స్కూటర్ డిక్కీలో సెల్‌ఫోన్ పెడుతున్నారా.. బీకేర్ ఫుల్

నేరగాళ్లు రూటు మారుస్తున్నారు. రోజురోజుకూ కొత్త తరహా మోసాలకు, నేరాలకు పాల్పడుతున్నారు. ఒకప్పుడు దారి కాచి దోపిడీలకు పాల్పడేవారు.. ఆ తర్వాత రాత్రి వేళ శివారు ప్రాంతాల్లోని ఇళ్లను టార్గెట్ చేసుకుని దొంగతనాలు, చోరీలకు పాల్పడ్డారు. ఇప్పుడు ఏకంగా పట్టపగలే చోరీలకు తెగిస్తున్నారు. తాజాగా విశాఖపట్నంలో కొత్త తరహాలో దొంగతనాలకు పాల్పడుతున్న ముఠాను గాజువాక పోలీసులు అరెస్ట్ చేశారు. సాధారణంగా మనం స్కూటర్లలో వెళ్లిన సమయంలో విలువైన వస్తువులు అంటే సెల్ ఫోన్, ఏటీఎం కార్డులు, ఇతరత్రా వస్తువులు ఏవైనా ఉంటే స్కూటర్ డిక్కీలలో భద్రపరుస్తుంటాం. ఎందుకంటే కిందపడతాయనే భయం ఉండదనే కారణంతో అలా చేస్తుంటాం.

కానీ అలాంటి విషయాలను అవకాశాలుగా మలుచుకుని దొంగతనాలకు పాల్పడిందో ముఠా. ఈ ముఠాను గాజువాక పోలీసులు శనివారం అరెస్ట్ చేశారు. ద్విచక్రవాహనాల డిక్కీలలో నుంచి విలువైన వస్తువులు చోరీ చేస్తున్న ముగ్గురు అంతర్రాష్ట్ర దొంగలను గాజువాక పోలీసులు అరెస్టు చేశారు. పోలీసులు చెప్తున్న వివరాల ప్రకారం.. జూన్ 14 షీలానగర్‌లో ప్రైవేటు స్కూల్‌ టీచర్‌గా పనిచేస్తున్న లలిత అనే మహిళకు సంబంధించిన వస్తువులు చోరీకి గురయ్యాయి. లలిత తన స్కూటర్ డిక్కీలో భద్రపరిచిన విలువైన వస్తువులను కొంతమంది దొంగతనం చేశారు. బాధితురాలు ఈ విషయమై గాజువాక పోలీసులకు ఫిర్యాదు చేశారు.

 బాధితురాలి ఫిర్యాదు ఆధారంగా కేసు నమోదు చేసిన పోలీసులు.. విచారణ చేపట్టారు. పోలీసుల విచారణలో ఈ చోరీ అంతర్రాష్ట్ర దొంగలైన యూపీకి చెందిన ప్రిన్కుమార్, క్రిషన్, ధర్మేంద్రకుమార్‌ల పనిగా పోలీసులు గుర్తించారు. లలిత స్కూటర్ డిక్కీలో ఉన్న సెల్‌ఫోన్, డెబిట్‌ కార్డ్‌, సిమ్ కార్డులను చోరీ చేసి.. ఆమె బ్యాంకు ఖాతా నుంచి నగదు కాజేసినట్లు పోలీసులు గుర్తించారు. బాధితురాలి బ్యాంక్ ఖాతా నుంచి వివిధ దఫాలుగా రూ.43000 కాజేయడంతో పోలీసులు నిఘాపెంచారు.

ఈ క్రమంలోనే ముగ్గురు నిందితులను అదుపులోకి తీసుకున్నారు. విచారణలో డిక్కీ దొంగతనాల ద్వారా వీరు గత రెండు నెలల్లో రూ.6.28 లక్షలు కాజేసినట్లు గుర్తించారు. నిందితుల నుంచి 5 లక్షల రూపాయల నగదుతో పాటుగా సెల్ ఫోన్లు, సిమ్ కార్డులు, గిఫ్టు ఓచర్లు స్వాధీనం చేసుకున్నారు. నిందితులను కోర్టు ముందు హాజరుపరిచి.. రిమాండ్‌కు తరలించారు.