'షావోమీ' ఎలక్ట్రిక్ కారు సంచలనం.. గంటలో 3 లక్షల ఆర్డర్లు.. టెస్లాకు గట్టి షాక్

చైనాకు చెందిన ఎలక్ట్రానిక్ ఉత్పత్తుల దిగ్గజం షావోమీ సంచలనం సృష్టించింది. షావోమీ విడుదల చేసిన కొత్త ఎలక్ట్రిక్ కారు YU7 మొదటి గంటలోనే దాదాపు 3 లక్షల ఆర్డర్లు పొందింది. దీనితో షావోమీ షేర్లు ఒక్కసారిగా పెరిగిపోయాయి. టెస్లాకు గట్టి పోటీ ఎదురయ్యేలా ఉంది. షావోమీ ఎలక్ట్రిక్ కార్ల రంగంలోకి అడుగుపెట్టి టెస్లాకు సవాల్ విసిరింది. ప్రముఖ మొబైల్స్, ఎలక్ట్రానిక్ గాడ్జెట్స్ తయారు చేసే షావోమీ గత సంవత్సరం ఎలక్ట్రిక్ కార్ల తయారీలోకి వచ్చింది. గత ఏడాది మార్చిలో SU7 పేరుతో మొదటి ఎలక్ట్రిక్ కారును విడుదల చేసింది. ఇప్పుడు YU7 పేరుతో మరో కొత్త కారును విడుదల చేసింది. ఈ కారుకు వినియోగదారుల నుంచి మంచి స్పందన లభిస్తోంది.

YU7 కారు ప్రారంభ ధర 2,53,500 యువాన్లు (సుమారు 35,000 డాలర్లు). మన కరెన్సీలో రూ. 30 లక్షలకుపైగానే ఉంటుంది. ఈ కారు మూడు వేర్వేరు మోడళ్లలో లభిస్తుంది. టెస్లా మోడల్ వైతో పోలిస్తే, షావోమీ YU7 ధర దాదాపు 4 శాతం తక్కువ. వైయూ7 టాప్ మోడల్‌లో 96.3 kWh బ్యాటరీ ఉంది. ఒక్కసారి ఛార్జ్ చేస్తే 835 కిలోమీటర్ల దూరం వెళ్లొచ్చు. టెస్లా మోడల్ వైలో 78.4 kWh బ్యాటరీ మాత్రమే ఉంది. ఇది ఒక్కసారి ఛార్జ్ చేస్తే 719 కిలోమీటర్ల దూరం మాత్రమే వెళ్తుంది. షావోమీ కారు ఎక్కువ దూరం వెళ్లడం.. వినియోగదారులను ఆకర్షిస్తోంది.

చైనా.. టెస్లాకు అతిపెద్ద మార్కెట్లలో ఒకటి. 2025 మొదటి త్రైమాసిక ఫలితాల ప్రకారం, టెస్లాకు వచ్చే ఆదాయంలో 20 శాతం చైనా నుంచే వస్తోంది. కానీ, చైనాలో టెస్లా వాటా క్రమంగా తగ్గుతోంది. 2020లో టెస్లా వాటా 15 శాతంగా ఉండగా, 2024 నాటికి 10 శాతానికి పడిపోయింది. చైనా కంపెనీల నుంచి టెస్లాకు గట్టి పోటీ ఎదురవుతోంది.

పోటీని తట్టుకోవడానికి టెస్లా ఎప్పటికప్పుడు తన కార్ల ధరలను తగ్గిస్తోంది. షావోమీ కొత్త కారు YU7 విడుదల కావడంతో, టెస్లా మరోసారి ధరలు తగ్గించక తప్పదని నిపుణులు అంటున్నారు. అంతేకాకుండా, "ఫుల్ సెల్ఫ్ డ్రైవింగ్ " డ్రైవర్ అసిస్టెన్స్ సాఫ్ట్‌వేర్‌ను ఉచితంగా ఇవ్వడం, మంచి ఫైనాన్స్ ఆప్షన్లు ఇవ్వడం వంటి చర్యలు తీసుకోవాలని సూచిస్తున్నారు. అంటే డ్రైవర్ లేకుండానే కారు నడిపే ఫీచర్లను ఉచితంగా ఇవ్వాలన్నమాట. చైనా మార్కెట్‌లో షావోమీ వంటి స్థానిక కంపెనీలు దూకుడుగా ఉండటం టెస్లాకు భవిష్యత్తులో మరిన్ని సమస్యలు తెస్తుందని మార్కెట్ నిపుణులు అంచనా వేస్తున్నారు. షావోమీ తన కార్లతో టెస్లాకు గట్టి పోటీ ఇవ్వడానికి సిద్ధంగా ఉంది.