చంద్రబాబు మోసాలపై ‘వెన్నుపోటు’ పుస్తక ఆవిష్కరించిన వైసీపీ

అనకాపల్లి జిల్లా వైఎస్సార్‌సీపీ అధ్యక్షుడు గుడివాడ అమర్నాథ్, కూటమి ప్రభుత్వ వైఫల్యాలు, మోసాలను ప్రజల్లోకి తీసుకెళ్తామని ప్రకటించారు. ఆదివారం (15-06-2025) విశాఖపట్నం వైఎస్సార్‌సీపీ కార్యాలయంలో ‘వెన్నుపోటు’ అనే పుస్తకాన్ని ఎంపీ బాబురావు, ఎమ్మెల్సీ వరుదు కళ్యాణి, కన్న బాబురాజు, కంబాల జోగులు, అదీప్ రాజు, పెట్ల ఉమాశంకర్ గణేష్, వాసుపల్లి గణేష్ కుమార్‌ తదితరులు ఆవిష్కరించారు. ఈ పుస్తకం చంద్రబాబు నేతృత్వంలోని కూటమి ప్రభుత్వం ఏడాది కాలంలో చేసిన అవినీతి, వైఫల్యాలను బయటపెడుతుందని నేతలు పేర్కొన్నారు. అక్రమ మైనింగ్‌పై త్వరలో పోరాటం చేస్తామని, ప్రజలకు న్యాయం చేసేందుకు కట్టుబడి ఉన్నామని అమర్నాథ్ తెలిపారు.
గుడివాడ అమర్నాథ్ మాట్లాడుతూ, చంద్రబాబు ప్రభుత్వం వైఎస్సార్‌సీపీ నేతలపై కక్ష సాధింపు చర్యలకు పాల్పడుతోందని ఆరోపించారు. ప్రభుత్వాన్ని ప్రశ్నిస్తే తప్పుడు కేసులు పెడుతున్నారని, ఏడాదిలో రూ.1.50 లక్షల కోట్ల అప్పు తప్ప ఎలాంటి సాఫల్యం లేదని విమర్శించారు. వైఎస్ జగన్ హామీలతో పాటు చెప్పని పథకాలను కూడా అమలు చేసి, సంక్షేమ పాలన అందించారని గుర్తు చేశారు. దీనికి విరుద్ధంగా, చంద్రబాబు హామీలను నీరుగార్చి, పేద ప్రజలను మోసం చేశారని, అమరావతి అవినీతిపైనే దృష్టి సారించారని ఆరోపించారు. ఎల్లో మీడియా ద్వారా అబద్ధపు కథనాలు ప్రచారం చేస్తూ, ప్రశ్నించే వారిని బెదిరిస్తున్నారని లోకేష్‌పై మండిపడ్డారు.
వైఎస్ జగన్ సంక్షేమ పాలనను ప్రజలు మర్చిపోలేకపోతున్నారని, మోసపోయామని గ్రహించి మళ్లీ జగన్‌ను గెలిపించాలని కోరుకుంటున్నారని అమర్నాథ్ పేర్కొన్నారు. చంద్రబాబు మూడు సార్లు ముఖ్యమంత్రిగా ఉన్నప్పుడు హామీలు అమలు చేయక, రాష్ట్రాన్ని అప్పుల కుప్పగా మార్చారని విమర్శించారు. మహిళల రక్షణ కల్పించలేక, ప్రజాస్వామ్యాన్ని హరిస్తున్నారని ఆరోపించారు. జగన్ మచ్చలేని నాయకుడని, 90 శాతం హామీలను ఏడాదిలో అమలు చేశారని కొనియాడారు. వచ్చే ఎన్నికల్లో వైఎస్సార్‌సీపీ విజయం సాధించి, జగన్ 30 ఏళ్లు ముఖ్యమంత్రిగా కొనసాగుతారని ధీమా వ్యక్తం చేశారు.