ఆర్సీబీ కప్పు కొట్టాలే' చీటీ రాసి 'కొండగట్టు అంజన్నా హుండీలో వేసిన అభిమాని

ఆర్సీబీ ఫ్యాన్స్ పద్దెనిమిదేళ్ల కల.. పదిహేడేళ్లుగా కలగానే మిగిలిపోయిన కథ. మరి ఈ సారైనా ఆ కల నెరవేరుతుందా? ఇప్పుడు ఎక్కడ పట్టినా అదే టాపిక్. ఈసాలా కప్ నమ్దేనా? లేక ఎప్పటిలాగే హృదయాలే గెలుస్తుందా? అని క్రికెట్ ఫ్యాన్స్‌లో ఇదే చర్చ. ఐపీఎల్ సీజన్ 18 కావడం.. విరాట్ కోహ్లి జెర్సీ నెంబర్ 18 కావడంతో.. ఈ సారి ఎలాగైనా టైటిల్ నెగ్గి కోహ్లికి డెడికేట్ చేయాలని టీమ్‌మేట్స్ గట్టిగానే ఫిక్స్ అయ్యారు. ఆర్సీబీ కూడా ఫైనల్‌కు చేరుకోవడంతో అభిమానులు గుళ్లు, గోపురాల చుట్టూ తిరిగి మొక్కలు మొక్కుతున్నారు.

రాయల్ ఛాలెంజర్స్ బెంగళూరు జట్టు ఐపీఎల్ 2025 ఫైనల్‌కు చేరడంతో.. ఆ టీమ్ అభిమానులు ఇక గుళ్లు చుట్టూ తిరగడం మొదలుపెట్టారు. ఓ అభిమాని కొండగట్టు అంజన్న ఆలయానికి వెళ్లి.. అక్కడ హుండీలో ఆర్సీబీ టైటిల్ గెలవాలి అని చీటీ రాసి వేశాడు. కింద ఈ సాలా కప్ నమ్దే అంటూ ఆర్సీబీ ఫ్యాన్స్ సిగ్నేచర్ కూడా ఉంచాడు. ఈ ఫొటో ఇప్పుడు సోషల్ మీడియాలో వైరల్ అవుతోంది.

క్వాలిఫైయర్ 1 మ్యాచ్‌కి ముందు తెలుగు రాష్ట్రాల్లో విరాట్ కోహ్లి, అనుష్క శర్మ పేరు మీద అర్చన కూడా చేయించారు. జూన్ 4న కర్ణాటకకు హాలిడే ప్రకటించాలని.. ఎందుకంటే జూన్ 3న ఆర్సీబీ కప్ కొడుతుంది కాబట్టి.. 4న భారీగా సెలబ్రేషన్స్ చేసుకోవడానికి సెలవు దినంగా ప్రకటించాలంటూ ఓ అభిమాని ఏకంగా ముఖ్యమంత్రికే లేఖ రాశాడు.

ఐపీఎల్ 2025లో ఆర్సీబీ వరుస విజయాలతో దూసుకుపోతోంది. ఈ సీజన్‌ని విక్టరీతో మొదలుపెట్టిన బెంగళూరు.. నాకౌట్ మ్యాచ్‌లలో కూడా విజయాలు సాధించింది. లీగ్ స్టేజ్‌లో వరుస విజయాలతో పాయింట్స్ టేబుల్‌లో సెకండ్ ప్లేస్‌లో నిలిచిన ఆర్సీబీ.. క్వాలిఫైయర్ 1లో పంజాబ్‌ను చిత్తు చిత్తుగా ఓడించి ఫైనల్స్‌లో అడుగుపెట్టింది. అటు బ్యాటింగ్, ఇటు బౌలింగ్‌లో స్ట్రాంగ్‌గా ఉన్న ఆర్సీబీకి ఐపీఎల్ టైటిల్ అందుకోవడానికి ఇదే సరైన సమయం అంటూ ఫ్యాన్స్ నెట్టింట పోస్టులు చేస్తున్నారు.

జూన్ 3న అంటే మంగళవారం రోజున ఐపీఎల్ 2025 ఫైనల్ మ్యాచ్ జరగనుంది. అహ్మదాబాద్‌లోని నరేంద్ర మోదీ క్రికెట్ స్టేడియం వేదికగా జరిగే ఈ మ్యాచ్ ఫైనల్‌‌లో ఆర్సీబీ అడుగుపెట్టగా.. మరో జట్టు ఏంటి అనేది రేపు తేలనుంది. క్వాలిఫైయర్ 2 మ్యాచ్‌లో పంజాబ్ కింగ్స్, ముంబై ఇండియన్స్ జట్లు తలపడనున్నాయి. ఈ మ్యాచ్‌లో ఏ జట్టు గెలిస్తే అది ఫైనల్‌లో ఆర్సీబీతో ఆడనుంది.