రెండు ఇన్నింగ్స్‌లలోనూ సెంచరీలు సాధించిన మూడో భారత కెప్టెన్‌గా రికార్డు

భారత క్రికెట్ జట్టు నూతన కెప్టెన్ శుభ్‌మన్ గిల్ చారిత్రాత్మక ప్రదర్శనతో అదరగొట్టాడు. ఇంగ్లండ్‌తో ఎడ్జ్‌బాస్టన్ వేదికగా జరుగుతున్న రెండో టెస్ట్ మ్యాచ్‌లో రెండు ఇన్నింగ్స్‌లలోనూ శతకాలు బాది అరుదైన రికార్డును తన ఖాతాలో వేసుకున్నాడు. తొలి ఇన్నింగ్స్‌లో డబుల్ సెంచరీతో కదం తొక్కిన గిల్, రెండో ఇన్నింగ్స్‌లోనూ సెంచరీ పూర్తి చేసుకుని జట్టును పటిష్ట స్థితిలో నిలబెట్టాడు. ఈ ఘనత సాధించిన భారత కెప్టెన్లలో సునీల్ గవాస్కర్, విరాట్ కోహ్లీల తర్వాత మూడో ఆటగాడిగా చరిత్ర సృష్టించాడు.తొలి ఇన్నింగ్స్‌లో 269 పరుగుల భారీ స్కోరుతో భారత జట్టుకు వెన్నెముకగా నిలిచిన శుభ్‌మన్ గిల్, అదే జోరును రెండో ఇన్నింగ్స్‌లోనూ కొనసాగించాడు. నాలుగో రోజు ఆటలో అద్భుతంగా ఆడి 130 బంతుల్లో 9 ఫోర్లు, 3 సిక్సర్లతో 100 పరుగులు పూర్తి చేసుకుని క్రీజులో కొనసాగుతున్నాడు. కెప్టెన్‌గా బాధ్యతలు స్వీకరించిన తొలి రెండు టెస్టుల్లోనే మూడు సెంచరీలు నమోదు చేసిన రెండో ఆటగాడిగా (తొలి స్థానంలో విరాట్ కోహ్లీ) కూడా గిల్ రికార్డు సృష్టించాడు. అంతేకాదు, తొలి ఇన్నింగ్స్ లో డబుల్ సెంచరీ, రెండో ఇన్నింగ్స్ లో సెంచరీ సాధించిన ఆటగాళ్ల క్లబ్ లో కూడా గిల్ స్థానం సంపాదించాడు. గిల్ శతకానికి తోడు, రెండో ఇన్నింగ్స్‌లో ఇతర బ్యాటర్లు కూడా రాణించడంతో భారత్ భారీ ఆధిక్యం దిశగా దూసుకెళ్లింది. ఓపెనర్ యశస్వి జైస్వాల్ (28) వేగంగా ఆడి శుభారంభం అందించగా, కేఎల్ రాహుల్ (55) బాధ్యతాయుతమైన అర్ధశతకంతో ఆకట్టుకున్నాడు. అనంతరం క్రీజులోకి వచ్చిన వికెట్ కీపర్ రిషభ్ పంత్ తనదైన శైలిలో చెలరేగి కేవలం 58 బంతుల్లోనే 8 ఫోర్లు, 3 సిక్సర్లతో 65 పరుగులు చేసి స్కోరు బోర్డును పరుగులు పెట్టించాడు. నాలుగో రోజు టీ విరామ సమయానికి భారత్ 4 వికెట్ల నష్టానికి 304 పరుగులు చేసింది. రవీంద్ర జడేజా (25) గిల్‌తో కలిసి క్రీజులో ఉన్నాడు. దీంతో భారత్‌కు మొత్తం 484 పరుగుల భారీ ఆధిక్యం లభించింది.అంతకుముందు, ఈ మ్యాచ్‌లో టాస్ గెలిచిన ఇంగ్లండ్ బౌలింగ్ ఎంచుకోగా, భారత్ తొలి ఇన్నింగ్స్‌లో 587 పరుగుల భారీ స్కోరు సాధించింది. గిల్ (269) డబుల్ సెంచరీకి తోడు యశస్వి జైస్వాల్ (87), రవీంద్ర జడేజా (89) కీలక ఇన్నింగ్స్‌లు ఆడారు. అనంతరం బ్యాటింగ్ చేసిన ఇంగ్లండ్, భారత బౌలర్ల ధాటికి తడబడింది. అయితే, హ్యారీ బ్రూక్ (158), వికెట్ కీపర్ జేమీ స్మిత్ (184 నాటౌట్) అద్భుత శతకాలతో పోరాడటంతో 407 పరుగులు చేయగలిగింది. భారత బౌలర్లలో మహ్మద్ సిరాజ్ 6 వికెట్లతో ఇంగ్లండ్ పతనాన్ని శాసించగా, ఆకాశ్ దీప్ 4 వికెట్లు పడగొట్టాడు. ప్రస్తుతం మ్యాచ్‌పై పూర్తి పట్టు సాధించిన భారత్, ఇంగ్లండ్ ముందు కొండంత లక్ష్యాన్ని ఉంచడం ఖాయంగా కనిపిస్తోంది.