భర్తతో శృంగారానికి నిరాకరించినా విడాకులు ఇవ్వొచ్చు..: బాంబే హైకోర్టు సంచలన తీర్పు

భార్య తన భర్తతో శారీరక సంబంధాన్ని నిరాకరించడం, ఎలాంటి ఆధారాలు లేకుండా అక్రమ సంబంధాలను ఆపాదించడం, స్నేహితుల ముందు అవమానించడం వంటివి 'క్రూరత్వం' కిందికి వస్తాయని బాంబే హైకోర్టు తేల్చి చెప్పింది. ముఖ్యంగా ఈ చర్యలు భర్తకు తీవ్ర మానసిక వేదనను కలిగిస్తాయని పేర్కొంటూ.. పూణే కుటుంబ న్యాయస్థానం ఇచ్చిన విడాకుల ఉత్తర్వులను సమర్థిస్తూ భార్య దాఖలు చేసిన అప్పీల్‌ను కొట్టివేసింది.

జస్టిస్ రేవతి మోహితే-డెరే, డాక్టర్ నీలా గోఖలేలతో కూడిన డివిజన్ బెంచ్.. ఈ కేసును విచారించింది. భార్య ప్రవర్తన భర్త పట్ల క్రూరత్వంగా పరిగణించబడుతుందని కోర్టు స్పష్టం చేసింది. ఈ కేసులో భర్త తన భార్యపై అనేక ఆరోపణలు చేస్తూ విడాకులు కోరారు. వివాహం జరిగిన మొదటి నాలుగు నెలల పాటు శారీరక సంబంధాన్ని నిరాకరించడం, నిరాధారమైన అక్రమ సంబంధాల ఆరోపణలు చేయడం, తన స్నేహితులు, కుటుంబ సభ్యులు, ఉద్యోగుల ముందు తనను అవమానించడం వంటివి చేసిందని వెల్లడించారు. అంతేకాకుండా తన ప్రత్యేక అవసరాలు ఉన్న సోదరి పట్ల భార్య ఉదాసీనంగా, నిర్లక్ష్యంగా వ్యవహరించిందని కూడా ఆరోపించారు.

ఈ దంపతులు 2013వ సంవత్సరం డిసెంబర్ 12వ తేదీన వివాహం చేసుకున్నారు. అయితే కేవలం ఒక సంవత్సరంలోపే.. అంటే 2014వ సంవత్సరం డిసెంబర్ 14వ తేదీ నుంచే విడివిడిగా జీవించడం ప్రారంభించారు. ఏప్రిల్ 2015లో.. ఇరుపక్షాలు పరస్పర అంగీకారంతో విడాకులకు దరఖాస్తు చేసుకున్నాయి. కానీ 2015 జూలైలో.. భార్య తన సమ్మతిని ఉపసంహరించుకుంది. తనపై ఒత్తిడి తెచ్చి దరఖాస్తు చేయించారని ఆరోపించింది. దీంతో భర్త 2015లో పూణే కుటుంబ న్యాయస్థానాన్ని ఆశ్రయించి.. క్రూరత్వం ఆధారంగా విడాకులు కోరారు. కుటుంబ న్యాయస్థానం భర్తకు అనుకూలంగా తీర్పు ఇచ్చింది.

భర్త తన వివాహాన్ని కాపాడుకోవడానికి అనేక ప్రయత్నాలు చేశాడని, తన కుటుంబ ఇంటిని వదిలి అద్దె ఇంట్లోకి మారడానికి కూడా సిద్ధం అయ్యాడని న్యాయస్థానం గుర్తించింది. ముఖ్యంగా భార్యను కూడా అక్కడకు రావాలని ఆహ్వానించాడని.. కానీ ఆమె రాలేదని తెలుసుకుంది. ఈ సాక్ష్యాలను భార్య సవాలు చేయకపోవడంతో.. భర్త వాదనలు బలపడ్డాయి. ఈ సందర్భంగానే మాట్లాడిన ధర్మాసనం.. ఈ వివాహం తిరిగి కలిసే అవకాశం లేకుండా విచ్ఛిన్నమైందని స్పష్టంగా తెలుస్తోందని పేర్కొంది. దశాబ్దానికి పైగా ఈ దంపతులు విడివిడిగా జీవిస్తున్నారని.. వివాహ బంధం పూర్తిగా తెగిపోయిందని అభిప్రాయ పడింది. ఈ సందర్భంగానే వారికి విడాకులు ఇచ్చేందుకు సమ్మతించింది.