హెచ్‌ఆర్ మేనేజర్‌తో పబ్లిక్‌గా సీఈఓ రొమాన్స్.... కంపెనీ షాకింగ్ నిర్ణయం

ఈమధ్య కాలంలో అనేక మంది పబ్లిక్‌గానే రెచ్చిపోతున్నారు. క్రిటెట్ స్టేడియంలు, సినిమా హాళ్లలో తమకు నచ్చిన వారితో రొమాన్స్ చేస్తూ కెమెరాలకు పట్టుబడుతున్నారు. ముఖ్యంగా క్రికెట్ స్టేడియంలో అనేక మందికి వీడియోలు వైరల్ అయ్యాయి. అచ్చంగా ఇలాంటి ఘటనే అమెరికాలో చోటు చేసుకుంది. ఓ ప్రముఖ కంపెనీకి చెందిన సీఈఓ.. అదే కంపెనీలో హెచ్ఆర్ మేనేజర్‌గా పని చేస్తున్న మహిళతో పబ్లిక్‌గానే రొమాన్స్ చేశారు. ఇందుకు సంబంధించిన దృశ్యాలు కెమెరాలో కనిపించగా.. అందరి దృష్టి జంటపైకి మళ్లింది. ముఖ్యంగా ఈ వీడియో నెట్టింట వైరల్ కాగా కంపెనీ వీరిపై సీరియస్ యాక్షన్ తీసుకుంది. సీఈఓను సస్పెండ్ చేస్తూనే.. అంతర్గత విచారణకు ఆదేశాలు జారీ చేసింది.

అమెరికాలోని ప్రముఖ డేటా ఆర్కెస్ట్రేషన్ సంస్థ ఆస్ట్రానమర్ సీఈఓ ఆండీ బైరన్‌కు ఊహించని షాక్ తగిలింది. జులై 16వ తేదీన బోస్టన్‌లోని జిల్లెట్ స్టేడియంలో జరిగిన కోల్డ్‌ప్లే కన్సర్ట్‌లో ఆయన తన కంపెనీ చీఫ్ హెచ్ఆర్ మేనేజర్‌ క్రిస్టిన్ కాబోట్‌ను వెనుక నుంచి హత్తుకున్నారు. ఇద్దరూ నిలబడి ఇలా సన్నిహితంగా ఉన్న దృశ్యాలు అక్కడి కెమెరాలో కనిపించాయి. ఇలా అక్కడి వారందరి దృష్టి ఈ జంటపైకి మళ్లింది. కెమెరా తమపైనే ఉందని గుర్తించిన ఆండీ బైరన్, క్రిస్టిన్ కాబోట్ వెంటనే కెమెరాకు దూరంగా జరగడానికి ప్రయత్నించారు. ఈక్రమంలోనే ఈ దృశ్యాలను చూసిన కోల్డ్‌ప్లే ప్రధాన గాయకుడు క్రిస్ మార్టిన్.. "ఓహ్, వీరిద్దరినీ చూడండి... వారికి రైలా ఉన్నారో, మనల్ని చూసి ఎంతలా సిగ్గుపడుతున్నారో" అని సరదాగా వ్యాఖ్యానించారు.

మార్టిన్ చేసిన ఈ వ్యాఖ్యలు.. కెమెరా ముందు బైరన్, కాబోట్‌ల అసౌకర్యంతో ఈ వీడియో క్షణాల్లోనే వైరల్‌గా మారింది. ముఖ్యంగా ఈ వీడియో 'కోల్డ్‌ప్లే గేట్' పేరుతో టిక్‌టాక్, ఎక్స్ (ట్విట్టర్), రెడ్డిట్ వంటి ప్లాట్‌ఫాంలలో 34 మిలియన్లకు పైగా వీక్షణలను పొందింది. ఆండీ బైరన్ వివాహితుడు కాగా.. ఆయనకు మెగాన్ కెర్రిగాన్ బైరన్ అనే భార్య, ఇద్దరు పిల్లలు ఉన్నారు. క్రిస్టిన్ కాబోట్ కూడా గతంలో ఓ వ్యక్తిని పెళ్లి చేసుకున్నారు. ఈ వీడియో నెట్టింట వైరల్ కావడంతో బైరన్ భార్యకు సానుభూతి వెల్లువెత్తుతోంది. ఆమె తన సోషల్ మీడియా ప్రొఫైల్ నుంచి 'బైరన్' అనే ఇంటి పేరును తొలగించి.. ఆ తర్వాత తన ఖాతాను పూర్తిగా డిలీట్ చేశారు.

మరోవైపు ఈ వీడియో చూసిన ఆస్ట్రానమర్ కంపెనీ.. ఈ విషయంపై అంతర్గత విచారణను ప్రారంభించింది. తమ ఉద్యోగులు, ప్రవర్తన, జవాబుదారీతనంలో ప్రమాణాలను నెలకొల్పాలని మేము ఆశిస్తున్నామంటూ ఒక ప్రకటనలో తెలిపింది. ఆండీ బైరన్‌ను సెలవుపై పంపగా.. క్రిస్టిన్ కాబోట్‌ను సస్పెండ్ చేశారు. కంపెనీ సహ-వ్యవస్థాపకుడు, చీఫ్ ప్రొడక్ట్ ఆఫీసర్ పీట్ డిజోయ్‌ను తాత్కాలిక సీఈఓగా నియమించారు.

ఈ సంఘటన బైరన్‌కు వ్యక్తిగతంగా, వృత్తిపరంగా తీవ్ర నష్టాన్ని కలిగించింది. ఆయన తన లింక్డ్ ఇన్ ఖాతాను డిసేబుల్ చేశారు. అయితే ఆయన గతంలో క్రిస్టిన్ కాబోట్‌ను 'అసాధారణ నాయకత్వం', 'కంపెనీకి సరైన వ్యక్తి' అని ప్రశంసిస్తూ చేసిన పోస్టులు ప్రస్తుతం వైరల్ అయ్యాయి. ఈ ఘటన ఆస్ట్రానమర్ కంపెనీలో 'టాక్సిక్ వర్క్ కల్చర్'పై కూడా ప్రశ్నలు లేవనెత్తింది. ఏది ఏమైనా ఒక కాన్సర్ట్‌లో జరిగిన ఒక చిన్న సంఘటన ఒక అంతర్జాతీయ కంపెనీ సీఈఓ కెరీర్‌ను ప్రభావితం చేయడం, సోషల్ మీడియా ప్రభావానికి నిదర్శనంగా నిలిచింది.