ఏపీలో కల్తీ నెయ్యి కలకలం,,,,ఆ శాంపిల్స్‌లో కల్తీ జరిగినట్లు గుర్తింపు

తెలుగు రాష్ట్రాల్లో ముఖ్యంగా ఆంధ్రప్రదేశ్‌లో.. మరీ ముఖ్యంగా గోదావరి జిల్లాల్లో పూతరేకులకు పెట్టింది పేరు. ఇక కోనసీమ ప్రాంతంలోని ఆత్రేయపురం గురించి ప్రత్యేకంగా చెప్పాల్సిన అవసరం లేదు.. పూత రేకులకు చాలా ఫేమస్. అలాంటి ఆత్రేయపురం పూతరేకుల్లో ఉపయోగించే నెయ్యి గురించి తెలిస్తే మైండ్ బ్లాక్ అవుతుంది. ఆత్రేయపురంలోని పలు షాపుల్లో డాల్డా, పామాయిల్ కలిపిన కల్తీ నెయ్యిని అమ్ముతున్నట్లు.. దానిని పూతరేకుల తయారీలో ఉపయోగిస్తున్నట్లు తేలింది. ఇటీవల ఓ డ్రైఫ్రూట్స్‌ గొడౌన్‌ వద్ద 66 కిలోల కల్తీ నెయ్యిని స్థానికులు పట్టుకున్నారు.. గోడౌన్‌లో చెక్ చేస్తే మరో 35 కిలోల నెయ్యిని గుర్తించారు.. మొత్తం 101 కిలోల నెయ్యిని అధికారుులు సీజ్ చేశారు. దీనిపై కేసు నమోదు చేసి దర్యాప్తు చేస్తున్నారు.

ఈ కల్తీ నెయ్యి అంశంపై రెవెన్యూ, పోలీస్ అధికారులు వెంటనే స్పందించారు.. ఫుడ్ కంట్రోల్ అధికారులకు సమాచారం వెళ్లింది. జిల్లా ఆహార నియంత్రణ అధికారి ఆధ్వర్యంలో రెండు నమూనాలు సేకరించారు.. వాటిని హైదరాబాద్‌లోని నాచారం ల్యాబ్‌కు పంపించారు.. రిపోర్ట్‌లో నెయ్యిలో నాణ్యత లేదని తేలింది. ఈ నమూనాల్లో కల్తీ జరిగిందని గుర్తించినట్లు అధికారులు తెలిపారు. ఆ షాపు యజమానికి నోటీసులు జారీ చేసి క్రిమినల్ కేసు నమోదు చేస్తామన్నారు. బ్రాండెడ్ నెయ్యి వాడకపోయినా, తయారీ తేదీ లేకపోయినా, లైసెన్స్ లేకుండా షాపులు నడిపినా కేసులు నమోదు చేస్తామని అధికారులు హెచ్చరించారు. ఈ కల్తీ నెయ్యితో చేసిన వంటకాలు తింటే ఆస్పత్రి బెడ్ ఎక్కడం ఖాయంగా కనిపిస్తోంది. అందుకే నెయ్యి విషయంలో జాగ్రత్తగా ఉండాలని అధికారులు సూచిస్తున్నారు.

ఇటీవల కాలంలో పాలను కల్తీ చేసిన ఘటనలు చాలానే చూశాం.. ఇప్పుడు నెయ్యిని కూడా కల్తీ చేస్తున్నారు కొందరు వ్యాపారులు.

కాసుల కోసం కక్కుర్తిపడి డాల్డా, పామాయిల్ కలిపిన నెయ్యిని జనాలకు అంటగడుతున్నారు. ఈ కల్తీ నెయ్యి తింటే అనారోగ్య సమస్యలు తప్పవంటున్నారు. అందుకే నెయ్యి కొనుగోలు చేసే సమయంలో జాగ్రత్తగా ఉండాలని సూచిస్తున్నారు. మొత్తం మీద ఈ కల్తీ నెయ్యి వ్యవహారం ఆందోళన కలగిస్తోంది.