వారికోసం చాలా బహుమతులు తెచ్చా.. ఒక్కసారి కలిసి మాట్లాడనీయండి.

కర్ణాటక గోకర్ణలోని ఓ గుహలో ఇటీవలే ఓ మహిళ తన ఇద్దరు బిడ్డలతో కలిసి రహస్యంగా జీవిస్తూ పోలీసులకు కనిపించిన విషయం అందరికీ తెలిసిందే. అయితే ఈ కేసులో విస్తుపోయే విషయాలు వెలుగులోకి వచ్చాయి. ముఖ్యంగా ఆమె తన ప్రియుడితో 9 ఏళ్లుగా సహజీవనం చేస్తుండగా.. ఇద్దరు పిల్లలు పుట్టారని, ఇటీవలే అతడు పనిపై ఇజ్రాయెల్ వెళ్లగా ఆమె మాత్రం చెప్పాపెట్టకుండా అడవిలోకి వెళ్లి జీవిస్తున్నట్లు వెల్లడి అయింది. ముఖ్యంగా ఆమె ఆచూకీ లభ్యం కాగానే.. ప్రియుడు ఇజ్రాయెల్ నుంచి బెంగళూరుకు వచ్చాడు. గురువారం రోజే ఇక్కడికి చేరుకోగా.. పోలీసులు మాత్రం అతడిని.. ప్రియురాలు, పిల్లల్ని చూసేందుకు అనుమతించడం లేదు. కారణాలు ఏవైనా వారిని చూడనీయకపోవడంతో.. ఒక్కసారి వారిని కలవనీయమంటూ కోరుతున్నాడు. వారికోసం ఎన్నెన్నో బహుమతులు తెచ్చానని.. వాటిని వారికి ఇవ్వనీయండి అంటూ వేడుకుంటున్నాడు.

గుహలో తన ఇద్దరు కుమార్తెలతో రహస్యంగా జీవస్తూ దొరికిన నీనా కుటీనాను ప్రస్తుతం తుమకూరు సమీపంలోని సంరక్షణ కేంద్రంలో ఉంచారు. ఆమె పిల్లలు ప్రేయా, అమాలు కూడా ఆమెతోనే ఉన్నారు. అయితే వీరి ఆచూకీ లభ్యం అయిన వెంటనే ఆమె ప్రియుడు డ్రోర్ గోల్డ్ స్టెనిన్.. గురువారం రోజు ఇజ్రాయెల్ నుంచి బెంగళూరుకు వచ్చేశాడు. శుక్రవారం రోజు తుమకూరు తాలూకాలోని ఫారినర్ డిటెన్షన్ సెంటర్‌లో నీనా, ఆమె కుమార్తెలను చూసేందుకు ప్రయత్నించాడు. కానీ నిబంధనల మేరకు అక్కడి అధికారులు నిరాకరించారు. దీంతో కిటికీలోంచి కనిపిస్తున్న ఆమెను సైగలతోనే డ్రోర్ గోల్డ్ స్టెనిన్ పలకరించాడు.

ఆ తర్వాత మీడియాతో మాట్లాడుతూ.. నీనా, తాను తొమ్మిది సంవత్సరాలుగా సహజీవనం చేస్తున్నట్లు చెప్పారు. ఈక్రమంలోనే తమకు ఇద్దరు పిల్లలు పుట్టారని.. వారితో కలిసి తీసుకున్న ఫొటోలు సైతం తన వద్ద ఉన్నాయని అన్నారు. అంతేకాకుండా తన పిల్లలను చదివించుకోవడానికి తాను సిద్ధమేనని.. వారి కోసం ఎన్నెన్నో బహుమతులు కూడా తీసుకు వచ్చినట్లు వెల్లడించాడు. అందులో దుస్తులు కూడా ఉన్నాయని.. వాటిని వారికి అందజేయాలని ఉందని పేర్కొన్నాడు. తనను ఒకే ఒక్కసారి వారి వద్దకు వెళ్లనీయమంటూ అధికారులను వేడుకున్నాడు. ఇప్పటికీ తనను వారి వద్దకు వెళ్లి కలవనీయడం లేదంటూ డ్రోర్ ఆవేదన వ్యక్తం చేశాడు.

ఉన్నతాధికారుల అనుమతి ఉంటేనే ఆమెతో మాట్లాడనిస్తాం, కలవనిస్తాం అని సిబ్బంది చెప్పగా.. విధిలేని పరిస్థితుల్లో డ్రోర్ గోల్డ్ స్టెనిన్ బెంగళూరుకు తిరిగి వెళ్లాడు. ఉన్నతాధికారుల అనుమతి తీసుకుని మళ్లీ వస్తానని చెప్పాడు. ఇలా ప్రియురాలు, పిల్లల కోసం డ్రోర్ పడుతున్న ఆవేదన చూసిన ప్రతీ ఒక్కరూ.. పాపం ఒక్కసారి కలవనిస్తే అయిపోయేది కదా అంటూ చెప్పుకొస్తున్నారు. చూడాలి మరి వీరి కథలో ఇంకెన్ని ట్విస్టులు చోటు చేసుకుంటాయనేది.