మిస్ ఫైర్ అయిన గంభీర్ సెలక్షన్!,,,అన్షుల్ కాంబోజ్ అట్టర్ ఫ్లాప్

అండర్సన్ - టెండూల్కర్ ట్రోఫీ నాలుగో టెస్టులో గౌతమ్ గంభీర్ సెలక్షన్ మిస్ ఫైర్ అయింది. ఆకాశ్ దీప్, అర్షదీప్ సింగ్ గాయాల బారిన పడటంతో మాంచెస్టర్ టెస్టు స్క్వాడ్ కోసం టీమిండియా ఏరికోరి అన్షుల్ కాంబోజ్‌ను సెలెక్ట్ చేసింది. ప్రసిద్ కృష్ణను పక్కనబెట్టి మరీ అన్షుల్‌కు ప్లేయింగ్ 11లో అవకాశం ఇచ్చారు. డెబ్యూ ఆటగాడిగా ఎంట్రీ ఇచ్చిన అన్షుల్ తాను ఆడిన తొలి టెస్టులోనే అట్టర్ ఫ్లాప్ అయ్యాడు.

మాంచెస్టర్‌లోని ఓల్డ్ ట్రాఫోర్డ్ స్టేడియం వేదికగా జరుగుతున్న నాలుగో టెస్టులో అన్షుల్ కాంబోజ్ అరంగేట్రం చేశాడు. కెప్టెన్ శుభమన్ గిల్ మహమ్మద్ సిరాజ్‌ను కాదని అన్షుల్‌తో ముందు ఓవర్లు వేయించాడు. అయితే తక్కువ స్పీడ్‌తో బంతులు వేయడం, బాల్‌లో ఎలాంటి స్వింగ్ లేకపోవడంతో అన్షుల్‌ను ఇంగ్లిష్ బ్యాటర్లు చెడుగుడు ఆడేసుకున్నారు. అన్షుల్ బౌలింగ్‌లో ఇంగ్లండ్ ఆటగాళ్లు ఆడుతూ పాడుతూ పరుగులు తీశారు.

ఈ టెస్టులో అన్షుల్ కాంబోజ్ కేవలం 18 ఓవర్లు మాత్రమే బౌలింగ్ చేశాడు. 18 ఓవర్లలో ఒక మేడిన్ వేసి 4.9 యావరేజ్‌తో 89 పరుగులు ఇచ్చాడు. బెన్ డకెట్ వికెట్ తీసుకుని భారత్‌కు కొంత మేలు చేశాడు. ఈ టెస్టులో ఆఖరి వరకు కుల్దీప్ యాదవ్‌ను తీసుకుంటారని అందరూ అనుకున్నా.. స్పెషలిస్ట్ స్పిన్నర్‌ని కాదని అన్షుల్‌ని జట్టులోకి తీసుుకన్నాడు గౌతమ్ గంభీర్.

మాంచెస్టర్ పిచ్‌పై టీమిండియా స్పిన్నర్లు ఆరు వికెట్లు తీసుకోవడం విశేషం. రవీంద్ర జడేజా నాలుగు వికెట్లు పడగొట్టగా, వాషింగ్టన్ సుందర్ రెండు వికెట్లు తీసుకున్నాడు. ఒకవేళ అన్షుల్ కాంబోజ్‌ స్థానంలో కుల్దీప్ యాదవ్‌ని తీసుకుని ఉండుంటే ఇంగ్లండ్ జట్టు 669 పరుగులు చేసుండేది కాదని కొందరు అభిప్రాయపడుతున్నారు.

ఇంగ్లండ్ - ఇండియా మధ్య జరుగుతున్న ఈ టెస్టులో తొలుత బ్యాటింగ్ చేసిన భారత జట్టు 358 పరుగులు చేసింది. సాయి సుదర్శన్ 61, యశస్వి జైస్వాల్ 58, కేఎల్ రాహుల్ 46, రిషబ్ ఫంత్ 54 పరుగులు చేశారు. ఇంగ్లండ్ జట్టు తొలి ఇన్నింగ్స్‌లో 669 పరుగులు చేసింది. జో రూట్ 150, బెన్ స్టోక్స్ 141, బెన్ డకెట్ 94, జాక్ క్రాలీ 84 పరుగులతో రాణించారు. రెండో ఇన్నింగ్స్‌లో టీమిండియా ఆరంభంలోనే బోల్తా పడింది. ఓపెనర్ జైస్వాల్, ఫస్ట్ డౌన్ బ్యాటర్ సాయి సుదర్శన్ డకౌట్లు అయ్యారు. కెప్టెన్ గిల్, కేఎల్ రాహుల్ వికెట్ పడకుండా వంద పరుగుల భాగస్వామ్యం నెలకొల్పారు.