ఎయిరిండియా ప్రమాదం ఎఫెక్ట్.. విమానాలు, రన్‌వే‌ల్లో లోపాలు గుర్తించిన డీజీసీఏ

అహ్మదాబాద్ ఎయిరిండియా విమాన ప్రమాదం తర్వాత.. విమానాల మెయింటెనెన్స్, ప్రయాణికుల భద్రతపై తీవ్ర ఆందోళనలు నెలకొన్న వేళ.. డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ).. కీలక నిర్ణయం తీసుకుంది. దేశంలో ఉన్న ప్రముఖ ఎయిర్‌పోర్టుల్లో విస్తృతంగా తనిఖీలు నిర్వహించింది. ఈ తనిఖీల్లో డీజీసీఏ అధికారులకు విస్తుపోయే వాస్తవాలు వెల్లడయ్యాయి. భారత విమానయాన రంగంలో ఉన్న లోపాలను ఈ తనిఖీల్లో డీజీసీఏ వెలికి తీసింది. అరిగిపోయిన టైర్లు, పాత సాఫ్ట్‌వేర్‌, రన్‌వేలు, విమానాల్లో ఎన్నో లోపాలు ఉన్నాయని డీజీసీఏ గుర్తించింది. ఎయిరిండియా విమాన ప్రమాదం నేపథ్యంలో అలర్ట్ అయిన డీజీసీఏ జాయింట్ డైరెక్టర్ జనరల్ ఆధ్వర్యంలో రెండు టీమ్‌లు.. ఢిల్లీ, ముంబైతోపాటు దేశంలోని పలు కీలక విమానాశ్రయాలను పరిశీలించింది.

ఈ తనిఖీల్లో విమానయాన వ్యవస్థల్లో అనేక లోపాలున్నాయని డీజీసీఏ అధికారుల బృందం గుర్తించింది. విమానాలు, రన్‌వేల్లో కూడా లోపాలు ఉన్నాయని ఒక ప్రకటనలో డీజీసీఏ తెలిపింది. ఫ్లైట్‌ ఆపరేషన్స్‌, కమ్యూనికేషన్‌, నేవిగేషన్‌ సిస్టమ్స్‌, ర్యాంప్‌ సేఫ్టీ, ఎయిర్‌ ట్రాఫిక్‌ కంట్రోల్‌, ప్రీ ఫ్లైట్‌ మెడికల్‌ ఎవాల్యూయేషన్స్‌ సహా పలు అంశాలను డీజీసీఏ బృందాలు క్షుణ్ణంగా పరిశీలించాయి. ఈ సందర్భంగా డీజీసీఏ అధికారులు షాక్ అయ్యే సంఘటనలు కనిపించాయి.

ఒక ఎయిర్‌పోర్ట్‌లో అరిగిపోయిన టైర్ల కారణంగా.. ఒక డొమెస్టిక్ ఫ్లైట్ నిలిచిపోయినట్లు డీజీసీఏ అధికారుల తనిఖీల్లో వెల్లడైంది. విమానాల్లో తలెత్తిన లోపాలు చాలాసార్లు మళ్లీ మళ్లీ పునరావృత అయిన కేసులు వెలుగుచూశాయని డీజీసీఏ అధికారులు తెలిపారు. ఒక ఎయిర్‌పోర్టులో విమానం కాన్ఫిగరేషన్‌తో సిమ్యులేటర్ సరిపోలడం లేదని.. అంతేకాకుండా ప్రస్తుత వెర్షన్‌కు సాఫ్ట్‌వేర్ అప్‌డేట్‌ లేదని వెల్లడైనట్లు పేర్కొన్నారు. విమానయాన వ్యవస్థలో సరైన పర్యవేక్షణ, సమస్యలను పరిష్కారంలో చూపిస్తున్న నిర్లక్ష్యం కారణంగా లోపాలు ఉన్నాయని డీజీసీఏ గుర్తించింది.

అయితే ఏ ఏ ఎయిర్‌పోర్టులు, విమానయాన సంస్థల్లో లోపాలు వెలుగుచూశాయి అనే విషయాన్ని మాత్రం డీజీసీఏ బయటికి వెల్లడించలేదు. ఈ లోపాలకు సంబంధించిన ఇతర వివరాలను కూడా బయటకు చెప్పకపోవడం గమనార్హం. అయితే ఈ లోపాలను గుర్తించిన తర్వాత.. దిద్దుబాటు చర్యలు తీసుకుని వాటిని సరిచేయాలని సదరు ఎయిర్‌లైన్స్ సంస్థలకు సమాచారం ఇచ్చినట్లు డీజీసీఐ తెలిపింది.