సుకన్య సమృద్ధి, పీపీఎఫ్ ఇన్వెస్టర్లకు మళ్లీ నిరాశే

చిన్న మొత్తాల పొదుపు పథకాల వడ్డీ రేట్లను కేంద్ర ప్రభుత్వం ఖరారు చేసింది. PPF, సుకన్య సమృద్ధి యోజన, NSC వంటి పథకాల వడ్డీ రేట్లను మార్చకుండా స్థిరంగా ఉంచింది. 2025 జులై 1 నుంచి సెప్టెంబర్ 30 వరకు పాత వడ్డీ రేట్లే కొనసాగుతాయని ఆర్థిక శాఖ తెలిపింది. ఆర్బీఐ రెపో రేటు తగ్గించినా, పొదుపుదారుల ప్రయోజనాలను కాపాడేందుకు ప్రభుత్వం ఈ నిర్ణయం తీసుకుంది. అయితే ఈ పథకాల వడ్డీ రేట్లు చాలా కాలంగా స్థిరంగానే ఉంటున్నాయి. ముఖ్యంగా ఎక్కువ డిమాండ్ ఉండే.. ఆడపిల్లల కోసం ప్రత్యేక పథకం సుకన్య సమృద్ధి యోజన, పీపీఎఫ్ వడ్డీ రేట్లు పెంచకపోవడం చాలా మంది పొదుపుదారులను నిరాశకు గురిచేస్తుందని చెప్పొచ్చు.

RBI రెపో రేటును తగ్గించినా, ప్రభుత్వం వడ్డీ రేట్లను స్థిరంగా ఉంచడానికి కారణం ఉంది. చాలా మంది పొదుపుదారులు ఈ పథకాలపై ఆధారపడతారు. వడ్డీ రేట్లు తగ్గిస్తే వారి ఆదాయంపై ప్రభావం పడుతుంది. అందుకే ప్రభుత్వం ఈ నిర్ణయం తీసుకుంది.

వివిధ పథకాలపై వడ్డీ రేట్లు ఎలా ఉన్నాయో ఇప్పుడు చూద్దాం. పోస్టాఫీసు పొదుపు డిపాజిట్లపై వడ్డీ రేటు 4 శాతంగానే ఉంటుంది. ఒక సంవత్సరం కాలపరిమితి టైమ్ డిపాజిట్‌కు 6.9 శాతం వడ్డీ లభిస్తుంది. రెండేళ్ల టైమ్ డిపాజిట్‌కు 7% వడ్డీ వస్తుంది. మూడేళ్ల డిపాజిట్లపై 7.1% వడ్డీ రేటు ఉంటుంది. PPF పై కూడా ఇదే వడ్డీ రేటు వర్తిస్తుంది. ఐదేళ్ల టైమ్ డిపాజిట్లకు 7.5% వడ్డీ లభిస్తుంది. ఐదేళ్ల రికరింగ్ డిపాజిట్లపై 6.7% వడ్డీ కొనసాగుతుంది.

సీనియర్ సిటిజన్ సేవింగ్స్ స్కీమ్‌కు (SCSS) 8.2% వడ్డీ వస్తుంది. మంత్లీ ఇన్‌కం స్కీమ్‌పై 7.4% వడ్డీ రేటు కొనసాగుతుంది. NSC పథకానికి 7.7% వడ్డీ లభిస్తుంది. కిసాన్ వికాస్ పత్ర (KVP) పథకానికి వడ్డీ రేటు 7.5% (115 నెలలకు మెచ్యూరిటీ) కాగా, సుకన్య సమృద్ధి ఖాతాకు 8.2% వడ్డీ రేటు లభిస్తుంది.

"ఆర్థిక మంత్రిత్వ శాఖలోని ఆర్థిక వ్యవహారాల విభాగం విడుదల చేసిన నోటిఫికేషన్ ప్రకారం, వివిధ చిన్న మొత్తాల పొదుపు పథకాలకు 2025-26 ఆర్థిక సంవత్సరం తొలి త్రైమాసికానికి (ఏప్రిల్ - జూన్) నోటిఫై చేసిన వడ్డీ రేట్లే వచ్చే తర్వాతి త్రైమాసికానికి వర్తిస్తాయి" అని ప్రకటనలో పేర్కొన్నారు. అంటే ఏప్రిల్ నుంచి జూన్ వరకు ఉన్న వడ్డీ రేట్లే జులై నుంచి సెప్టెంబర్ వరకు కూడా ఉంటాయి.

వడ్డీ రేట్లు ఎందుకు మారలేదో ఇప్పుడు తెలుసుకుందాం. RBI రెపో రేటును 1 శాతం తగ్గించింది. అయినా ప్రభుత్వం వడ్డీ రేట్లను తగ్గించలేదు. దీనికి కారణం పొదుపుదారుల ప్రయోజనాలను కాపాడటం. రెపో రేటు తగ్గడం వల్ల బ్యాంకులు ఫిక్స్‌డ్ డిపాజిట్లపై వడ్డీ రేట్లను తగ్గించాయి. ప్రభుత్వం కూడా వడ్డీ రేట్లను తగ్గిస్తే, పొదుపుదారులకు నష్టం వాటిల్లుతుంది. సాధారణంగా రెపో రేటు తగ్గితే, చిన్న పొదుపు పథకాల వడ్డీ రేట్లు కూడా తగ్గుతాయి.

వడ్డీ రేట్లను ఎలా నిర్ణయిస్తారో ఇప్పుడు చూద్దాం. పోస్ట్ ఆఫీస్ పథకాల వడ్డీ రేట్లను ప్రభుత్వం ప్రతి 3 నెలలకు ఒకసారి సమీక్షిస్తుంది. శ్యామలా గోపీనాథ్ కమిటీ సిఫార్సుల ఆధారంగా ఈ వడ్డీ రేట్లను నిర్ణయిస్తారు. ఈ కమిటీ ఏం చెప్పిందంటే, చిన్న పొదుపు పథకాల వడ్డీ రేట్లను ప్రభుత్వ బాండ్ల దిగుబడుల కంటే 25 నుండి 100 బేసిస్ పాయింట్లు ఎక్కువగా ఉండేలా చూడాలి. (1 బేసిస్ పాయింట్ అంటే 0.01%). దీనివల్ల చిన్న పొదుపు పథకాలు పెట్టుబడిదారులకు ఆకర్షణీయంగా ఉంటాయి.

చివరిసారిగా వడ్డీ రేట్లు ఎప్పుడు మారాయో తెలుసా? పోస్ట్ ఆఫీస్ పథకాల వడ్డీ రేట్లను చివరిసారిగా 2023-24 ఆర్థిక సంవత్సరం నాలుగో త్రైమాసికంలో (జనవరి నుంచి మార్చి 2024 మధ్య) సవరించారు. ఆ సమయంలో, 3 సంవత్సరాల టైమ్ డిపాజిట్లు (7% నుంచి 7.1 శాతానికి), సుకన్య సమృద్ధి యోజన (8% నుంచి 8.2%కి) వడ్డీ రేట్లను ప్రభుత్వం పెంచింది. మిగిలిన పథకాల వడ్డీ రేట్లలో ఎలాంటి మార్పు చేయలేదు. ఏప్రిల్ 2024 నుంచి.. వడ్డీ రేట్లలో ఎటువంటి మార్పు లేదు.