చైనా మాకు శత్రువే.. రష్యా గూఢచారి నివేదిక లీక్

చైనాతో రాసుకుపూసుకుని తిరుగుతున్నట్టు కనిపించే రష్యా.. డ్రాగన్‌ను తమకు ప్రమాదికారిగా భావిస్తుందా? బీజింగ్‌ను మాస్కో అస్సలు నమ్మడం లేదా? అంటే అవునంటోంది క్రెమ్లిన్ గూఢచారి సంస్థ నివేదిక. చైనా, రష్యా అధ్యక్షులు జీ జిన్‌పింగ్, వ్లాదిమిర్ పుతిన్‌లను ప్రపంచం మొత్తం మిత్రులుగా చూస్తున్నప్పటికీ రష్యా ఫెడరల్ సెక్యూరిటీ సర్వీస్ అంతర్గత నివేదిక చైనా పట్ల మాస్కోకు పెరుగుతున్న సందేహాన్ని బహిర్గతం చేసింది. ది న్యూయార్క్ టైమ్స్‌కు చిక్కిన ఎనిమిది పేజీల రహస్య నివేదికలో చైనాను ‘శత్రువు’గా పేర్కొనడం గమనార్హం.

చైనా నుంచి ముప్పు

రష్యా గూఢచారి సంస్థ ఎఫ్ఎస్బీలోని సీక్రెట్ యూనిట్ తయారు చేసిన ఈ నివేదిక ప్రకారం.. రష్యా రహస్యాలను చైనా గణనీయంగా చోరీ చేస్తోంది.. శక్తివంతమైన మిలిటరీ టెక్నాలజీపై బీజింగ్ కన్నేసిందని, అలాగే అసమ్మతి తెలిపే రష్యా శాస్త్రవేత్తలను ఆకర్షించి గూఢచర్యానికి ప్రయత్నిస్తోందని హెచ్చరించింది. న్యూయార్క్ టైమ్స్ కథనం ప్రకారం.. ఉక్రెయిన్ యుద్ధంలో రష్యా సైనిక కార్యకలాపాలపై నిఘా పెట్టి, పశ్చిమ దేశాల ఆయుధాలు, వ్యూహాలపై సమాచారం సేకరిస్తోంది. ఇక, రష్యా, ఇండియా, చైనా త్రైపాక్షిక కూటమిపునరుద్దరణకు అడుగులు పడుతోన్న తరుణంలో ఈ నివేదిక రావడం గమనార్హం.

రష్యా భూభాగంపై కన్నేసిన చైనా?

రష్యా పొరుగు దేశంగా ఉన్న చైనా.. కొంతమంది మత బోధకులు, పరిశోధకుల ద్వారా సరిహద్దు ప్రాంతాలపై హక్కులను క్లెయిమ్ చేసేందుకు ప్రణాళికలు వేస్తోందని నిఘా నివేదిక పేర్కొంది. ముఖ్యంగా రష్యా-చైనా సరిహద్దులోని తక్కువ జనసాంద్రత ప్రాంతాలపై శాస్త్రీయ న్యాయాన్ని ఏర్పరచేందుకు అకడమిక్ పరిశోధనలను చైనాో వినియోగిస్తోంది. ఉక్రెయిన్ యుద్ధంలో ఇటీవల రష్యాకు భారీ నష్టం జరిగిన విషయం తెలిసిందే. కీవ్ డ్రోన్ దాడుల్లో 40కిపైగా టీ-95 యూ బాంబర్ విమానాలు ధ్వంసమయ్యాయి.

ఆర్కిటిక్‌లోనూ చైనా గూఢచర్యం

FSB నివేదిక ప్రకారం, మైనింగ్ కంపెనీలు, విశ్వవిద్యాలయ పరిశోధన కేంద్రాల రూపంలో ఆర్కిటిక్ ప్రాంతంలోనూ చైనా గూఢచర్యానికి పాల్పడుతోంది.

ఎంటాంట్-4

ఉక్రెయిన్ యుద్ధం ప్రారంభానికి ముందు.. చైనా గూఢచారులను నియంత్రించేందుకు ఉద్దేశించి ‘ఎంటాంట్-4’ అనే కొత్త ప్రోగ్రామ్‌ను రష్యా ఆమోదించింది. ఈ ఆపరేషన్ పేరే చైనాతో ఉన్న స్నేహ బంధాన్ని వ్యంగ్యంగా గుర్తు చేస్తోంది.

వీచాట్‌పై నిఘా

చైనా సోషల్ మీడియా వీచాట్ యాప్ వినియోగదారులపై నిరంతర నిఘా పెట్టాలని రష్యా గూఢచారి సంస్థ ఆదేశించింది. ఫోన్లను హ్యాక్ చేయడం, వాటి సమాచారం విశ్లేషణ కోసం ప్రత్యేక సాఫ్ట్‌వేర్ టూల్‌ను ఉపయోగిస్తున్నట్టు నివేదిక వెల్లడించింది.

బయటకు చైనా, రష్యాలు మిత్రులుగా కనిపించినా, వాస్తవికంగా బీజింగ్ మీద రష్యా తీవ్రమైన అనుమానాలు పెంచుకుంటోందని ఈ లీక్ స్పష్టంచేస్తోంది. ఈ పరిస్థితి భవిష్యత్తులో ఈ రెండు శక్తివంతమైన దేశాల మధ్య సంబంధాలను ప్రభావితం చేయనుంది. ఇటీవల కాలంలో పుతిన్, జిన్‌పింగ్‌లు తరుచూ కలుసుకోవడంతో ఉక్రెయిన్‌పై యుద్దం విషయంలో చైనా సాయం చేస్తోందనే వార్తలు వెలువడ్డాయి. కానీ, యుద్ధంపైనే చైనా నిఘా ఉంచినట్టు సీక్రెట్ డాక్యుమెంట్ ప్రస్తావించడం గమనార్హం.