ఫ్యాటీ లివర్ మొత్తం ఎన్ని దశల్లో పెరుగుతుంది

మనకు ఎలాంటి అనారోగ్యం వచ్చినా సరే అది దశల వారీగా పెరుగుతూ వస్తుంది. బీపీ, షుగర్ మాత్రమే కాదు. ఈ మధ్య కాలంలో ఫ్యాటీ లివర్ కూడా చాలా కామన్ అయిపోయింది. ఒక్కసారి ఇది వచ్చిందంటే చాలా రోజుల పాటు తీవ్ర ఇబ్బందులకు గురి చేస్తోంది. లివర్ సెల్స్ ఎక్కువ మొత్తంలో కొవ్వు పేరుకుపోవడమే ఈ ఫ్యాటీ లివర్ వ్యాధి. ఈ కారణంగా లివర్ పని తీరుపై ప్రభావం పడుతుంది. అయితే..ఈ జబ్బు ఒకేసారి ఎక్కువ అవ్వదు. దశల వారీగా ఇది తీవ్రమవుతుంది.

ముఖ్యంగా నాలుగు దశల్లో ఫ్యాటీ లివర్ సమస్య పెరుగుతుంది. ఒక్కో దశలో ఒక్కో విధంగా ఇది ప్రభావం చూపిస్తుంది. ఈ దశను బట్టి లక్షణాలు కూడా మారుతూ ఉంటాయి. ఆ సింప్టమ్స్ ని బట్టి ఫ్యాటీ లివర్ ఏ స్టేజ్ లో ఉందని చెప్పొచ్చు అంటున్నారు వైద్య నిపుణులు. అయితే..ఫస్ట్ లేదా సెకండ్ స్టేజ్ లో ఉన్నప్పుడు గుర్తించి సరైన విధంగా చికిత్స అందిస్తే సులువుగానే ఈ సమస్య నుంచి బయటపడొచ్చు. అయితే..దశల వారీగా లివర్ లో ఎలాంటి మార్పులు వస్తాయో వివరంగా తెలుసుకుందాం.

మొదటి దశ

ఫ్యాటీ లివర్ ఫస్ట్ స్టేజ్ ని స్టీటాసిస్ అని పిలుస్తారు. ఈ దశలో లివర్ సెల్స్ లో ఫ్యాట్ పేరుకుపోవడం మొదలవుతుంది. అయితే..లివర్ పని తీరుపై ఎలాంటి ప్రభావం చూపించదు. ఫ్యాటీలివర్ వచ్చిన వాళ్లలో 25 నుంచి 30 శాతం మందిలో ఈ స్టేజ్ ని సాధారణంగానే పరిగణిస్తారు. అయితే..ఈ దశలో తక్కువ లక్షణాలు కనిపిస్తాయి. కొంత మందిలో అసలు సింప్టమ్స్ ఉండవు. అయితే కొంత మందిలో మాత్రం విపరీతమైన నీరసం ఉంటుంది. పొత్తికడుపు కుడివైపు పైన భాగంలో చాలా ఇబ్బందిగా అనిపిస్తుంది. ఈ రెండు లక్షణాలు తప్పించి ఈ స్టేజ్ లో ఇంకే సమస్య ఉండదు.

సెకండ్ స్టేజ్

ఈ దశను నాన్ ఆల్కహాలిక్ స్టీటో హెపటైటిస్ అని పిలుస్తారు. ఈ స్టేజ్ లో కొన్ని లక్షణాలు కనిపిస్తాయి. ఈ దశ నుంచే లివర్ పని తీరులో మార్పులు వస్తుంటాయి. విపరీతమైన నీరసం, పొత్తి కడుపులో కుడివైపున నొప్పి ఇబ్బంది పెడతాయి. వీటితో పాటు చాలా మంది ఉన్నట్టుండి బరువు తగ్గుతారు. చాలా మందిలో ఈ సింప్టమ్స్ కనిపిస్తాయి. అయితే..ఈ స్టేజ్ ఫ్యాటీ లివర్ సమస్యని పట్టించుకోకపోతే తీవ్రతరమయ్యే ప్రమాదముంటుంది. అందుకే ఈ స్టేజ్ లోనే సరైన విధంగా చికిత్స తీసుకోవాలి. ఆహార అలవాట్లలోనూ కొన్ని మార్పులు చేసుకోవాలి. లివర్ పనితీరుని ఎఫెక్ట్ చేసే ఫుడ్ ఐటమ్స్ అసలు తినకూడదు.

మూడో దశ

ఈ స్టేజ్ ని ఫైబ్రాసిస్ అంటారు. ఇది ఫ్యాటీ లివర్ లో అతి ముఖ్యమైన, ప్రమాదకరమైన దశ. కాలేయంలో మంటతో పాటు పైన ఓ మచ్చ కూడా ఏర్పడుతుంది. అప్పటికీ కాలేయం పని చేసినప్పటికీ మునుపటిలా మాత్రం ఉండదు. తరచూ నీరసంగా ఉంటారు. ఎప్పుడూ ఇబ్బందిగానే అనిపిస్తుంది. పొత్తి కడుపులో వాపు వస్తుంది. లేదా కాళ్ల వాపులు వస్తాయి. ఈ లక్షణాలు కనిపించాయంటే వెంటనే అప్రమత్తం కావాల్సిందే. లేదంటే శరీరమంతా నీరు ఎక్కువైపోయి ఉబ్బిపోతుంది. ఈ స్టేజ్ లో లివర్ ని క్లీన్ చేసే చిట్కాలు తప్పనిసరిగా పాటించాలి. ఇంట్లోనే తయారు చేసుకోగలిగే డ్రింక్స్ తో డిటాక్సిఫై చేసుకోవాలి.

నాలుగో దశ

ఈ దశని సిరాసిస్ అని పిలుస్తారు. ఈ దశలో లివర్ పూర్తిగా చెడిపోతుంది. పని తీరులో మార్పు వస్తుంది. ఈ స్టేజ్ వరకూ వచ్చిందంటే ఫ్యాటీ లివర్ సమస్య నుంచి బయటపడడం చాలా కష్టం. పైగా ఈ దశలో పచ్చ కామెర్లు వచ్చే అవకాశం ఎక్కువగా ఉంటుంది. చర్మం, కళ్లు అంతా పచ్చగా మారిపోతాయి. ఒళ్లంతా వాచిపోతుంది. మానసికంగా కూడా సరిగ్గా ఉండరు. నీరసంతో కళ్లు తిరుగుతుంటాయి. ఈ స్టేజ్ లో లివర్ డిటాక్స్ చేసినా ఎలాంటి ఉపయోగం ఉండదు. కేవలం సింప్టమ్స్ తగ్గించడానికి మందులు వేసుకోవడం తప్ప ఇంకేమీ చేయడానికి ఉండదు. ఇక లాస్ట్ ఆప్షన్ గా లివర్ ట్రాన్స్ ప్లంటేషన్ చేయాల్సి ఉంటుంది. ఇది చాలా ఖర్చుతో కూడుకున్న పని.

ముందస్తు జాగ్రత్తలు

ఫ్యాటీ లివర్ ఫస్ట్ స్టేజ్ లో ఉన్నప్పుడు నీరసం, వెయిట్ లాస్ లాంటి లక్షణాలు కనిపిస్తాయి. అప్పుడే అప్రమత్తం అయితే జబ్బు ముదరక ముందే బయటపడేందుకు అవకాశముంటుంది. అయితే..ఆయుర్వేద చిట్కాలతో కొంత వరకూ ఈ ఇబ్బందిని తప్పించవచ్చు. షుగర్ అధికంగా ఉండే ఆహారం తీసుకోవడం ఏ మాత్రం మంచిది కాదు. ఈ కారణంగా ఫ్యాటీ లివర్ పెరుగుతుంది. ఫిజికల్ యాక్టివిటీ లేకపోయినా ఇదే సమస్య తలెత్తుతుంది. అల్లం, పసుపుతో బాడీని డిటాక్సిఫై చేసుకోవచ్చు. దీంతో పాటు ప్రాణాయామం లాంటి వ్యాయామాలతో కాలేయాన్ని పదిలంగా ఉంచుకోవచ్చు.