మాజీ మంత్రి రోజా మూడు కోతుల కథ..చంద్రబాబు...నారా లోకేశ్...పవన్ పై సెటైర్లు

టీడీపీ కూటమి ప్రభుత్వం మీద మాజీ మంత్రి, వైసీపీ అధికార ప్రతినిధి రోజా మరోసారి విమర్శలు గుప్పించారు. అయితే ఈసారి మూడు కోతుల కథ ద్వారా ఏపీలోని ఎన్డీఏ కూటమి సర్కారు తీరును రోజా ఎండగట్టారు. సీఎం నారా చంద్రబాబు నాయుడు, డిప్యూటీ సీఎం పవన్ కళ్యాణ్‌, మంత్రి నారా లోకేష్‌ను ఉద్దేశిస్తూ రోజా సెటైర్లు వేశారు. ప్రకాశం జిల్లాలో జరిగిన రీకాలింగ్ చంద్రబాబు మేనిఫెస్టో కార్యక్రమంలో రోజా పాల్గొన్నారు. ఈ సందర్భంగా మాట్లాడిన రోజా ప్రభుత్వం తీరుపై విమర్శలు గుప్పించారు.

టీడీపీ కూటమి ప్రభుత్వం ప్రజలకు ఇచ్చిన హామీలను నెరవేర్చకుండా మోసం చేసిందని రోజా విమర్శించారు. అందుకే రీకాలింగ్ చంద్రబాబు మేనిఫెస్టో పేరుతో ఎండగడుతున్నామన్నారు. రాష్ట్రంలోని కూటమి ఎమ్మెల్యేలకు ఇంటింటికీ తిరిగే దమ్ము ఉందా అని రోజా ప్రశ్నించారు. ఆంక్షలు పెడితే భయపడటానికి వైసీపీ కార్యకర్తలు.. లోకేష్ కార్యకర్తల లెక్క కాదని.. జగన్ అనే సింహం కార్యకర్తలని రోజా అన్నారు. విజన్, విస్తరాకుల కట్ట అని చెప్పే చంద్రబాబు.. హామీలు అమలు చేయకుండా మోసం చేస్తున్నారని రోజా ఆరోపించారు. పేదవాడి చదువుకి చంద్రబాబు మోకాలడ్డుతున్నాడని.. పేదవాడిని మద్యం మత్తులో ఉంచి జీవితాన్ని నాశనం చేస్తున్నారని ఆరోపించారు.

మూడు కోతి బొమ్మలను చూస్తూ ఉంటే ముగ్గురు నాయకులు గుర్తొస్తున్నారన్న రోజా.. ధృతరాష్ట్ర పాలనలో చంద్రబాబు కళ్లు మూసుకుంటే.. విద్యార్థుల జీవితాలు నాశనమవుతూ ఉంటే నారా లోకేష్ చెవులు మూసుకున్నారని.. పవర్ లేని పవన్ కళ్యాణ్ , తండ్రీ కొడుకుల అరాచకాలను ప్రశ్నించకుండా నోరు మూసుకుని కూర్చున్నారని రోజా తీవ్ర వ్యాఖ్యలు చేశారు. విద్యా శాఖ మంత్రి ఎలా ఉండాలో ఆదిమూలపు సురేష్‌ను చూసి నేర్చుకోవాలని.. ఎలా ఉండకూడదో లోకేష్‌ను చూసి నేర్చుకోవాలని సెటైర్లు వేశారు.

ముఖ్యమంత్రి చంద్రబాబు కళ్లార్పకుండా అబద్ధాలు చెప్తున్నా్రన్న రోజా.. 2019 నుంచి 2024 వరకూ వైఎస్ జగన్ అమ్మఒడి ఇస్తే.. ఇప్పుడు తల్లికి వందనం నారా లోకేష్ ఆలోచన అని చంద్రబాబు చెప్తున్నారని ఎద్దేవా చేశారు. వైఎస్ జగన్ ప్రవేశపెట్టిన సంక్షేమ పథకాల పేర్లు మార్చుకుని సొంత పథకాలుగా చెప్పుకుంటున్నారని ఆర్కే రోజా విమర్శించారు. చంద్రబాబు సూపర్ సిక్స్ హామీలను అమలు చేయడం లేదని నిరసిస్తూ.. వైసీపీ రీకాలింగ్ చంద్రబాబు మేనిఫెస్టో పేరుతో నిరసన కార్యక్రమాలు చేపడుతున్న సంగతి తెలిసిందే.