ఒక్క పరుగు చేయకుండానే 2 వికెట్లు కోల్పోయిన భారత్

భారత్‌తో జరుగుతున్న నాలుగో టెస్ట్‌లో ఇంగ్లాండ్‌ విజయం దిశగా బలమైన పునాది వేసింది. తొలి ఇన్నింగ్స్‌లో 669 పరుగుల భారీ స్కోరు చేసిన ఆతిథ్య ఇంగ్లాండ్.. ఈ మ్యాచ్‌లో తిరుగులేని స్థితిలో నిలిచింది. తొలి ఇన్నింగ్స్‌లో భారత్‌ను 358 పరుగులకు ఆలౌట్ చేసిన ఆ జట్టు.. 311 పరుగుల భారీ ఆధిక్యాన్ని సాధించింది. నాలుగో రోజు ఆటలో ఇంగ్లాండ్ కెప్టెన్ బెన్ స్టోక్స్.. సెంచరీతో రాణించారు.

544/7తో నాలుగో రోజు ఆట ప్రారంభించిన ఇంగ్లాండ్‌.. ఆదిలోనే వికెట్ కోల్పోయింది. అయినా.. వీలైనంత త్వరగా రన్స్ చేద్దామనే లక్ష్యంతో బ్యాటింగ్‌కు వచ్చిన బెన్‌స్టోక్స్.. అదే పని చేసి చూపించాడు. ఎడాపెడా ఫోర్లు, సిక్సర్లతో అదరగొట్టాడు. దీంతో ఇంగ్లాండ్ స్కోరు, తన స్కోరు వేగంగా పరుగులు పెట్టింది. ఈ క్రమంలోనే బెన్ స్టోక్స్ సెంచరీ పూర్తి చేసుకున్నాడు. ఇంగ్లాండ్ కూడా 600 పరుగుల మార్కును దాటింది.

ఈ మ్యాచ్‌లో మరోసారి బ్యాటింగ్ చేయకూడదని పట్టుదలతో ఉన్న ఇంగ్లాండ్ .. ఇన్నింగ్స్‌ను మాత్రం డిక్లేర్ చేయలేదు. చివరకు 669 పరుగులకు ఇంగ్లాండ్ ఆలౌట్ అయింది. బెన్ స్టోక్స్ (141), లియామ్ డాసన్ (26), బ్రైడన్ కార్స్ (47) ఇంగ్లాండ్ స్కోరు.. 600 పరుగుల మార్కు దాటడంలో కీలకపాత్ర పోషించారు. ఈ ప్రదర్శనతో ఆతిథ్య జట్టు.. టీమిండియా ముందు కొండంత స్కోరును ఉంచింది. భారత బౌలర్లలో జడేజా 4, బుమ్రా 2, సుందర్ 2, అన్షుల్ కాంబోజ్ 1, సిరాజ్ ఒక వికెట్ తీశారు.

అనంతరం రెండో ఇన్నింగ్స్ ప్రారంభించిన భారత్.. తొలి ఓవర్‌లోనే రెండు వికెట్లు కోల్పోయింది. ఇన్నింగ్స్‌ నాలుగో బంతికి క్రిస్ వోక్స్.. యశస్వి జైశ్వాల్‌ను బోల్తా కొట్టించాడు. అ తర్వాత బంతికే సాయి సుదర్శన్ కూడా ఔట్ అయ్యాడు. వీరిద్దరూ ఒక్క పరుగూ కూడా చేయకుండానే పెవిలియన్ చేరిపోయారు. ఆ తర్వాత శుభ్‌మన్ గిల్ క్రీజులోకి వచ్చాడు. కేఎల్ రాహుల్, గిల్ రెండు ఓవర్ల పాటు మరో వికెట్ పడకుండా జాగ్రత్త పడ్డారు. దీంతో నాలుగో రోజు లంచ్ సమయానికి భారత్.. 1/2తో నిలిచింది. ఈ మ్యాచ్‌లో భారత్ గెలిచే పరిస్థితి లేదు. కనీసం ఓడిపోకుండా ఉండాలన్నా.. ఇంకా 150 ఓవర్లు బ్యాటింగ్ చేయాల్సి ఉంది.