అమెరికాకు స్మార్ట్‌ఫోన్ల ఎగుమతిలో చైనాను అధిగమించిన భారత్

అంతర్జాతీయ స్మార్ట్‌ఫోన్ల తయారీ రంగంలో భారత్ సరికొత్త చరిత్ర సృష్టించింది. ఇప్పటివరకు ఈ మార్కెట్లో తిరుగులేని ఆధిపత్యం చెలాయించిన చైనాను వెనక్కి నెట్టి, అమెరికాకు అతిపెద్ద స్మార్ట్‌ఫోన్ల సరఫరాదారుగా అవతరించింది. అమెరికా-చైనా మధ్య కొనసాగుతున్న వాణిజ్య ఉద్రిక్తతలు, సప్లై చైన్లలో వస్తున్న మార్పుల నేపథ్యంలో ఈ కీలక పరిణామం చోటుచేసుకుంది.ప్రముఖ రీసెర్చ్ సంస్థ 'కెనాలిస్' విడుదల చేసిన తాజా గణాంకాల ప్రకారం, 2025 రెండో త్రైమాసికంలో (ఏప్రిల్-జూన్) అమెరికాకు దిగుమతి అయిన స్మార్ట్‌ఫోన్లలో 44 శాతం భారత్‌లోనే తయారయ్యాయి. వియత్నాం 30 శాతంతో రెండో స్థానంలో నిలవగా, ఒకప్పుడు అగ్రస్థానంలో ఉన్న చైనా 25 శాతం వాటాతో మూడో స్థానానికి పడిపోయింది. గతేడాది ఇదే సమయంతో పోలిస్తే ఈ మార్పు చాలా స్పష్టంగా కనిపిస్తోంది. 2024 రెండో త్రైమాసికంలో అమెరికాకు స్మార్ట్‌ఫోన్ల ఎగుమతిలో చైనా వాటా 61 శాతం ఉండగా, భారత్ వాటా కేవలం 13 శాతంగా మాత్రమే ఉండేది. ఏడాది వ్యవధిలోనే భారత్‌లో తయారైన స్మార్ట్‌ఫోన్ల ఎగుమతి ఏకంగా 240 శాతం పెరగడం గమనార్హం.చైనాపై అమెరికా విధించిన భారీ సుంకాలే ఈ మార్పుకు ప్రధాన కారణంగా నిలుస్తోంది. ట్రంప్ హయాంలో చైనా వస్తువులపై టారిఫ్‌లు 145 శాతం వరకు పెరిగాయి. ప్రస్తుతం అవి 30 శాతానికి తగ్గినా, అనిశ్చితి కొనసాగుతూనే ఉంది. దీంతో ఆపిల్, శాంసంగ్, మోటొరోలా వంటి దిగ్గజ కంపెనీలు తమ సరఫరా గొలుసులను చైనా నుంచి భారత్, వియత్నాం వంటి దేశాలకు వేగంగా తరలిస్తున్నాయి.ఇదిలా ఉండగా, అమెరికా అధ్యక్షుడు డొనాల్డ్ ట్రంప్ బుధవారం ఓ కీలక ప్రకటన చేశారు. రష్యా నుంచి భారత్ చమురు కొనుగోలు చేస్తున్న కారణంగా భారత వస్తువులపై 25 శాతం టారిఫ్, అదనంగా పెనాల్టీ పన్ను విధిస్తున్నట్లు తెలిపారు. వియత్నాంపై కూడా 20 శాతం సుంకాలు ఉంటాయని స్పష్టం చేశారు. దాదాపు అన్ని దేశాలను ప్రభావితం చేసే ఈ కొత్త వాణిజ్య విధానాన్ని ఆగస్టు 1న వైట్‌హౌస్ ప్రకటించగా, ఇది ఆగస్టు 7 నుంచి అధికారికంగా అమల్లోకి రానుంది. ఈ కొత్త సుంకాల ప్రభావం భవిష్యత్తులో సరఫరా గొలుసులపై ఎలా ఉంటుందో వేచి చూడాలి.