తిరుమలలో పెరుగుతున్న భక్తుల రద్దీ.. టీటీడీ కొత్త ప్లాన్.! ఎల్అండ్టీ సహకారం
Andhra Pradesh Telugu | Suryaa Desk | Published : Fri, Jul 11, 2025, 09:36 PM
తిరుమల శ్రీవారిని దర్శించుకునేందుకు నిత్యం వేలాదిమంది భక్తులు తరలి వస్తుంటారు. ఇలా వచ్చే భక్తులకు ఎలాంటి అసౌకర్యం కలగకుండా తిరుమల తిరుపతి దేవస్థానం చర్యలు తీసుకుంటూ వస్తోంది. అలాగే తిరుమలలో పటిష్టమైన భద్రతా ఏర్పాట్లు చేస్తోంది. తాజాగా తిరుమలలో భద్రతా ప్రణాళికలపై ఎల్అండ్టీ సంస్థ ప్రతినిధులతో టీటీడీ ఈవో శ్యామలరావు శుక్రవారం సమావేశమయ్యారు. తిరుమలలో భక్తుల భవిష్యత్ అవసరాలను దృష్టిలో పెట్టుకుని.. భద్రతా ప్రణాళికలపై సమీక్ష నిర్వహించారు. ఈ సందర్భంగా ఎల్అండ్టీ సంస్థ ప్రతినిధులు పవర్ పాయింట్ ప్రజెంటేషన్ ఇచ్చారు. ఈ పవర్ పాయింట్ ప్రజెంటేషన్లో ఆధునిక సాంకేతిక పరిజ్ఞానం ఉపయోగించి తిరుమలలో అత్యాధునిక భద్రతా సదుపాయాలు ఎలా కల్పిస్తామనే దానిని ఎల్అండ్టీ సంస్థ ప్రతినిధులు వివరించారు.
అలిపిరి తనిఖీ కేంద్రం ఆధునీకరించడంతో పాటుగా, అలిపిరి వద్ద అధిక సామర్థ్యం కలిగిన స్కానర్లు ఏర్పాటు చేయాలని సూచించారు. అలాగే తిరుమలకు వచ్చేభక్తుల వాహనాలను త్వరితగతిన తనిఖీ చేసేందుకు తీసుకోవాల్సిన చర్యల గురించి వివరించారు. పార్కింగ్ మేనేజ్మెంట్, ట్రాఫిక్ కంట్రోల్, ఇంటిగ్రేటెడ్ సర్వేలెన్స్ సిస్టమ్, కామన్ అలారం మేనేజ్మెంట్ సిస్టమ్, ఆటోమెటిక్ ట్రాఫిక్ కంట్రోల్ అండ్ క్లారిఫికేషన్, కమాండ్ కంట్రోల్ వ్యవస్థ వంటి విషయాలను ఎల్అండ్టీ సంస్థ ప్రతినిధులు టీటీడీ ఈవో శ్యామలరావుకు వివరించారు. అనంతరం తిరుమల భవిష్యత్ అవసరాల దృష్ట్యా మరో 40 ఏళ్లకు సరిపడా ప్రణాళికలు రూపొందించాలని టీటీడీ ఈవో శ్యామలరావు సూచించారు. భక్తుల రద్దీ అధికంగా ఉన్నప్పుడు ఎలాంటి చర్యలు తీసుకోవాలనే దానిపై ప్రత్యేక దృష్టి పెట్టాలన్నారు. దీర్ఘ కాలిక, స్వల్ప కాలిక ప్రణాళికలు రూపొందించాలని సూచించారు.
మరోవైపు తిరుమల శ్రీవారి సేవలో సంస్కరణలపై టీటీడీ ఈవో శ్యామలరావు సమీక్ష జరిపారు. శ్రీవారి సేవ స్వచ్చంద వ్యవస్థలో సంస్కరణలపై అన్నమయ్య భవన్లో శుక్రవారం సమీక్ష నిర్వహించారు. ఈ సందర్భంగా ప్రొఫెషనల్ శ్రీవారి సేవ, ఎన్ఆర్ఐ సేవ, గ్రూప్ సూపర్వైజర్ల సేవలను త్వరలో తీసుకురానున్నట్లు టీటీడీ ఈవో తెలిపారు. ఈ విషయాలకు సంబంధించి పురోగతి గురించి చర్చించారు ఐఐఎం-అహ్మదాబాద్ బృందం సాయంతో.. గ్రూప్ సూపర్వైజర్లకు ట్రైనింగ్ ఇవ్వాలని సూచించారు. గ్రూప్ సూపర్వైజర్స్ కోసం రూపొందించిన యాప్ తరహాలోనే ఎన్ఆర్ఐ సేవ, ప్రొఫెషనల్ సేవలను కూడా త్వరిత గతిన ప్రారంభించాలని అధికారులను ఆదేశించారు.
|
|