రిషభ్ పంత్.. మరణాన్ని జయించిన యోధుడి అసాధారణ పోరాటం..!

టీమిండియా స్టార్ రిషభ్ పంత్‌పై భారత మాజీ క్రికెటర్ ఆకాశ్ చోప్రా ప్రశంసల జల్లు కురిపించాడు. టెండుల్కర్-ఆండర్సన్ ట్రోఫీలో భాగంగా మాంచెస్టర్‌లో జరిగిన నాలుగో టెస్టులో భారత్‌తో ఇంగ్లండ్ తలపడింది. తొలిరోజు బ్యాటింగ్‌లో టీమిండియా 264/4 స్కోరు సాధించగా, పంత్ 37 పరుగుల వద్ద క్రిస్ వోక్స్ బంతికి రివర్స్ స్వీప్ ఆడబోయి కుడి పాదంపై గాయమై రిటైర్డ్ హర్ట్‌గా వెనుదిరిగాడు. స్కానింగ్‌లో అతని బొటనవేలు ఫ్రాక్చర్ అయినట్లు తెలిసింది.
అయినప్పటికీ, రెండో రోజు పంత్ అనూహ్యంగా మైదానంలోకి దిగాడు. నొప్పితో కుంటుకుంటూ కూడా ఈ ఎడమచేతి బ్యాటర్ అర్ధశతకం (54) సాధించి, భారత్‌ తొలి ఇన్నింగ్స్‌లో 358 పరుగులు చేయడంలో కీలక పాత్ర పోషించాడు. ఆకాశ్ చోప్రా, పంత్ ఈ పోరాటపటిమను అనిల్ కుంబ్లే ఆంటిగ్వా టెస్టులో దవడ విరిగినా బౌలింగ్‌కు వచ్చిన సంఘటనతో పోల్చాడు. పంత్‌ ఆట పట్ల అంకితభావం, ధైర్యాన్ని ఆకాశ్ ఆకాశానికెత్తేశాడు.
2022 డిసెంబర్‌లో జరిగిన భయంకరమైన కారు ప్రమాదం నుంచి ప్రాణాలతో బయటపడిన పంత్, అసలు నడవగలడా అనే సందేహాల నడుమ అద్భుతంగా కోలుకున్నాడు. మరణాన్నే జయించిన ఈ యోధుడు, ఈ చిన్న గాయానికి తలవంచడు అని చోప్రా వ్యాఖ్యానించాడు. “ఆరు వారాలు ఆటకు దూరమవుతాడని అనుకున్నా, అతను తిరిగొచ్చి సత్తా చాటాడు,” అని చోప్రా పంత్ ధైర్యాన్ని కొనియాడాడు.
మాంచెస్టర్ టెస్టులో భారత బ్యాటర్లు గట్టిగా నిలిచినప్పటికీ, బౌలర్లు తడబడ్డారు. రెండో రోజు ముగిసే సమయానికి ఇంగ్లండ్ 46 ఓవర్లలో 225/2 స్కోరు సాధించి, భారత్‌ కంటే 133 పరుగులు వెనుకబడి ఉంది, చేతిలో ఎనిమిది వికెట్లతో. పంత్ పోరాటం జట్టుకు స్ఫూర్తినిచ్చినప్పటికీ, భారత బౌలర్లు ఈ మ్యాచ్‌లో ఇంకా సత్తా చాటాల్సి ఉంది.