బ్లాక్ బాక్స్‌ డేటాపై రామ్మోహన్ నాయుడు కీలక వ్యాఖ్యలు

ఈనెల 12వ తేదీన అహ్మదాబాద్‌ నుంచి లండన్ బయల్దేరిన విమానం.. గాల్లోకి ఎగిరిన కొద్ది సెకన్లకే కుప్పకూలిపోయిన సంఘటన.. యావత్ దేశాన్ని తీవ్ర విషాదంలో ముంచెత్తింది. ఇలా ఎయిరిండియా విమానం కూలిపోవడం వెనక కారణాలేంటి అని తెలుసుకునేందుకు.. కేంద్ర ప్రభుత్వం ఇప్పటికే దర్యాప్తు సంస్థలను రంగంలోకి దించింది. దీంతో ఈ విమాన ప్రమాదంపై అధికారులు ఉన్నత స్థాయి దర్యాప్తును కొనసాగిస్తున్నారు. ఈ క్రమంలోనే ఈ దుర్ఘటనకు కొన్ని క్షణాల ముందు ఆ విమానంలో ఏం జరిగిందో తెలుసుకోనేందుకు.. బ్లాక్‌ బాక్స్‌ నుంచి సమాచారం సేకరించడం కీలకంగా మారింది. ఘటనాస్థలిలోనే బ్లాక్ బాక్స్‌ను అధికారులు స్వాధీనం చేసుకోగా.. అందులో నుంచి సమాచారం బయటికి తీసేందుకు ప్రయత్నాలు కొనసాగుతున్నాయి.

ఈ నేపథ్యంలోనే ప్రమాదంలో తీవ్రంగా దెబ్బతిన్న బ్లాక్‌ బాక్స్‌ నుంచి సమాచారాన్ని వెలికి తీసేందుకు దాన్ని విదేశాలకు పంపించారంటూ జరుగుతున్న ప్రచారాన్ని కేంద్ర పౌర విమానయానశాఖ మంత్రి కింజరపు రామ్మోహన్‌ నాయుడు కొట్టిపారేశారు. బ్లాక్ బాక్స్‌పై వస్తున్న వార్తలు మొత్తం అబద్ధమంటూ ఖండించారు. ఫిక్కీ, కేంద్ర విమానయాన మంత్రిత్వశాఖ సంయుక్తంగా మహారాష్ట్రలోని పుణెలో నిర్వహించిన హెలికాఫ్టర్స్‌ అండ్‌ స్మాల్‌ ఎయిర్‌క్రాఫ్ట్స్‌ సమ్మిట్‌ 2025 సందర్భంగా రామ్మోహన్ నాయుడు మీడియాతో మాట్లాడారు. ఈ సందర్భంగా బ్లాక్‌ బాక్స్‌ను విదేశాలకు పంపిస్తున్నారా అని అడిగిన ప్రశ్నకు.. అవన్నీ ఊహాగానాలేనని స్పష్టం చేశారు. ఎయిరిండియా విమాన ప్రమాదంలో దొరికిన బ్లాక్‌ బాక్స్‌ భారత్‌లోనే ఉందని స్పష్టం చేశారు.

ఈ బ్లాక్ బాక్స్‌ను ప్రస్తుతం ఎయిర్‌క్రాఫ్ట్‌ యాక్సిడెంట్‌ ఇన్వెస్టిగేషన్ బ్యూరో పరిశీలిస్తోందని రామ్మోహన్ నాయుడు తేల్చి చెప్పారు. అయితే ఆ బ్లాక్ బాక్స్‌లోని సమాచారన్ని ఎప్పటివరకు సేకరిస్తారు అని.. అడిగిన ప్రశ్నకు స్పందించిన కేంద్రమంత్రి.. ఇది టెక్నాలజీతో కూడిన వ్యవహారమని.. ఏఏఐబీ దర్యాప్తు చేపట్టి మొత్తం ప్రక్రియను పరిశీలించాల్సిన అవసరం ఉందని వెల్లడించారు. అహ్మదాబాద్‌ నుంచి లండన్‌ ఎయిర్‌పోర్టు నుంచి టేకాఫ్‌ అయిన విమానం గాల్లోకి ఎగిరిన కొద్దిసేపటికే ఓ మెడికల్ కాలేజీపై కూలిన ఘటనలో విమానంలోని 241 మంది ప్రయాణికులు సహా 272 మంది ప్రాణాలు కోల్పోయారు. ఇక విమానంలో ప్రయాణిస్తున్న వారిలో ఒకే ఒక్కరు ప్రాణాలతో బయటికి వచ్చారు.