డబ్బు కోసం,,,,ఆస్ట్రేలియాలో భారతీయుడిపై టీనేజర్ల దాడి

ఆస్ట్రేలియాలోని మెల్బోర్న్‌లో ఒక హృదయ విదారక ఘటన చోటుచేసుకుంది. భారత సంతతికి చెందిన 33 ఏళ్ల సౌరభ్ ఆనంద్ అనే వ్యక్తిపై.. టీనేజ్ గ్యాంగ్ కత్తులతో అత్యంత క్రూరంగా దాడి చేసింది. ఈ దాడిలో సౌరభ్ చేతికి తీవ్ర గాయాలై.. చేయి తెగిపోయింది. విపరీతమైన రక్తమోడుతూ.. చేయి వేలాడగా.. విషయం గుర్తించిన స్థానికులు ఆస్పత్రికి తరలించారు. ఈ సంఘటన దేశవ్యాప్తంగా కలకలం సృష్టించింది.

జులై 19వ తేదీన ఆల్టోనా మెడోస్‌లోని సెంట్రల్ స్క్వేర్ షాపింగ్ సెంటర్‌లో ఈ దారుణం జరిగింది. సౌరభ్ ఆనంద్.. షాపింగ్ కోసం అక్కడకు వచ్చాడు. తనకు కావాల్సినవన్నీ తీసుకుని తిరుగు ప్రయాణం అయ్యాడు. ఈ సమయమంలోనే ఆయన తన స్నేహితుడితో ఫోన్ మాట్లాడుకుంటూ వెళ్తున్నాడు. అప్పుడే అకక్కడకు నలుగురు టీనేజర్లు వచ్చారు. నేరుగా వచ్చి సౌరభ్ ఆనంద్ చేతిలో ఓ వ్యక్తి చేతు పెట్టి డబ్బుల కోసం వెతక్కగా.. మరో ముగ్గురు అతడిని పట్టుకున్నారు. ఈక్రమంలోనే ఓ యువకుడు కత్తి తీసి సౌరభ్ ఆనంద్‌పై దాడి చేయడం ప్రారంభించాడు. అయితే ముఖానికి ఎలాంటి గాయాలు కాకుండా సౌరభ్ తన చేతిని అడ్డం పెట్టుకోగా.. మణికట్టుకు గాయం అయిది. కత్తి లోతుగా తెగడంతో.. చేయి మొత్తం కట్ అయంది. కేవలం తోలుతో మాత్రమే ఆ చేయి వేలాడుతూ కనిపించగా.. భయపడిపోయిన నిందితులు అక్కడి నుంచి పారిపోయారు.

ఈ దాడిలో సౌరభ్ ఆనంద్ చేయి తెగిపోవడంతో పాటు తలకి గాయాలు, ఎముకలు విరగడం, వెన్నెముకకు ఫ్రాక్చర్ అవడం వంటి తీవ్ర గాయాలు అయ్యాయి. అయితే విషయం గుర్తించిన స్థానికులు వెంటనే అతడిని ఆస్పత్రికి తరలించారు. ఈక్రమంలోనే వైద్యులు అతడికి మెరుగైన వైద్య సేవలు అందించారు. ముఖ్యంగా తెగిపోయిన అతడి చేతిని పూర్తిగా తొలగించాలనుకున్నారు. కానీ.. స్క్రూలు వంటి వాటితో అతడి చేయిని తిరిగి విజయవంతంగా అతికించగలిగారు. ఇందుకోసం కొన్ని గంటలపాటు నిరంతరంగా శస్త్రచికిత్స చేశారు. అయితే ఈ ఘటన శారీరక గాయాలతో పాటు సౌరభ్‌పై తీవ్రమైన మానసిక ప్రభావం చూపింది. ప్రస్తుతం అతను పీడకలలతో బాధ పడుతున్నాడని, తన ఇంటికి తిరిగి వెళ్లడానికి కూడా భయపడుతున్నాడని ఆయన భార్య తెలిపారు. ఆమె కూడా తీవ్రంగా వణికిపోతూ.. క్షణ క్షణం ఆందోళనతో తీవ్ర ఒత్తిడికి గురవుతున్నట్లు వెల్లడించారు.

ఈ దారుణ దాడికి సంబంధించి పలువురు టీనేజర్లను పోలీసులు అరెస్టు చేశారు. వారిలో ఒక 14 ఏళ్ల బాలుడిని అదుపులోకి తీసుకోగా.. ఇద్దరు 15 ఏళ్ల బాలురపై కేసులు నమోదు చేసి బెయిల్‌పై విడుదల చేశారు. నిందితులకు బెయిల్ లభించడం సౌరభ్ ఆనంద్‌కు మరింత ఆవేదన కలిగించింది. ఇటువంటి దారుణమైన నేరానికి పాల్పడిన వారికి సులువుగా బెయిల్ లభించడం న్యాయ వ్యవస్థపై అనుమానాలను రేకెత్తిస్తోందని ఆయన ఆవేదన వ్యక్తం చేశారు. ఆస్ట్రేలియాలో పెరుగుతున్న యువకుల గ్యాంగ్ నేరాలు, ముఖ్యంగా భారతీయ మూలాలున్న వారిపై జరుగుతున్న దాడులు అక్కడి భద్రతా పరిస్థితులపై ప్రశ్నలు లేవనెత్తుతున్నాయి.