ఎయిర్ ఇండియా విమానంలో ప్రయాణికులు ఒక్కసారిగా ఉలిక్కిపడ్డారు

ఎయిర్ ఇండియా విమానంలో ప్రయాణికులు ఒక్కసారిగా ఉలిక్కిపడ్డారు. ఇంగ్లాండ్‌లోని బర్మింగ్‌హామ్ నుంచి ఢిల్లీకి బయలుదేరిన ఎయిర్ ఇండియా విమానం AI114కు బాంబు బెదిరింపు రావడంతో తీవ్ర కలకలం రేగింది. దీంతో అప్రమత్తమైన అధికారులు విమానాన్ని సౌదీ అరేబియా రాజధాని రియాద్‌కు మళ్లించారు. ఈ ఘటన జూన్ 21న  చోటుచేసుకోగా, ఆదివారం ఎయిర్ ఇండియా ప్రతినిధి ఈ విషయాన్ని ఏఎన్ఐ వార్తా సంస్థకు ధృవీకరించారు.షెడ్యూల్ ప్రకారం బర్మింగ్‌హామ్ నుంచి ఢిల్లీకి ప్రయాణిస్తున్న AI114 విమానానికి మార్గమధ్యంలో బాంబు బెదిరింపు అందినట్లు ఎయిర్ ఇండియా ప్రతినిధి తెలిపారు. ప్రయాణికుల భద్రత దృష్ట్యా విమానాన్ని తక్షణమే రియాద్ అంతర్జాతీయ విమానాశ్రయానికి మళ్లించినట్లు ఆయన పేర్కొన్నారు. అక్కడ విమానం సురక్షితంగా ల్యాండ్ అయిందని, అనంతరం ప్రొటోకాల్ ప్రకారం క్షుణ్ణంగా భద్రతా తనిఖీలు పూర్తి చేశామని వివరించారు. ఈ ఘటనతో ప్రయాణికులు, సిబ్బంది సురక్షితంగా ఉన్నారని తెలియడంతో అందరూ ఊపిరి పీల్చుకున్నారు.ఇటీవలి కాలంలో విమానయాన రంగంలో పలు అంతరాయాలు చోటుచేసుకుంటున్నాయి. శుక్రవారం నాడు ఇండిగోకు చెందిన ఓ విమానంలో సాంకేతిక లోపం తలెత్తడంతో ప్రయాణాన్ని రద్దు చేసినట్లు ఏఎన్ఐ వర్గాలు ఆదివారం తెలిపాయి. విమానం టేకాఫ్ కోసం సిద్ధమవుతుండగా సమస్యను గుర్తించి, ప్రయాణికులను సురక్షితంగా దించేశారు.అంతేకాకుండా, శనివారం ఢిల్లీ నుంచి పాట్నా వెళ్లాల్సిన ఎయిర్ ఇండియా ఎక్స్‌ప్రెస్ విమానం వాతావరణం అనుకూలించకపోవడంతో వారణాసికి మళ్లించబడింది. అయితే, ఆ తర్వాత అది సురక్షితంగా పాట్నా చేరుకుందని అధికారులు తెలిపారు. మరోవైపు, శుక్రవారం గౌహతి నుంచి చెన్నై వెళుతున్న 168 మంది ప్రయాణికులతో కూడిన ఇండిగో విమానం ఇంధనం కొరత కారణంగా బెంగళూరులోని కెంపెగౌడ అంతర్జాతీయ విమానాశ్రయంలో అత్యవసరంగా ల్యాండ్ అయింది. తొలుత చెన్నైలో ల్యాండింగ్ కోసం ప్రయత్నించినప్పటికీ, పరిస్థితి అనుకూలించకపోవడంతో పైలట్ 'మేడే' కాల్ చేసి, విమానాన్ని బెంగళూరుకు మళ్లించినట్లు సమాచారం