దేశంలో 2700 దాటిన కరోనా కేసులు.. ఏడుగురు మృతి

దేశంలో మరోసారి కరోనా మహమ్మారి విజృంభిస్తోంది. రోజురోజుకూ కేసులు క్రమంగా పెరుగుతుండటం ఆందోళన కలిగిస్తోంది. దేశంలో కరోనా కేసుల సంఖ్య 2,710కి పెరిగాయి. అలాగే కరోనా కారణంగా ఇప్పటి వరకు ఏడుగురు మృతి చెందడం ఆరోగ్య శాఖ వర్గాల్లో ఆందోళన రేకెత్తిస్తోంది. ప్రస్తుతం వస్తున్న కేసులు ఎక్కువగా కేరళలో నమోదు అవుతున్నాయి. కేరళలోనే కొవిడ్ ఇన్ఫెక్షన్లు ఎక్కువగా ఉన్నట్లు కేరళ ఆరోగ్య, కుటుంబ సంక్షేమ మంత్రిత్వ శాఖ తాజా గణాంకాలు వెల్లడించాయి.

కేరళలో 1,147, మహారాష్ట్రలో 424 పాజిటివ్ కేసులు..

గణాంకాల ప్రకారం కేరళంలో 1,147 కేసులు నమోదు అయ్యాయి. తర్వాత మహారాష్ట్రలో ఎక్కువ కేసులు వెలుగు చూశాయి. అక్కడ 424 మంది కరోనా పాజిటివ్‌గా తేలారు. దిల్లీలో 294 కేసులు నమోదు కాగా, గుజరాత్‌లో 223 కరోనా కేసులు వెలుగుచూశాయి. కర్ణాటక, తమిళనాడు రాష్ట్రాల్లో 148 చొప్పున కేసులు, పశ్చిమ బెంగాల్‌లో 116 కేసులు నమోదైనట్లు జాతీయ ఆరోగ్య శాఖ గణాంకాలు చెబుతున్నాయి. గత 24 గంటల వ్యవధిలోనే ఏడుగురు మృతి చెందారు. ఈ సంవత్సరం మొదటి 5 నెలల్లో మరణాల సంఖ్య 22కు చేరుకుంది. గత 24 గంటల్లో మహారాష్ట్రలో రెండు మరణాలు సంభవించగా, దిల్లీ, గుజరాత్, కర్ణాటక, పంజాబ్, తమిళనాడులో ఒక్కొక్క కేసు నమోదు అయ్యాయి.

వెలుగులోకి వచ్చిన కేసుల్లో ఎక్కువ శాతం చాలా తేలిక పాటివిగా వైద్యులు చెబుతున్నారు. భయపడాల్సిన అవసరం లేదని ఆరోగ్య మంత్రిత్వ శాఖ తెలిపింది. కేరళలో అత్యధిక కేసులు నమోదు కావడానికి కారణం ఆ రాష్ట్రంలో ఎక్కువగా కరోనా నిర్ధారణ పరీక్షలు నిర్వహించడమే అయి ఉంటుందని వైద్యాధికారులు చెబుతున్నారు. మిజోరాంలో గత 7 నెలల్లో ఒక్క కరోనా కేసు లేదు. అయితే తాజాగా ఆ రాష్ట్రంలో రెండు కొవిడ్ కేసులు నమోదయ్యాయి.

రెండు కొత్త ఓమిక్రాన్ సబ్ వేరియంట్‌లు అయిన LF.7, NB.1.8.1.. కరోనా కేసుల పెరుగుదలకు దోహద పడుతున్నాయని నిపుణులు అభిప్రాయ పడుతున్నారు. అయినప్పటికీ JN.1 దేశంలో వ్యాప్తి చెందుతున్న ప్రధాన వేరియంట్ అని గణాంకాలు చెబుతున్నాయి. కొత్తగా వ్యాప్తి చెందుతున్న వేరియంట్లు రోగనిరోధక శక్తిని తప్పించుకునే సామర్థ్యాన్ని కలిగి ఉండవచ్చని నిపుణులు సూచిస్తున్నారు. అయితే వాటి వల్ల తీవ్రమైన, దీర్ఘకాలిక ఇన్ఫెక్షన్లకు కారణం అవుతాయని చెప్పడానికి ఎలాంటి ఆధారాలు లేవని చెబుతున్నారు.