ట్యాక్స్ పేయర్లకు 'రీఫండ్ వెరిఫికేషన్' మెయిల్స్.. కేంద్రం కీలక ప్రకటన

ఆదాయపు పన్ను చెల్లింపుదారుల్లో చాలా మంది ఇప్పటికే తమ ట్యాక్స్ రిటర్న్స్ ఫైల్ చేశారు. గడువు దగ్గర పడుతున్న క్రమంలో తమ రిటర్నులు దాఖలు చేస్తున్న వారి సంఖ్య క్రమంగా పెరుగుతోంది. ఈ క్రమంలోనే ఐటీఆర్ ఫైల్ చేసి రీఫండ్ కోసం వేచి చూస్తున్న వారికి మాన్యువల్ వెరిఫికేషన్ అంటూ ఇ-మెయిల్స్ వస్తున్నాయి. మీకు రీఫండ్ జారీ అయిందని, అందుకు మీరు మాన్యువల్‌గా వ్యక్తిగత వివరాలు వెరిఫికేషన్ చేయాలంటూ ఇన్‌కమ్ ట్యాక్స్ అధికారిక మెయిల్స్ అంటూ ట్యాక్స్ పేయర్లకు అందుతున్నాయి. అలా మీకు కూడా వెరిఫికేషన్ మెయిల్ వచ్చిందా? అయితే, కేంద్ర ప్రభుత్వం కీలక ప్రకటన చేసింది. అలాంటి మెయిల్స్ మోసపూరితమైనవి కావచ్చని, అందులోని లింకులను ఎట్టి పరిస్థితుల్లో క్లిక్ చేయవద్దని సూచించింది.

ఈ ఆర్థిక సంవత్సరం ట్యాక్స్ ఫైలింగ్ సీజన్ మొదలైన క్రమంలో సైబర్ నేరగాళ్లు ట్యాక్స్ పేయర్లను మోసం చేసేలా అధికారికంగా పంపిస్తున్నట్లు నమ్మించేలా మెయిల్స్ చేస్తున్నారు. వాటిని చూస్తే నిజంగానే ఆదాయపు పన్ను శాఖ నుంచి వచ్చినట్లుగానే అనిపిస్తుంది. దీంతో చాలా మంది అందులోని లింకులను ఓపెన్ చేసి తమ వ్యక్తిగత, ఆర్థిక వివరాలను అందిస్తున్నారు. మాన్యువల్ వెరిఫికేషన్ లేదా ఇ-వెరిఫికేషన్ చేయాలంటూ చెప్పడంతో నమ్మి మోసపోతున్నారు. అలాంటి వారందరికీ హెచ్చరికలు చేసింది కేంద్ర ప్రభుత్వ సమాచార విభాగం ప్రెస్ ఇన్ఫర్మేషన్ బ్యూరో ఫ్యాక్ట్ చెక్ 

అలా వస్తున్న ఇ-మెయిల్స్ పూర్తిగా నకిలివిగా పీఐబీ ఫ్యాక్ట్ చెక్ తేల్చింది. ఇ-మెయిల్స్, ఎస్ఎంఎస్, కాల్స్ ద్వారా వచ్చే ఇలాంటి వాటికి దూరంగా ఉండాలని, తమ వ్యక్తిగత, ఆర్థిక, సున్నితమైన సమాచారాన్ని ఇవ్వొద్దని సూచించింది. ఇ-మెయిల్, ఎస్ఎంఎస్ ద్వారా వచ్చే అనుమానిత లింకులపై క్లిక్ చేయొద్దని, దాని ద్వారా మీ ఖాతాలోని డబ్బులు మొత్తం కోల్పోయే ప్రమాదం ఉందని హెచ్చరించింది. ఇన్‌కమ్ ట్యాక్స్ విభాగం ఎప్పటికీ మీ పాస్‌వర్డ్, పిన్ నంబర్, బ్యాంక్ అకౌంట్ నంబర్ వంటివి అడుగుతూ ఇ-మెయిల్, ఎస్ఎఎంస్ పంపదని, ఫోన్ కాల్‌లో అలాంటి వివరాలు అడగదని గుర్తు చేసింది.

ఇన్‌‌కమ్ ట్యాక్స్ విభాగం అంటూ వ్యక్తిగత వివరాలు అడిగినట్లయితే వాటిని అనుమానించాలి. రిప్లై ఇవ్వకూడదు. అందులోని లింకులు, ఫైల్స్ వంటివి ఓపెన్ చేయకూడదు. వాటిల్లోని లింకులను తీసుకుని మీ కంప్యూటర్‌లో రన్ చేయకూడదు. యాంటీ వైరస్ సాఫ్ట్‌వేర్ ఉపయోగించాలి. ఫిషింగ్ ఇ-మెయిల్స్‌లో మీ కంప్యూటర్‌కి హాని చేసే వైరస్ ఉండవచ్చు. ఒక వేళ మీరు అలాంటి మెయిల్, వెబ్‌సైట్ గుర్తిస్తే ఆ వివరాలను ఆదాయపు పన్ను శాఖకు పంపవచ్చు. అందుకు webmanager@incometax.gov.in, incident@cert-in.org.inకు పంపాలని ఆదాయపు పన్ను శాఖ సూచిస్తోంది.