జస్టిస్ వర్మ అభిశంసన తీర్మానం ఆమోదించని రాజ్యసభ,,,విపక్షాలకు షాక్

అల్లహాబాద్ హైకోర్టు న్యాయమూర్తి జస్టిస్ యశ్వంత్ వర్మ అభిశంసన తీర్మానంపై లోక్‌సభ చర్చ చేపట్టనున్నట్టు ప్రభుత్వ వర్గాలు వెల్లడించాయి. జస్టిస్ వర్మ నివాసంలో భారీ ఎత్తున కాలిపోయిన నోట్లు బయటపడటం కలకలం రేపిన సంగతి తెలిసిందే. గత మార్చిలో ఢిల్లీలోని జస్టిస్ వర్మ నివాసంలో అగ్ని ప్రమాదం జరిగిన సమయంలో నోట్ల కట్టలు వెలుగుచూశాయి. ఈ వ్యవహారంపై తీవ్ర దుమారం రేగడంతో జస్టిస్ వర్మ అభిశంసనకు పార్లమెంట్‌లో తీర్మానం ప్రవేశపెట్టారు. అధికార పార్టీ తీర్మానం లోక్‌సభలో ప్రవేశపెట్టగా.. విపక్షాలు రాజ్యసభలో ఇచ్చిన తీర్మానాన్ని ఛైర్మన్ హోదాలో మాజీ ఉప-రాష్ట్రపతి జగదీప్ ధన్ఖడ్ ఆమోదించారు.

 విపక్షాలు ప్రవేశపెట్టిన అభిశంసన తీర్మానాన్ని స్వీకరించడంతో, అధికార బీజేపీ తీవ్ర అసహనం వ్యక్తం చేసింది. పార్లమెంటు ఉభయ సభల మధ్య సమన్వయాన్ని దెబ్బతీసే చర్యగా భావించింది. తదనంతరం ఆరోగ్య కారణాలతో ధన్ఖడ్ రాజీనామా చేసినట్టు అధికారికంగా ప్రకటించినా, వాస్తవిక కారణం రాజకీయ ఒత్తిడే అని ప్రతిపక్షాలు, విశ్లేషకులు అభిప్రాయపడుతున్నారు

ఈ నేపధ్యంలో, ఆరోపణలపై దర్యాప్తునకు లోక్‌సభ స్పీకర్ ఒం బిర్లా ఓ కమిటీని ఏర్పాటు చేసి, దాని నివేదిక ఆధారంగా నిర్ణయం తీసుకుంటారు.తగిన కారణాలు ఉంటే అభిశంసనకు సిఫార్సు చేయనున్నారు. త్వరలోనే జరగనున్న పలు రాష్ట్రాల అసెంబ్లీ ఎన్నికలు (బిహార్, బెంగాల్, తమిళనాడు) దృష్టిలో పెట్టుకొని, న్యాయవ్యవస్థలో అవినీతిపై గట్టిగా స్పందిస్తున్న పార్టీగా నిలవాలనే వ్యూహాన్ని బీజేపీ అమలు చేస్తోంది.

ఈ నేపథ్యంలో, విపక్షాల తీర్మానాన్ని కొనసాగించేందుకు అధికార పార్టీ ద్వైపాక్షిక సమ్మతి కోసం ప్రతిపక్ష ఎంపీలను ఒప్పించేందుకు ప్రయత్నించింది. దీంతో విపక్ష ఎంపీలు కూడా ప్రభుత్వ తీర్మానంపై సంతకం చేశారు. ఈ పరిణామాల మధ్య, కొత్త ఉపరాష్ట్రపతిని ఎన్నుకునే ప్రక్రియను ఎన్నికల సంఘం ప్రారంభించింది. ఆగస్టు చివరి వారంలోగా ఈ ప్రక్రియ పూర్తికానుంది. న్యాయవ్యవస్థపై ప్రజల నమ్మకాన్ని నిలబెట్టడానికి అభిశంసన ప్రక్రియలు పారదర్శకంగా రాజకీయ ఉద్దేశాలను దాటి చూడాల్సిన బాధ్యత అన్ని పార్టీలపైన ఉంది. ఇదిలా ఉండగా.. జస్టిస్ వర్మ తన అభిశంసనను నిలిపేసేలా ఆదేశించాలని కోరుతూ సుప్రీంకోర్టులో పిటిషన్ దాఖలు చేశారు. దీనిని సర్వోన్నత న్యాయస్థానం విచారణకు స్వీకరించింది.