ఏపీ టూరిజం బ్రాండ్ అంబాసిడర్గా బాబా రాందేవ్

రాష్ట్రంలోపర్యాటక రంగం అభివృద్ధి కోసం ఆంధ్రప్రదేశ్ ప్రభుత్వం అనేక చర్యలు చేపడుతోంది. సర్క్యూట్ ఎకానమీ ద్వారా రాష్ట్రంలో పర్యాటక రంగాన్ని ప్రోత్సహించాలని భావిస్తోంది. అలాగేహోమ్‌స్టేలు వంటి వినూత్న విధానాల ద్వారాటూరిజం అభివృద్ధి చేసే పనిలో ఉంది. పర్యాటక ప్రాంతాలకు మెరుగైన రవాణా సౌకర్యాలు కల్పించి సందర్శకులకు ఆకర్షించాలనే ఉద్దేశంతో.. ఎయిర్‌డ్రోమ్‌లు ఏర్పాటుచేసే ఆలోచన కూడా ఏపీ ప్రభుత్వం చేస్తోంది. తాజాగా ఏపీ టూరిజం కోసం బ్రాండ్ అంబాసిడర్ నియమించాలని ఏపీ ప్రభుత్వం భావిస్తోంది. ఈ క్రమంలోనే ఏపీ టూరిజం బ్రాండ్ అంబాసిడర్‌గా రామ్‌దేవ్ బాబా పేరు తెరపైకి వచ్చింది. ఏపీ ముఖ్యమంత్రి నారా చంద్రబాబు నాయుడు స్వయంగా ఈ వ్యాఖ్యలు చేయటం విశేషం.

విజయవాడలో శుక్రవారం టూరిజం కాంక్లేవ్ జరిగింది. ఈ కార్యక్రమంలో ముఖ్యమంత్రి నారా చంద్రబాబు నాయుడు పాల్గొన్నారు. ఈ సందర్భంగా మాట్లాడిన సీఎం చంద్రబాబు.. బాబా రామ్‌దేవ్ ‌ సమాజానికి ఎంతో సేవ చేస్తున్నారని కొనియాడారు. ఏపీ పర్యాటక శాఖకు సలహాదారుగా ఉండాలంటూ బాబా రామ్‌దేవ్‌ను చంద్రబాబు కోరారు. అలాగే ఏపీలో వెల్‌నెస్ సెంటర్లు ఏర్పాటు చేయాలని సీఎం చంద్రబాబు బాబా రాందేవ్‌ను కోరారు. సీఎం చంద్రబాబు కోరిక నేపథ్యంలో ఏపీ టూరిజం బ్రాండ్ అంబాసిడర్‌గా ఉండటానికి బాబా రామ్‌దేవ్ సంసిద్ధత వ్యక్తం చేశారు. ఏపీలో ఎన్నో సుందరమైన ప్రాంతాలు ఉన్నాయని.. అయితే ఉత్తర భారతీయులకు వీటిపై అవగాహన లేదన్నారు.

ఏపీలోని పర్యాటక ప్రాంతాల గురించి ఉత్తర భారతదేశంలోని వారికి తెలియజేయాలని.. అలాగే పర్యాటక ప్రాంతాలలో ఆయుర్వేద, నేచురోపతి, యోగా వంటి అంశాలు అవసరమని అన్నారు. మరోవైపు అన్నమయ్య జిల్లాలోని హార్సిలీహిల్స్‌లో ఆధ్యాత్మిక, సాంస్కృతిక వెల్‌నెస్‌ కేంద్రాన్ని నిర్మించనున్నట్లు రాందేవ్ బాబా తెలిపారు.

సీఎం చంద్రబాబు విజ్ఞప్తి మేరకు అంతర్జాతీయ ప్రమాణాలతో హార్సిలీ‌హిల్స్‌లో వెల్‌నెస్‌ కేంద్రాన్ని ఏర్పాటు చేయనున్నట్లు తెలిపారు. అలాగే విజయనగరం జిల్లా కొత్తవలసలో మెసర్స్‌ పతంజలి ఆయుర్వేద్ లిమిటెడ్ పేరుతో రూ.500 కోట్లతో భారీ ప్రాజెక్టును ఏర్పాటు చేస్తామని వెల్లడించారు. ఈ భూములను గురువారం ఆయన పరిశీలించిన సంగతి తెలిసిందే.