కలెక్టర్ చేసిన పనికి శెభాష్ అనాల్సిందే

కృష్ణా జిల్లా నందివాడ మండలం పుట్టగుంటకు చెందిన సత్యనారాయణరెడ్డి అనే వ్యక్తికి ఓ కొడుకు. ఓ కూతురు. అయితే వృద్ధుడైన తండ్రి పట్ల బాధ్యతగా వ్యవహరించాల్సిన అతని కొడుకు విశ్వానాథవరప్రసాదరెడ్డి.. కర్కశంగా వ్యవహరించాడు. సత్యనారాయణరెడ్డిని విశ్వనాథవరప్రసాదరెడ్డి ఇంట్లో నుంచి గెంటేశాడు. తండ్రిపై దాడి చేయడమే కాకుండా ఇంటిలో నుంచి బయటకు గెంటేశాడు. దీంతో తన బాధను కుమార్తె ఝూన్సీలక్ష్మికి చెప్పుకున్నాడు సత్యనారాయణరెడ్డి. ఇంట్లో నుంచి గెంటేశాడంటూ కుమార్తెతో గోడు వెళ్లబోసుకున్నారు. ఆ తర్వాత దివ్యాంగురులైన కుమార్తె సాయంతోనే ఆదుకోండి సారూ అంటూ కృష్ణా జిల్లా కలెక్టరేట్ కార్యాలయానికి వచ్చారు.

శుక్రవారం రోజున కుమార్తెతో కలిసి కృష్ణా జిల్లా కలెక్టర్ ఆఫీసుకు వచ్చారు సత్యనారాయణరెడ్డి. కలెక్టర్‌ను కలిసేందుకు వచ్చిన ఆయన కలెక్టరేట్‌లో ఉన్న బెంచీపై కూర్చుని ఉన్నారు. ఓ వృద్ధుడు బెంచీపై కూర్చుని ఉన్న సంగతిని కలెక్టర్ డీకే బాలాజీ గమనించారు. వెంటనే అతణ్ని పిలిపించి విషయమేమిటని ఆరా తీశారు. దీంతో కలెక్టర్ బాలాజీ వద్ద సత్యనారాయణరెడ్డి తన గోడు వెళ్లబోసుకున్నారు. కొడుకు కొడుతున్నాడని, ఇంట్లో నుంచి గెంటేశాడని విలపించారు. దీంతో వృద్ధుణ్ని సముదాయించిన కలెక్టర్ బాలాజీ.. వెంటనే అతని కొడుకు విశ్వనాథవరప్రసాదరెడ్డి కోసం కబురు పెట్టారు.

విశ్వనాథవరప్రసాదరెడ్డిని తీసుకుని కృష్ణా జిల్లా కలెక్టరేట్‌కు రావాలని నందివాడ తహసీల్దార్‌‌ను కలెక్టర్ ఆదేశించారు. దీంతో నందివాడ తహశీల్దార్ హుటాహుటిన విశ్వనాథవరప్రసాద్‌రెడ్డిని వెంటబెట్టుకుని కలెక్టర్ కార్యాలయానికి చేరుకున్నారు. అనంతరం విశ్వనాథవరప్రసాదరెడ్డిని తీవ్రంగా మందలించిన కలెక్టర్‌ బాలాజీ.. మరోసారి తండ్రిని ఇబ్బంది పెట్టినా, దాడి చేసినా కఠిన చర్యలు ఉంటాయని అతనికి వార్నింగ్ ఇచ్చారు.

విశ్వనాథవరప్రసాదరెడ్డికి బాధ్యత తెలిసేలా హితబోధ చేశారు. అలాగే సత్యనారాయణరెడ్డి విషయంలో ప్రత్యేక శ్రద్ధ తీసుకోవాలని నందివాడ తహసీల్దార్‌కు కలెక్టర్ బాలాజీ సూచించారు. దీంతో సత్యనారాయణరెడ్డి కలెక్టర్‌కు ధన్యవాదాలు తెలియజేశారు. అనంతరం కొడుకుతో కలిసి అక్కడి నుంచి ఇంటికి వెళ్లారు. ఈ విషయం తెలిసిన వారు కలెక్టర్ స్పందించిన తీరుపై హర్షం వ్యక్తం చేస్తున్నారు.