టీడీపీకి రాజీనామా చేసిన అశోక్‌గజపతిరాజు.. చంద్రబాబుకు లేఖ

తెలుగుదేశం పార్టీకి మాజీ కేంద్రమంత్రి పూసపాటి అశోక్‌గజపతిరాజు రాజీనామా చేశారు. శాశ్వత సభ్యత్వానికి, పార్టీ పొలిట్ బ్యూరో పదవికి రాజీనామా చేస్తున్నట్లు లేఖను పార్టీ అధినేత చంద్రబాబు నాయుడు, ఆంధ్రప్రదేశ్ అధ్యక్షుడు పల్లా శ్రీనివాసరావుకు పంపారు. అశోక్‌గజపతిరాజును కేంద్రం గోవా గవర్నర్‌గా నియమించిన సంగతి తెలిసిందే.. ఈ క్రమంలో ఆయన టీడీపీకి రాజీనామా చేశారు. రాజ్యాంగబద్ధమైన పదవీ బాధ్యతలు స్వీకరించబోయే వ్యక్తులు రాజకీయ పార్టీల్లో కొనసాగరు.. అందుకే అశోక్‌గజపతి టీడీపీకి రాజీనామా చేశారు. ఆయన త్వరలోనే గోవా గవర్నర్‌గా పదవీ బాధ్యతల్ని స్వీకరించనున్నారు.

గోవా గవర్నర్‌గా నియమితులైన తర్వాత తొలిసారి సింహాద్రి అప్పన్న స్వామిని అశోక్ గజపతిరాజు దర్శించుకున్నారు. టీడీపీకి రాజీనామా చేసిన తర్వాత అశోక్‌గజపతి రాజు ఎమోషనల్ అయ్యారు.. కన్నీళ్లు పెట్టుకున్నారు. రాజకీయాల్లో ఉండకపోవచ్చు.. రాజ్యాంగబద్ధ పదవిలో ఉండి సేవ చేస్తానన్నారు. తాను సింహాచలం ఆలయం ఛైర్మన్‌గా పనిచేయడం ఆనందంగా ఉందని.. ఆలయ ధర్మకర్తగా పదవి వస్తుందని రోజు ఊహించలేదన్నారు. చాలామంది ఇక్కడ అహంకారంగా పనిచేస్తున్నారు.. అది ఎప్పుడూ ఉండకూడదని.. మనిషికి ఎప్పుడూ గర్వం కూడా ఉండకూడదన్నారు.

1978 తొలిసారి ఎమ్మెల్యే గెలిచినప్పుడు స్వామివారిని దర్శించుకుని అసెంబ్లీకి వెళ్లానని గుర్తు చేసుకున్నారు అశోక్ గజపతిరాజు. రాజ్యాంగం బద్ధమైన పదవి రావడంతో తొలిసారిగా స్వామివారిని దర్శించుకున్నట్లు తెలిపారు. తన తల్లిదండ్రులు.. తన తలనీలాలు స్వామి దగ్గర తీయించారని. తమ పూర్వీకులు వందేళ్లుగా స్వామివారికి సేవ చేస్తున్నారని, చేస్తూనే ఉన్నారన్నారు. రాజ్యాంగబద్ధమైన పదవిని స్వీకరిస్తున్నందుకు ఆనందంగా ఉందన్నారు. తనకు టీడీపీ కార్యకర్తగా, నేతగా ప్రజలకు సేవ చేసే అవకాశం కల్పించిన చంద్రబాబు నాయుడుకి కృతజ్ఞతలు తెలిపారు.

కేంద్రం ఈ నెల 14న ఒక కేంద్ర పాలిత ప్రాంతానికి లెఫ్టినెంట్‌ గవర్నర్‌, రెండు రాష్ట్రాలకు గవర్నర్లలను నియమించిన సంగతి తెలిసిందే. ఈ మేరకు గోవా గవర్నర్‌గా పూసపాటి అశోక్‌ గజపతిరాజుకు, హర్యానా గవర్నర్‌గా పశ్చిమబెంగాల్‌ బీజేపీ మాజీ అధ్యక్షుడు ప్రొఫెసర్‌ అశీం కుమార్‌ ఘోష్‌, లద్ధాఖ్‌ లెఫ్టినెంట్‌ గవర్నర్‌గా జమ్మూ కశ్మీర్‌ మాజీ డిప్యూటీ సీఎం కవిందర్‌ గుప్తను నియమించారు.