లీటర్ 'పెట్రోల్‌'పై రూ.3 తగ్గింపు.. ఆ బంకుల్లో స్పెషల్ స్కీమ్

ప్రస్తుతం మన దేశంలో పెట్రోల్ ధరలు గరిష్ఠ స్థాయిలోనే ఉన్నాయి. అంతర్జాతీయ మార్కెట్లో క్రూడ్ ఆయిల్ ధరలు భారీగా దిగివస్తున్నా చమురు మార్కెటింగ్ సంస్థలు గతంలో వచ్చిన నష్టాలను పూడ్చుకునేందుకే మొగ్గు చూపుతున్నాయి. ఆ ప్రయోజనాలను వాహనదారులకు అందించడం లేదు. దీంతో ఇప్పటికీ అధిక ధరలు చెల్లించాల్సి వస్తోంది. క్రూడ్ ఆయిల్ ధరలు ఇంకా తగ్గే అవకాశాలు ఉన్నాయి. అయినప్పటికీ కేంద్ర ప్రభుత్వం పెట్రోల్ ధరలు తగ్గించే అవకాశాలు లేవని మార్కెట్ వర్గాలు అంచనా వేస్తున్నాయి. అయితే, మీరు ఇప్పుడు లీటర్ పెట్రోల్ పై రూ.3 వరకు తగ్గింపు పొందవచ్చు.

ప్రముఖ ప్రైవేట్ రంగ చమురు రిటైలింగ్ సంస్థ నయారా ఎనర్జీ తమ కస్టమర్లకు బంపర్ ఆఫర్ తీసుకొచ్చింది. నయారా ఎనర్జీ మహా బచత్ ఉత్సవ్ స్కీమ్ తీసుకొచ్చింది. ఈ స్కీమ్ ద్వారా నయారా ఎనర్జీకి చెందిన ఎంపిక చేసిన పెట్రోల్ బంకుల్లో లీటర్ పెట్రోలుపై రూ. 3 వరకు తగ్గింపు ఇస్తోంది. గరిష్ఠంగా రూ.150 వరకు తగ్గింపు పొందవచ్చు. తాము ఎంత పెట్రోల్ కొట్టిస్తున్నామనేదానిపై తగ్గింపు ఆధారపడి ఉంటుంది. ఈ స్కీమ్ షరతులు పూర్తిగా తెలుసుకోవడం ద్వారా తగ్గింపు పొందేందుకు అవకాశం లభిస్తుంది.

నయారా ఎనర్జీ మహా బచత్ ఉత్సవ్ స్కీమ్ ఏప్రిల్ 1, 2025 నుంచే మొదలైంది. ఈ స్కీమ్ జూన్ 30, 2025 అర్ధరాత్రి వరకు అందుబాటులో ఉంటుంది. ఈ నిర్దిష్ట సమయంలో పెట్రోల్ కొట్టించుకున్న వారికే తగ్గింపు లభిస్తుంది. ఆ తర్వాత అందుబాటులో ఉండదు. 18 ఏళ్ల వయసు నిండిన వారు ఆఫర్ అందుకోవచ్చు. అందుకు ధ్రువీకరణ పత్రాలు చూపించాల్సి ఉంటుంది. డిజిటల్ విధానంలోనే చెల్లింపులు చేయాల్సి ఉంటుంది. క్రెడిట్ కార్డు, డెబిట్ కార్డు, యూపీఐ సహా ఎంపీఓఎస్ మెషీన్ల ద్వారా పేమెంట్లు చేయవచ్చు.

రూ. 600 నుంచి రూ. 2999.99 వరకు పెట్రోల్ కొట్టించుకుంటే లీటర్ పై రూ.2 చొప్పున తక్షణ తగ్గింపు లభిస్తుంది. అదే రూ. 3 వేల నుంచి ఆపైన పెట్రోల్ కొట్టిస్తే లీటరుకు రూ.3 చొప్పున తగ్గింపు వస్తుంది. అయితే, గరిష్ఠంగా రూ. 150 వరకు డిస్కౌంట్ అందుకోవచ్చు. ఎంపిక చేసిన నాయారా ఎనర్జీ పెట్రోల్ బంకుల్లో పెట్రోల్ పైన మాత్రమే ఈ తగ్గింపు లభిస్తుందని గుర్తుంచుకోవాలి. కస్టమర్లు ఏదైనా సందేహం ఉంటే 1800 1200 330 టోల్ ఫ్రీ నంబర్కు ఫోన్ చేసి వివరాలు తెలుసుకోవచ్చు.