మా ఆయన వస్తున్నాడు చూస్కో.. ప్రియుడితో కలిసి భార్య దారుణం

ఏపీలో మరో దారుణ ఘటన చోటుచేసుకుంది. గద్వాల ప్రైవేట్ సర్వేయర్ తేజేశ్వర్ హత్య కేసు ఘటన మరువకముందే అలాంటి ఘటనే అనంతపురం జిల్లాలో చోటుచేసుకుంది. తనకంటే మూడేళ్లు చిన్నవాడైన వ్యక్తితో వివాహేతర సంబంధం పెట్టుకున్న ఓ మహిళ.. ప్రియుడితో కలిసి భర్తను చంపించింది. అనంతపురం రూరల్ మండలం అక్కంపల్లి-రాచానపల్లి రోడ్డులో ఈ ఘటన చోటుచేసుకుంది. ఈ ఘటనకు సంబంధించి పోలీసులు వెల్లడించిన వివరాల ప్రకారం.. సురేష్‌బాబు (43) అనే వ్యక్తి అక్కంపల్లిలో చిన్న హోటల్‌ నిర్వహిస్తున్నారు. సురేష్ బాబు భార్య అనిత (37) కొన్ని రోజుల క్రితం వరకూ ఓ హోటల్‌లో పనిచేసేది. ఈ క్రమంలోనే రెండు నెలల కిందట బాబా ఫక్రుద్దీన్‌ (34) అనే వ్యక్తి పరిచయమయ్యాడు.

బాబా ఫకృద్ధీన్ ఊరూరు తిరుగుతూ పండ్లు అమ్ముతుంటాడు. ఈ క్రమంలోనే అనితతో పరిచయం ఏర్పడగా.. అది కాస్తా వివాహేతర సంబంధానికి దారితీసింది. అయితే సురేష్‌బాబుకు ఎందుకో భార్యపై అనుమానం కలిగింది. దీంతో తాగొచ్చి భార్యను వేధించడం మొదలుపెట్టాడు. భర్త వేధింపులను అనిత.. ప్రియుడు బాబా ఫక్రుద్దీన్‌కు తెలియజేసింది. భర్తను అడ్డుతొలగించుకుంటే.. మనకు అడ్డే ఉండదని చెప్పింది. ఇద్దరం సంతోషంగా ఉండొచ్చని నూరిపోసింది. తన భర్త రోజూ రాత్రి హోటల్ మూసివేసిన తర్వాత ద్విచక్ర వాహనం మీద ఇంటికొస్తారని.. ఆ సమయంలోనే ప్లాన్ చేయాలని చెప్పింది.

మరోవైపు పండ్ల వ్యాపారంలో భాగంగా ఫక్రుద్దీన్ మంగళవారం మార్తాడుకు వెళ్లాడు. ఈ సమయంలో ఫక్రుద్దీన్‌కు ఫోన్‌ చేసిన అనిత.. తన భర్తను ఎలాగైనా ఈరోజే చంపాలంటూ ప్రియుడికి నూరిపోసింది. దీంతో రాత్రి 11 గంటలకు బైక్ మీద ఇంటికి బయల్దేరిన సురేష్‌బాబుపై ఫక్రుద్దీన్‌ దాడి చేశాడు. బైక్ మీద నుంచి కిందపడిన సురేష్ బాబును స్క్రూడ్రైవర్‌తో పొడిచి, బండరాయితో కొట్టి దారుణంగా హత్య చేశాడు. అనంతరం అక్కడి నుంచి పరారయ్యాడు. ఈ హత్య స్థానికంగా సంచలనం రేపింది.

యూరిక్ యాసిడ్ పెరిగితే శరీరంలో కొన్ని లక్షణాలు కనిపిస్తాయ్, ఏ మాత్రం నిర్లక్ష్యం చేసినా కిడ్నీలు దెబ్బతింటాయ్

దీంతో కేసు నమోదు చేసుకున్న పోలీసులు దర్యాప్తు మొదలుపెట్టారు. ప్రత్యేక పోలీస్ బృందాల సాయంతో దర్యాప్తు చేపట్టి.. ఆరు గంటల్లోనే సురేష్‌బాబు హత్య కేసును ఛేదించారు. సురేష్‌బాబు హత్యకు.. వివాహేతర సంబంధమే కారణమని గుర్తించారు. అనితను, ఆమె ప్రియుడు ఫక్రుద్దీన్‌ను అరెస్ట్ చేశారు.