"COVID టీకా తీసుకున్నవారిలో మరణాలు ఎక్కువా..? కేంద్రం సమాధానంతో స్పష్టత!"

కోవిడ్-19 వ్యాక్సిన్‌కి సంబంధించిన దుష్ప్రభావాలపై గత కొంతకాలంగా విస్తృతంగా చర్చ జరుగుతోంది. వ్యాక్సిన్ తీసుకున్న తర్వాత గుండె సంబంధిత సమస్యలు, గుండెపోటు ఘటనలు పెరిగాయంటూ ప్రచారం జరుగుతోంది. దీంతో, టీకా కారణంగా ఆకస్మిక మరణాలు పెరుగుతున్నాయని అనేక వాదనలు వినిపిస్తున్నాయి.
వివిధ పరిశోధనలు ఈ అంశంపై ఎప్పటికప్పుడు నివేదికలను విడుదల చేస్తూ వస్తున్నాయి. తాజాగా, కేంద్ర ఆరోగ్యశాఖ మంత్రి జేపీ నడ్డా జూలై 25న (శుక్రవారం) లోక్‌సభలో కీలక ప్రకటన చేశారు. కోవిడ్ టీకా కారణంగా ఆకస్మిక మరణాల ప్రమాదం పెరిగినట్లు ఎలాంటి ఆధారాలు లేవని ఆయన స్పష్టం చేశారు. ఇండియన్ కౌన్సిల్ ఆఫ్ మెడికల్ రీసెర్చ్ (ICMR) నిర్వహించిన తాజా అధ్యయనాన్ని ఉటంకిస్తూ — టీకా మరియు పెరుగుతున్న మరణాల మధ్య ఎలాంటి ప్రత్యక్ష సంబంధం లేదని నడ్డా వెల్లడించారు.కోవిడ్ తర్వాత ఆసుపత్రిలో చేరడం, కుటుంబంలో ఆకస్మిక మరణాల చరిత్ర ఉండటం, జీవనశైలి సమస్యలు — ఇవే హఠాత్ మరణాలకు ప్రధాన కారణాలని నిపుణుల బృందం గుర్తించినట్లు చెప్పారు.ఆకస్మిక మరణాల వెనుక కారణాలను నిర్దిష్టంగా గుర్తించేందుకు ICMR మరియు నేషనల్ సెంటర్ ఫర్ డిసీజ్ కంట్రోల్ (NCDC) రెండు వైవిధ్యమైన మోడళ్లపై పరిశీలనలు జరిపాయి. అలాగే, నేషనల్ ఇన్స్టిట్యూట్ ఆఫ్ ఎపిడెమియాలజీ (NIE) 19 రాష్ట్రాలు మరియు కేంద్రపాలిత ప్రాంతాల్లోని 47 ఆసుపత్రుల్లో ఒక విస్తృతమైన అధ్యయనం నిర్వహించింది.ఈ అధ్యయనం 2021 అక్టోబర్ 1 నుంచి 2023 మార్చి 31 వరకు సమయంలో ఆరోగ్యంగా ఉన్న, కానీ ఆకస్మికంగా మరణించిన వ్యక్తులపై జరిగింది. ఈ బాధితులకు ఎటువంటి కోమోర్బిడిటీలూ (రెండు లేదా అంతకంటే ఎక్కువ వ్యాధులు) లేవని పేర్కొనబడింది. వారి జీవనశైలి, ఆరోగ్యపు నేపథ్యం, ఇతర కారణాలపై డేటా సేకరించి విశ్లేషణ చేయబడింది.ఆ ప్రాథమిక విశ్లేషణలో, యువతలో ఆకస్మిక మరణానికి ప్రధాన కారణంగా గుండెపోటు లేదా మయోకార్డియల్ ఇన్ఫార్క్షన్ (MI) గుర్తించబడింది. అయితే, కోవిడ్ పూర్వ కాలంతో పోలిస్తే మరణాల కారణాల్లో పెద్దగా మార్పు లేదని వెల్లడైంది.కోవిడ్ తర్వాత ఆసుపత్రిలో చేరటం, కుటుంబ చరిత్రలో ఆకస్మిక మరణం ఉండటం, అధిక మద్యపానం, డ్రగ్స్ వినియోగం, లేదా మరణానికి ముందు 48 గంటలలో తీవ్రమైన శారీరక శ్రమ చేయడం వంటి అంశాలు మరణ ప్రమాదాన్ని పెంచే అంశాలుగా తేలినట్టు అధ్యయనం చూపించింది. ముఖ్యంగా, కోవిడ్ టీకా రెండు డోసులు తీసుకున్నవారిలో ఆకస్మిక మరణాల అవకాశాలు గణనీయంగా తగ్గాయని ఈ అధ్యయనంలో వెల్లడయినట్టు మంత్రి నడ్డా పేర్కొన్నారు.