ఏపీ మాజీ ఆర్థిక మంత్రి బుగ్గన రాజేంద్రనాథ్‌ చంద్రబాబు పాలనపై తీవ్ర విమర్శలు

ఆంధ్రప్రదేశ్‌ మాజీ ఆర్థిక మంత్రి బుగ్గన రాజేంద్రనాథ్‌, ముఖ్యమంత్రి చంద్రబాబు నాయుడు పాలనపై తీవ్ర విమర్శలు గుప్పించారు. హైదరాబాద్‌లో ఆదివారం (15-06-2025) జరిగిన మీడియా సమావేశంలో ‘తల్లికి వందనం’ పథకం ప్రారంభ కార్యక్రమంలో చంద్రబాబు చేసిన వ్యాఖ్యలపై స్పందిస్తూ, ఆయన ప్రశ్నించే వారిని, ప్రజలైనా సహితం ఉపేక్షించరని ఆరోపించారు. ఎన్నికల ముందు ఇచ్చిన హామీలను గుర్తు చేస్తూ ప్రజలు ప్రశ్నిస్తే, చంద్రబాబు ఉగ్రంగా స్పందిస్తున్నారని బుగ్గన ఎద్దేవా చేశారు. సూపర్ సిక్స్ పథకాలు అమలవుతున్నాయని చెప్పినప్పటికీ, ఉచిత బస్సులు, సిలిండర్‌ వంటి హామీలు అమలులో జాప్యం జరుగుతోందని, ప్రజలను మభ్యపెడుతున్నారని విమర్శించారు.
చంద్రబాబు ప్రభుత్వం అవలంబిస్తున్న పబ్లిక్ ప్రైవేట్ పార్ట్‌నర్‌షిప్ (పీపీపీ) విధానంపై బుగ్గన ప్రశ్నలు సంధించారు. 2 కోట్ల 7 లక్షల మందికి నగదు ఇవ్వాలని చెబుతున్నప్పటికీ, ఈ నిధులు ఎవరు, ఎలా అందిస్తారనే దానిపై స్పష్టత లేదని ఆరోపించారు. ఈసారి బడ్జెట్‌లో అప్పు వివరాలు ఇవ్వకపోవడం చంద్రబాబు పాలనకు మచ్చగా నిలిచిందని పేర్కొన్నారు. రాష్ట్ర ఆర్థిక వ్యవస్థ ఘోరంగా దిగజారిందని, రాష్ట్రం మరో శ్రీలంకగా మారే ప్రమాదం ఉందని హెచ్చరించారు. వ్యాపారాలు స్తంభించడం, ప్రజలు మళ్లీ అప్పుల్లో మునగడం, ప్రైవేట్ ఫైనాన్స్ సంస్థలు కాల్ మనీ వ్యాపారం చేస్తున్నాయని ఆందోళన వ్యక్తం చేశారు.
చంద్రబాబు హయాంలో ఉద్యోగుల ప్రావిడెంట్ ఫండ్‌ నిధులను దుర్వినియోగం చేశారని బుగ్గన ఆరోపించారు. 2014లో 19,130 కోట్లుగా ఉన్న పబ్లిక్ అకౌంట్ లయబిలిటీస్‌, చంద్రబాబు హయాంలో 76,516 కోట్లకు పెరిగిందని, తమ ప్రభుత్వం దానిని 76,038 కోట్లకు తగ్గించి, 478 కోట్లు ఉద్యోగులకు చెల్లించినట్లు తెలిపారు. చంద్రబాబు పాలనలో సంపద సృష్టి కేవలం 3 శాతం మాత్రమే ఉండగా, అప్పులు 30 శాతం పెరిగాయని, తమ ప్రభుత్వం 10 శాతం సంపద పెంచిందని బుగ్గన పేర్కొన్నారు. హామీలు ఇవ్వడం కంటే వాటిని అమలు చేయడం ముఖ్యమని, ప్రజలు మళ్లీ మోసపోవద్దని సూచించారు.