"అమెరికా దాటి వెళ్లకండి": వీసా జాప్యం నేపథ్యంలో ఉద్యోగులకు గూగుల్ హెచ్చరిక

టెక్ దిగ్గజం గూగుల్ తన విదేశీ ఉద్యోగులకు ఊహించని షాక్ ఇచ్చింది. అమెరికా వీసాపై పనిచేస్తున్న సిబ్బంది ప్రస్తుతానికి అంతర్జాతీయ ప్రయాణాలు చేయవద్దని కంపెనీ గట్టిగా హెచ్చరించింది. అమెరికా ఎంబసీల్లో వీసా ప్రాసెసింగ్‌లో విపరీతమైన జాప్యం జరుగుతున్న నేపథ్యంలో, ఉద్యోగులు విదేశాలకు వెళ్లి అక్కడ చిక్కుకుపోయే ప్రమాదం ఉందని కంపెనీ ఆందోళన వ్యక్తం చేసింది. ఈ మేరకు గూగుల్ తన అంతర్గత విభాగాలకు ఇమెయిల్‌ను పంపింది.

అసలు కారణం ఏంటంటే..?

సాధారణంగా అమెరికాలో హెచ్-1బి, ఎల్-1 వంటి వీసాలపై పనిచేసే వేలాది మంది భారతీయులతో పాటు ఇతర దేశస్థులు పండుగ సెలవులకు లేదా వ్యక్తిగత పనులపై తమ స్వదేశాలకు వెళ్తుంటారు. అయితే ప్రస్తుతం అమెరికా కాన్సులేట్లు, ఎంబసీల్లో వీసా అపాయింట్‌మెంట్లు దొరకడం గగనంగా మారింది. ఇప్పటికే ఉన్న బ్యాక్‌లాగ్ కారణంగా వీసా స్టాంపింగ్, రెన్యువల్ ప్రక్రియ వారాల తరబడి ఆలస్యమవుతోంది.

దీనివల్ల విదేశాలకు వెళ్లిన ఉద్యోగులు తిరిగి అమెరికాలోకి ప్రవేశించడానికి అవసరమైన డాక్యుమెంట్లు సకాలంలో రాకపోవచ్చని గూగుల్ భావిస్తోంది. "మీరు ఒకసారి అమెరికా సరిహద్దు దాటి బయటకు వెళ్తే, తిరిగి ఎప్పుడు లోపలికి వస్తారో తెలియని పరిస్థితి నెలకొంది. వీసా జాప్యం వల్ల మీరు విదేశాల్లోనే నిలిచిపోయే అవకాశం ఉంది" అని గూగుల్ తన ఉద్యోగులను అప్రమత్తం చేసింది.

భారతీయ ఐటీ ఉద్యోగులపై ప్రభావమెంతా?

గూగుల్ జారీ చేసిన ఈ ఆదేశాలు ముఖ్యంగా భారతీయ సాఫ్ట్‌వేర్ ఇంజనీర్లపై తీవ్ర ప్రభావం చూపనున్నాయి. గూగుల్‌లో పనిచేసే అత్యధికులు భారతీయులే కావడంతో, సెలవుల్లో ఇంటికి రావాలనుకున్న వారికి ఇది ఒక పెద్ద అడ్డంకిగా మారింది. వీసా చిక్కుల వల్ల కంపెనీ ప్రాజెక్టులకు అంతరాయం కలగడమే కాకుండా, ఉద్యోగుల కెరీర్‌పై కూడా ప్రభావం పడే అవకాశం ఉంది. అమెరికాలోని ప్రస్తుత రాజకీయ పరిణామాలు, ఇమ్మిగ్రేషన్ నిబంధనల మార్పుల నేపథ్యంలో గూగుల్ హెచ్చరిక ప్రాధాన్యత సంతరించుకుంది.

అత్యంత అనివార్యమైన పరిస్థితుల్లో తప్ప విదేశాలకు వెళ్లొద్దని గూగుల్ కోరింది. ఒకవేళ విదేశాలకు వెళ్లాల్సి వస్తే.. ముందుగానే మేనేజర్లకు, ఇమ్మిగ్రేషన్ టీమ్‌కు సమాచారం అందించాలని, వీసా హోదా స్థిరంగా ఉండే వరకు అమెరికాలోనే ఉండటం సురక్షితమని పేర్కొంది. ప్రస్తుతానికి గూగుల్ మాత్రమే కాకుండా ఇతర టెక్ కంపెనీలు కూడా తమ ఉద్యోగులకు ఇలాంటి మౌఖిక ఆదేశాలు జారీ చేస్తున్నట్లు సమాచారం. అమెరికా వీసా నిబంధనలు క్లిష్టంగా మారుతున్న తరుణంలో.. ఐటీ నిపుణులు తమ ప్రయాణాలను వాయిదా వేసుకోవాల్సిన పరిస్థితి ఏర్పడింది.