇంచుల వెడల్పుతో.. వంద గ్రాముల బరువు ఉండే ఈ చీరను అగ్గిపెట్టెలో పట్టేలా రూపొందించారు. బుధవారం ఉదయం కనకదుర్గమ్మ ఆలయానికి కుటుంబసభ్యులతో కలిసి చేరుకున్న నల్ల విజయ్ కుమార్.. ఈ చీరను అమ్మవారికి సమర్పించారు. కనకదుర్గమ్మ ఆలయ అధికారుల సమక్షంలో ఈ కానుకను నల్ల విజయ్ కుమార్ అందజేశారు.

సిరిసిల్లకు చెందిన చేనేత కళాకారుడు నల్ల విజయ్ కుమార్ అగ్గిపెట్టెలో పట్టే చీరలను నేయడం ఇదే తొలిసారి కాదు. నల్ల విజయ్ కుమార్ తండ్రి.. నల్ల పరంధాములు కూడా చేనేత కళాకారులే. నల్ల పరంధాములు గతంలో అగ్గిపెట్టెలో పట్టే పట్టుచీరను తయారు చేసి సిరిసిల్ల ఖ్యాతిని ప్రపంచానికి చాటారు. ఆయన వారసత్వాన్ని కొనసాగిస్తూ విజయ్ కుమార్ కూడా అగ్గిపెట్టెలో పట్టే చీరలను తయారు చేస్తున్నారు. నల్ల విజయ్ కుమార్ ఇలా అగ్గిపెట్టెలో పట్టే చీరలను తయారు చేసి తిరుమల శ్రీవారికి, వేములవాడ రాజన్నకు అందించడం ఆనవాయితీగా వస్తోంది. అలాగే అగ్గిపెట్టెలో పట్టేలా పట్టు శాలువాను కూడా తయారు చేసి కొండగట్టు అంజన్న స్వామికి సమర్పించారు. వెండి కొంగు చీర, బంగారు చీరలను కూడా గతంలో ఆయన తయారు చేశారు. తెలంగాణ మాజీ ముఖ్యమంత్రి కేసీఆర్ చేతుల మీదుగా నల్ల విజయ్ కుమార్ పురస్కారం కూడా అందుకున్నారు.

నల్ల విజయ్ కుమార్ ఇటీవల 27 రకాల సుగంధ ద్రవ్యాలను ఉపయోగించి సువాసన వెదజల్లే పట్టుచీరను కూడా తయారు చేశారు. ఐదున్నర మీటర్ల పొడవు, 46 ఇంచుల వెడల్పుతో ఈ సుగంధ ద్రవ్యాలు వెదజల్లే చీరను నల్ల విజయ్ కుమార్ రూపొందించారు. ఈ చీర బరువు 400 గ్రాములు. నాలుగు రోజుల పాటు శ్రమించి, 12 వేల రూపాయలు ఖర్చు చేసి ఆయన చీరను తయారు చేశారు. అలాగే ఒక వ్యాపారవేత్త కూతురి వివాహం కోసం బంగారు చీరను కూడా నల్ల విజయ్ కుమార్ తయారు చేశారు. గతంలో మూడు కొంగుల చీర, ఉంగరంలో పట్టే చీర, దబ్బనంలో దూరే చీర, కుట్టు లేని లాల్చి, పైజామా, జాతీయ జెండాలను కూడా మగ్గంపై రూపొందించి నల్ల విజయ్ కుమార్ ప్రశంసలు అందుకున్నారు. తన చేనేత కళా నైపుణ్యంతో ఇలాంటి అద్భుతాలు సృష్టిస్తున్న నల్ల విజయ్ కుమార్.. సిరిసిల్ల చేనేత కార్మికుల ప్రతిభను ప్రపంచానికి తెలియజేస్తున్నారు.