"ఆడ్నీ అలా వదిలేయకండ్రా" – గవాస్కర్ ఆవేదనతో స్పందన

టీమిండియా ఓపెనర్ యశస్వి జైస్వాల్ (2) మళ్లీ ఓసారి తీవ్రంగా నిరాశపర్చాడు. గురువారం ఓవల్ వేదికగా ప్రారంభమైన ఇంగ్లండ్‌తో చివరి టెస్ట్‌లో, తొలి ఇన్నింగ్స్‌ ఆరంభంలోనే ఎల్బీడబ్ల్యూగా వెనుదిరిగాడు.గస్ అట్కిన్సన్ వేసిన బంతిని అంచనా వేయలేక వికెట్ల ముందు చిక్కుకున్నాడు. ఈ టెస్ట్ సిరీస్‌ను సెంచరీతో ఆరంభించిన జైస్వాల్, ఆ తర్వాత స్థిరంగా రాణించలేకపోయాడు.సునీల్ గవాస్కర్ ప్రకారం, యశస్వి బ్యాటింగ్‌లో సాంకేతిక లోపం కారణంగా అడ్డంకులు ఎదురవుతున్నాయని చెప్పారు. సోనీ స్పోర్ట్స్‌లో మాట్లాడిన గవాస్కర్,"అరౌండ్ ది వికెట్ వస్తున్న బంతులకు అతను ఇబ్బంది పడుతున్నాడు. అతడి ఆటలో కొంత అనిశ్చితి కనిపిస్తోంది. బహుశా అతని ఆత్మవిశ్వాసం తగ్గినట్లుగా అనిపిస్తోంది. మొదటి టెస్ట్‌లో సెంచరీ చేసిన తర్వాత స్థిరత లేకుండా పోయింది. అతని ఫ్రంట్ ఫుట్ వేగంగా ముందుకు రాకపోవడం ఓ ప్రధాన కారణం. ఎవరో అతనితో కూర్చొని, అతడి ఫుట్‌వర్క్, భుజాల స్థానాన్ని సరిచేయాల్సిన అవసరం ఉంది," అని పేర్కొన్నారు.మ్యాచ్ విషయానికొస్తే, టాస్ ఓడి బ్యాటింగ్‌కు దిగిన భారత్‌కు ఆరంభంలోనే ఎదురుదెబ్బ తగిలింది. ఓపెనర్లు యశస్వి జైస్వాల్ (2), కేఎల్ రాహుల్ (14) వేగంగా పెవిలియన్ చేరారు. అట్కిన్సన్ వేసిన బంతికి జైస్వాల్ ఎల్బీడబ్ల్యుగా అవుట్ కాగా, రాహుల్‌ను క్రిస్ వోక్స్ క్లీన్‌బౌల్డ్ చేశాడు.ఆపై వచ్చిన సాయి సుదర్శన్ మరియు రాహుల్ జాగ్రత్తగా ఆడే ప్రయత్నం చేశారు. అయితే వర్షం అంతరాయం కలిగించడంతో అంపైర్లు ముందుగానే లంచ్ బ్రేక్ ప్రకటించారు. అప్పుడు భారత్ స్కోరు 23 ఓవర్లలో 72/2.తర్వాత ఆట తిరిగి ప్రారంభమైన వెంటనే శుభ్‌మన్ గిల్ రనౌట్ అయ్యాడు. వెంటనే మళ్లీ వర్షం కురవడంతో 85/3 వద్ద భారత్ మైదానం విడిచింది. భారీ వర్షం, తడిగా మారిన ఔట్‌ఫీల్డ్ కారణంగా దాదాపు రెండు గంటల ఆటకు అంతరాయం ఏర్పడింది.ఆ తర్వాత తిరిగి బరిలోకి దిగిన సాయి సుదర్శన్ (38), కరుణ్ నాయర్ స్టేడీలో నిలకడగా ఆడే ప్రయత్నం చేశారు. కానీ జోష్ టంగ్ బౌలింగ్‌లో సుదర్శన్ క్యాచ్ అయ్యాడు. కొంతకాలానికే రవీంద్ర జడేజా (9) కూడా టంగ్ బౌలింగ్‌లో అవుట్ అయ్యాడు. ధ్రువ్ జురెల్ (19) కూడా ఆకట్టుకోలేకపోయాడు. చివరికి వాషింగ్టన్ సుందర్ మరియు కరుణ్ నాయర్ భారత్ ఇన్నింగ్స్‌ను కాపాడే ప్రయత్నం చేస్తున్నారు.