పుతిన్ పదవి నుంచి తొలగించిన కాసేపటికే,,,రష్యా మాజీ మంత్రి ఆత్మహత్య

అధ్యక్షుడు వ్లాదిమిర్ పుతిన్ తనను మంత్రివర్గం నుంచి తొలగించిన కాసేపటికే రష్యా రవాణా శాఖ మాజీ మంత్రి రోమన్ స్టారోవోయిట్ బలవన్మరణానికి పాల్పడ్డాడు. తనను మంత్రి పదవి నుంచి తప్పించడంతో తీవ్ర మనస్థాపానికి గురైన రోమన్.. తుపాకీతో కాల్చుకుని ఆత్మహత్య చేసుకున్నారు. మాస్కో నగర పరిసర ప్రాంతంలోని తన కారులో ఆయన మృతదేహం లభించినట్లు రష్యా ఇన్వెస్టిగేషన్ విభాగం అధికారికంగా తెలిపింది. రోమన్ స్టారోవోయిట్‌ను మే 2024లో రవాణా మంత్రిగా పుతిన్ నియమించారు. అప్పటి వరకు ఆయన ఉక్రెయిన్ సరిహద్దుకు సమీపంగా ఉన్న కుర్స్క్ ప్రాంతానికి గవర్నర్‌గా సుమారు ఐదేళ్లు పనిచేశారు.

జులై 6న విడుదలైన అధికారిక ఉత్తర్వులు ప్రకారం ఆయనను పదవి నుంచి తొలగించిన విషయాన్ని రష్యా ప్రభుత్వం ప్రకటించింది. అయితే తొలగింపు‌కు కారణం ఎక్కడా పేర్కొనలేదు. కానీ ఇటీవల రష్యాలో గగనతల, నౌకాశ్రయాల్లో చోటుచేసుకున్న గందరగోళాలే దీనికి కారణమని విశ్లేషకులు భావిస్తున్నారు. జూలై 5–6 తేదీల్లో ఉక్రెయిన్ డ్రోన్ దాడుల కారణంగా రష్యాలోని ప్రధాన విమానాశ్రయాల్లో 300కి పైగా విమానాలు రద్దయ్యాయి. దీనివల్ల మాస్కో, సెయింట్ పీటర్స్‌బర్గ్ సహా కీలక నగరాల్లో ప్రయాణికులకు తీవ్ర ఇబ్బందులు ఎదురయ్యాయి.

అదే సమయంలో జులై 6న లెనిన్‌గ్రాడ్ ఓబ్లాస్త్‌లోని ఉస్ట్-లూగా పోర్ట్‌లో ఒక టాంకర్‌లో భారీ పేలుడు సంభవించింది. ఈ పేలుడు కారణంగా అమోనియా గ్యాస్ లీక్ కావడంతో అత్యవసర చర్యలు చేపట్టాల్సి వచ్చింది. ఈ పరిణామాలు రవాణా మంత్రిత్వ శాఖపై తీవ్ర ఒత్తిడిని పెంచినట్లు భావిస్తున్నారు. రోమన్ స్టారోవోయిట్‌ను తప్పించిన తరువాత నవోగ్రేడ్ ప్రాంతానికి మాజీ గవర్నర్‌గా పనిచేసిన వ్యక్తిని అండ్రే నికిటిన్‌ను కొత్త రవాణా మంత్రిగా నియమితులయ్యారు. ఉక్రెయిన్- రష్యాల మధ్య మూడేళ్లకుపైగా యుద్ధం కొనసాగుతోన్న విషయం తెలిసిందే. ఈ యుద్ధాన్ని ముగించేందుకు అమెరికా అధ్యక్షుడు డొనాల్డ్ ట్రంప్ చేస్తున్న ప్రయత్నాలు ఏ మాత్రం ఫలించడం లేదు.

రోమన్ స్టారో వోయిట్ మరణంపై వివిధ ఉహాగానాలు వెలువడుతున్నాయి. పదవి నుంచి తప్పించడం, పరువు నష్టం, రాజకీయ ఒత్తిళ్లు ఇవన్నీ కలిపి ఆత్మహత్యకు దారి తీసి ఉండొచ్చని అంతరింగిక వర్గాలు చెబుతున్నాయి. ప్రతిపక్ష మీడియా వర్గాలు, పశ్చిమ దేశాలకు చెందిన విశ్లేషకులు ఈ ఘటన వెనుక మరింత లోతైన కారణాలు ఉండొచ్చని అభిప్రాయపడుతున్నారు.