ఈ కారుపై రూ.1.07 లక్షల తగ్గింపు.. ఆఫర్ నెలాఖరు వరకే

జపాన్‌కు చెందిన ప్రముఖ ఆటో మొబైల్ తయారీ కంపెనీ హోండా తన పాపులర్ కార్లపై భారీ డిస్కౌంట్ ప్రకటించింది. జూన్ ఆఫర్స్ పేరుతో భారీ తగ్గింపు కల్పిస్తోంది. ధరలో తగ్గింపుతో పాటుగా కస్టమర్ లాయాల్టీ బోనస్, స్పెషల్ డీల్స్ కల్పిస్తోంది. ఈ జూన్ నెలలో హోండా కారు కొనుగోలు చేసే వారికి ఈ ప్రత్యేక డిస్కౌంట్, ఇతర ప్రయోజనాలు అందనున్నాయి. ఓ కారుపై గరిష్ఠంగా రూ. 1.07 లక్షల వరకు తగ్గింపు కల్పిస్తున్నట్లు తెలిపింది. మరి ఈ జూన్ ప్రత్యేక ఆఫర్ల గురించి తెలుసుకుందాం.

దేశీయ మార్కెట్లో మంచి ఆదరణ పొందుతోన్న ప్రముఖ మోడల్ హోండా సిటీ పెట్రోల్ వెర్షన్ కారుపై కంపెనీ రూ. 1.07 లక్షల వరకు డిస్కౌంట్ ప్రయోజనాలు కల్పిస్తోంది. ప్రస్తుతం ఈ కారు ఎక్స్ షోరూమ్ ధర రూ. 12.38 లక్షల నుంచి మొదలవుతోంది. హైబ్రిడ్ మోడల్ ప్రీమియం సెడాన్ ధర రూ. 20.85 లక్షలు (ఎక్స్ షోరూమ్ ధర) ఉండగా దీనిపై రూ.65 వేల వరకు తగ్గింపు ప్రయోజనాలు ప్రకటించింది.

  ఇక హోండా అమేజ్ కారు 3వ జనరేషన్ మోడల్‌పై ప్రత్యేక డిస్కౌంట్‌తో పాటుగా ప్రస్తుత హోండా కస్టమర్లకు లాయల్టీ ప్రయోజనాలు, అదనపు డీల్సీ కల్పిస్తోంది. హోండా అమేజ్ కారు ప్రారంభ ధర ప్రస్తుతం రూ. 8.09 లక్షలు ఎక్స్ షోరూమ్ ధర కలిగి ఉంది. హోండా ఎలివేట్ అపెక్స్ ఎడిషన్ కారుపై సైతం డిస్కౌంట్ ప్రయోజనాలు కల్పిస్తోంది. ఈ కారు ధర ప్రస్తుతం రూ. 12.71 లక్షలు (ఎక్స్ షోరూమ్) గా ఉండగా ఈ కారును ఆఫర్ సమయంలో రూ. 12.39 లక్షలకే విక్రయిస్తున్నట్లు కంపెనీ తెలిపింది. అంటే రూ. 32 వేల వరకు తగ్గింపు ప్రయోజనాలు ఈ కారుపై పొందవచ్చు.

దేశీయ మార్కెట్లో ప్రయాణికుల వాహనాలు (కార్లు, వ్యాన్లు, ఎస్‌యూవీ) విక్రయాలు ఈ ఏడాది మే నెలలో తగ్గినట్లు తెలిపింది. మే నెలలో మొత్తం 3,44,656 యూనిట్లు విక్రయించినట్లు భారత వాహన తయారీదార్ల సమాఖ్య సిమామ్ గణాంకాలు వెల్లడించింది. 2024 మే నెలలో మొత్తం 3,47,492 వాహనాలతో పోలిస్తే ఈసారి 0.8 శాతం మేర తగ్గినట్లు తెలిపింది. అయితే ఇప్పటి వరకు మేలో విక్రయమైన కార్ల సంఖ్య ఇది రెండో అత్యధికమని పేర్కొంది. కార్ల విక్రయాల్లో మారుతీ సుజుకీ దేశీయంగా 1,44,002 నుంచి 1,35,962కు తగ్గింది. హ్యుందాయ్ మోటార్స్ విక్రయాలు 43,861కి పరిమితమయ్యాయి.మహీంద్రా విక్రయాలు 52,431కి పెరిగాయి.