చాయ్ తాగేటప్పుడు చేయకూడని తప్పులేంటో మీకు తెలుసా

మన దేశంలో చాలా మందికి టీ తాగే అలవాటు ఉంది. ఉదయం నిద్ర లేవగానే టీ లేదా కాఫీ తాగుతుంటారు. అయితే, చాలా మంది టీకి ప్రిఫరెన్స్ ఇస్తారు. చాలా మందికి ఉదయం ఒక కప్పు టీ తాగకపోతే.. వారి రోజు ప్రారంభం కాదు. చాలా మంది ఒక రోజులో అనేక కప్పుల టీ తాగుతారు. అయితే, బరువు పెరుగుతున్నట్లు గమనించినప్పుడు, అందరూ టీ మానేయమని సలహా ఇస్తారు. కొంతమంది టీ తాగే పరిమాణాన్ని తగ్గిస్తారు. ఎందుకుంటే వారికి టీని పూర్తిగా మానేయడం కష్టం. అయితే, బరువు తగ్గడానికి టీ మానేయడం కరెక్టా? టీ అనేది సాధారణంగా చాలా తక్కువ కేలరీలు ఉండే పానీయం. సరైన పద్ధతిలో తాగితే, బరువు తగ్గడానికి ఇది సహాయపడవచ్చు కూడా. అయితే, టీ తాగే విధానం బరువుపై ఎలా ప్రభావం చూపుతుందో చూద్దాం.

టీ తాగితే నిజంగా బరువు పెరుగుతారా?

మొదటగా అందరికీ గుర్తుకు వచ్చే ప్రశ్న ఏంటంటే టీ తాగడం వల్ల బరువు పెరుగుతారా? నిజానికి, టీ ఆకులు సమస్య కాదు. సమస్య టీ తయారుచేసేటప్పుడు ఉపయోగించే పదార్థాలు. టీ తయారుచేసేటప్పుడు ఎక్కువ చక్కెర, పూర్తి కొవ్వు పాలు ఉపయోగించినప్పుడు, కేలరీల కంటెంట్ చాలా ఎక్కువగా ఉంటుంది. నిపుణుల అభిప్రాయం ప్రకారం, ఒక కప్పు టీలో దాదాపు 100 నుంచి 110 కేలరీలు ఉంటాయి. టీతో పాటు చాలా మంది బిస్కెట్లు, రస్క్‌లు, నమ్కీన్ లేదా ఏదైనా అనారోగ్యకరమైన చిరు తిండి తింటారు. దీని వల్ల కేలరీలు పెరిగి బరువు పెరిగే అవకాశం ఉందని నిపుణులు హెచ్చరిస్తున్నారు.

టీ తాగడం వల్ల బరువు ఎప్పుడు పెరుగుతారు?

* చక్కెర: మీరు టీలో ఎక్కువ చక్కెర కలుపుకుంటే, అది కేలరీలను గణనీయంగా పెంచుతుంది. రోజుకు చాలా కప్పుల చక్కెర టీ తాగడం వల్ల తెలియకుండానే అధిక కేలరీలు శరీరంలోకి చేరి బరువు పెరగడానికి దారితీస్తుంది.

* పాలు/క్రీమ్: ఫుల్ ఫ్యాట్ మిల్క్ లేదా క్రీమ్ వాడటం వల్ల టీలో కొవ్వు, కేలరీలు పెరుగుతాయి. అధిక కొవ్వు పాలు వాడటం బరువు పెరగడానికి కారణం కావచ్చు.

* ప్యాక్డ్ టీ పానీయాలు: మార్కెట్‌లో లభించే రెడీ-టు-డ్రింక్ టీ పానీయాలు లేదా స్వీటెన్డ్ టీలు తరచుగా అధిక చక్కెర, కేలరీలను కలిగి ఉంటాయి.

* టీతో స్నాక్స్: టీతో పాటు బిస్కెట్లు, సమోసాలు, స్వీట్లు వంటి అనారోగ్యకరమైన స్నాక్స్ తీసుకోవడం వల్ల కూడా బరువు పెరుగుతారు. ఇక్కడ సమస్య టీ కాదు, దానికి తోడు తీసుకునే ఆహారం.

బరువు తగ్గడానికి టీని వదులుకోవడం అవసరమా?

అసలు సమస్య టీతో కాదు, దానిని తయారు చేసే విధానంతో ఉంది. అలాంటప్పుడు టీ తయారుచేసే విధానంలో కొంచెం మార్పు చేస్తే సరిపోతుంది. అంతేకానీ టీ తాగడం మానేస్తే బరువు తగ్గుతారనేది వాస్తవం కాదు. ఇందుకోసం టీకి చక్కెర లేదా బెల్లం జోడించడం మానేసి, స్టెవియా, మాంక్ ఫ్రూట్ సారం వంటి సహజ స్వీటెనర్లను ఉపయోగించండి. దీంతో పాటు పూర్తి కొవ్వు పాలకు బదులుగా టోన్డ్ మిల్క్ ఉపయోగించండి. అలాగే, అనారోగ్యకరమైన స్నాక్స్‌కి బదులుగా మఖానా, వేయించిన శనగలు, పోహా, ఏవైనా గింజలు తీసుకోండి.

ఒక రోజులో ఎన్నిసార్లు టీ తాగాలి?

ఆరోగ్యంగా, ఫిట్‌గా ఉండటం కోసం సరైన పరిమాణంలో టీ తాగడం ముఖ్యం. కొంతమంది రోజుకు 5 నుంచి 6 సార్లు టీ తాగుతారు. ఇది జీర్ణక్రియ, హైడ్రేషన్ స్థాయి రెండింటిపై ప్రతికూల ప్రభావాన్ని చూపుతుంది. ఆరోగ్య నిపుణుల అభిప్రాయం ప్రకారం, రోజుకు ఒకటి లేదా రెండు కప్పుల టీ తాగడం ఉత్తమం. టీ అలవాటును క్రమంగా తగ్గించుకోండి. అందుకు బదులు గ్రీన్ టీ, బ్లాక్ టీ లేదా హెర్బల్ టీ వంటి ఆరోగ్యకరమైన ఆప్షన్లు ఎంచుకోండి.

బరువు తగ్గడానికి టీ ఎలా తాగాలి?

* చక్కెర లేకుండా తాగండి: చక్కెర బదులు సహజమైన స్వీటెనర్‌లు (తేనె వంటివి, అవి కూడా మితంగా) లేదా అసలు స్వీటెనర్‌లు లేకుండా తాగడం అలవాటు చేసుకోండి.

* పాలు తగ్గించండి లేదా స్కిమ్డ్ మిల్క్ వాడండి: పాల టీ తాగే అలవాటు ఉంటే, పాలు తక్కువగా వేయండి లేదా స్కిమ్డ్ మిల్క్ (కొవ్వు లేని పాలు) వాడండి. బ్లాక్ టీ లేదా గ్రీన్ టీ ఉత్తమం.

* సరైన టీ రకాలు ఎంచుకోండి: గ్రీన్ టీ, ఊలాంగ్ టీ, బ్లాక్ టీ, హెర్బల్ టీలు (అల్లం టీ, పుదీనా టీ, మందారం టీ) వంటివి బరువు తగ్గడానికి సహాయపడతాయి.

* ఆహారం, వ్యాయామంతో కలిపి: టీ ఒక్కటే బరువు తగ్గించడానికి అద్భుతం చేయదు. సమతుల్యమైన ఆహారం, క్రమం తప్పకుండా వ్యాయామం చేయడం బరువు తగ్గడానికి అత్యంత ముఖ్యమైనవి.