భారత్ మొత్తుకుంటున్నా పాక్‌కు ఐఎంఎఫ్ భారీ రుణాలు

పహల్గాం ఉగ్రదాడి తర్వాత భారత్ ఆపరేషన్ సిందూర్ పేరిట.. పాకిస్థాన్, పాక్ ఆక్రమిత కశ్మీర్‌లోని ఉగ్రస్థావరాలపై వైమానికి దాడులు చేసింది. దీంతో పెద్ద ఎత్తున నష్టపోయిన పాక్.. దాన్నుంచి తిరిగి కోలుకోవడానికి పెద్ద ఎత్తున రుణాలు పొందుతోంది. ఇప్పటికే అంతర్జాతీయ ద్రవ్య నిధి (ఐఎంఎఫ్) ఒక బిలియన్ డాలర్లు ఇచ్చేందుకు అంగీకరించగా.. ఇప్పుడు పాక్ ఆసియా అభివృద్ధి బ్యాంకు వద్దకు వెళ్లింది. అక్కడ కూడా రుణాలు కావాలని కోరగా.. 800 మిలియన్ డాలర్లు ఇచ్చేందుకు ఆ బ్యాంకు ఒప్పుకుంది. ఈ విషయం తెలుసుకున్న భారత్ తీవ్రంగా ఖండిస్తోంది. పాక్ చేతికి నిధులు వెళ్తే.. దుర్వినియోగం చేసే అవకాశం ఎక్కువగా ఉందంటూ నెత్తీ, నోరు మొత్తుకుంటోంది.

పహల్గాం ఉగ్రదాడితో భారత్-పాకిస్థాన్ దేశాల మధ్య తీవ్ర ఉద్రిక్త పరిస్థితులు నెలకొన్న విషయం అందరికీ తెలిసిందే. ఇలాంటి సమయంలోనే పాకిస్థాన్ రుణాలు కావాలంటూ అంతర్జాతీయ ద్రవ్య నిధి వద్దకు వెళ్లింది. కానీ భారత్ మాత్రం దాయాది దేశానికి రుణం ఇవ్వకూడదని, ఒకవేళ ఇస్తే పాక్ దుర్వినియోగం చేస్తుందంటూ తీవ్ర అభ్యంతరం వ్యక్తం చేసింది. కానీ అవేమీ పట్టించుకోని ఐఎంఎఫ్ 1 బిలియన్ డాలర్ల నిధులు ఇవ్వడానికి సిద్ధం అయింది. అంటే భారత కరెన్సీ ప్రకారం రూ.8,540 కోట్లు. ఎక్స్‌టెండెడ్ ఫండ్ ఫెసిలిటీ కింద ఈ మొత్తాన్ని ఇవ్వడానికి ఐఎంఎఫ్ అంగీకరించింది. ఆ తర్వాత కూడా భారత్.. పాక్‌కు నిధులు మంజూరు చేస్తే పరోక్షంగా ఉగ్రవాదాన్ని ప్రోత్సహించినట్లే అవుతుందని చెప్పింది. ఈ విషయంపై మరోసారి ఆలోచించుకోవాలని పేర్కొంది.

ఇలాంటి సమయంలోనే ఆసియా అభివృద్ధి బ్యాంకు పాకిస్థాన్‌కు 800 మిలియన్ డాలర్ల నిధులను ఇస్తామని చెప్పింది. దీంతో భారత్ మరోసారి తీవ్ర అభ్యంతరం వ్యక్తం చేసింది. పాన్‌కు మంజూరు చేసిన ఆర్థిక సహాయాన్ని వ్యతిరేకించింది. పాకిస్థాన్ ఈ నిధులను అభివృద్ధి కార్యక్రమాల కంటే ఎక్కువగా రక్షణ ఖర్చులకు మళ్లించే ప్రమాదం ఉందని చెప్పింది. భారత ప్రభుత్వ వర్గాల ప్రకారం.. పాకిస్థాన్‌లో పన్నుల వసూలు స్థాయి 2018లో GDPలో 13% నుండి 2023లో 9.2%కి పడిపోయింది. ఇది ఆసియా-పసిఫిక్ ప్రాంత సగటు 19%తో పోలిస్తే చాలా తక్కువ.

అయితే ఈ కాలంలో పాకిస్థాన్ రక్షణ ఖర్చులు గణనీయంగా పెరిగాయి. ఇది చూస్తుంటేనే.. అంతర్జాతీయ ఆర్థిక సంస్థల నుండి పొందిన నిధులను పాక్ అభివృద్ధికి కాకుండా రక్షణ రంగానికి మళ్లిస్తోందని తెలుస్తోంది. ఈక్రమంలోనే భారత్ ఆసియా అభివృద్ధి బ్యాంకుకు.. పాకిస్థాన్‌కు ఆర్థిక సహాయం అందించేముందు ఈ నిధులు దుర్వినియోగం కాకుండా పర్యవేక్షణ విధానాలు ఏర్పాటు చేయాలని సూచించింది. అలాగే పాకిస్తాన్ పాలన విధానాలు ప్రాంతీయ శాంతి మరియు భద్రతకు ముప్పుగా మారుతున్నాయని భారత్ అభిప్రాయపడింది.