డ్రైవర్ రాయుడు హత్య కేసు.. కోట వినుతకు బెయిల్.. కానీ

శ్రీకాళహస్తి జనసేన మాజీ ఇంఛార్జి కోట వినుత డ్రైవర్ హత్య కేసు రాష్ట్రవ్యా్ప్తంగా ఎంత సంచలనం రేపిందో తెలిసిన సంగతే. డ్రైవర్ రాయుడు హత్య కేసులో కోట వినుతతో పాటు ఆమె భర్త చంద్రబాబును కూడా తమిళనాడు పోలీసులు అరెస్ట్ చేశారు. అయితే తాజాగా రాయుడు హత్య కేసులో కోట వినుతకు బెయిల్ లభించింది. రాయుడు హత్య కేసులో ఏ3గా ఉన్న కోట వినుతకు చెన్నై సెషన్స్ కోర్ట్ షరతులతో కూడిన బెయిల్ మంజూరు చేసింది. జూలై ఏడో తేదీన రాయుడు హత్య జరిగింది. ఈ కేసు విచారణలో భాగంగా చెన్నై పోలీసులు ఐదుగురిని అరెస్ట్ చేశారు. ఈ కేసులో కోట వినుత భర్త చంద్రబాబును ఏ1గా పోలీసులు పేర్కొన్నారు. A2 షేక్ దాసన్, A3. వినుత కోట, A4. శివకుమార్, A5. గోపి. అనే వ్యక్తుల పేర్లను ఉంచారు.

అయితే ఈ కేసులో కోట వినుత దంపతులను జూలై నెలలో పోలీసులు అరెస్ట్ చేశారు. అనంతరం కోట వినుత బెయిల్ పిటిషన్ మీద విచారణ జరిపిన చెన్నై సెషన్స్ కోర్టు.. ఆమెకు బెయిల మంజూరు చేసింది. కోట వినుతకు ఆగస్ట్ 6వ తేదీ చెన్నై సెషన్స్ కోర్టు బెయిల్ ఇచ్చినట్లు తెలిసింది. తాము అనుమతించే వరకు ప్రతిరోజు ఉదయం 10 గంటల లోపు సెవెన్ వెల్స్ పోలీస్ స్టేషన్లో సంతకాలు చేయాలని కోర్టు ఆదేశించింది. దీంతో ఆగస్ట్ 7, 8వ తేదీలలో కోట వినుత పోలీస్ స్టేషన్లలో సంతకాలు చేశారు. ఈ కేసుకు సంబంధించిన పూర్తి వివరాల్లోకి వెళ్తే.. జూలై 8వ తేదీన చెన్నైలోని కూవం నది వద్ద ఓ మృతదేహాన్ని చెన్నై పోలీసులు గుర్తించారు. దీనిపై దర్యా్ప్తు జరిపిన పోలీసులు.. ఈ వ్యవహారంలో కోట వినుత సహా ఐదుగురిని అరెస్టు చేశారు.

చనిపోయింది శ్రీకాళహస్తి మండలం బొక్కసంపాలెనికి చెందిన శ్రీనివాసులు అలియాస్ రాయుడిగా గుర్తించారు. రాయుడు కోట వినుత దంపతుల వద్ద డ్రైవర్‌గా పనిచేస్తుంటారని తెలిసింది. దీంతో ఈ కేసులో కోట వినుత, చంద్రబాబు, కారు డ్రైవర్ షేక్ దాసన్, సహాయకుడు గోపి, శివకుమార్‌లను అరెస్టు చేశారు. జూలై 7వ తేదీ శ్రీనివాసులు అలియాస్ రాయుడును హత్య చేసి.. మృతదేహాన్ని కారులో చెన్నైకు తరలించి, కూవం నది వద్ద పారేసినట్లు పోలీసులు తెలిపారు. ఈ ఘటన తర్వాత కోట వినుతను జనసేన పార్టీ సస్పెండ్ చేసింది. ఇంఛార్జి పదవి నుంచి తప్పించింది.