బంగాళాఖాతంలో అల్పపీడనం ఏర్పడే ఛాన్స్.. ఈ ప్రాంతాలలో భారీ వానలు.. జాగ్రత్త!

ఆంధ్రప్రదేశ్‌లో శనివారం రోజున కొన్ని జిల్లాలలో మోస్తారు నుంచి భారీ వర్షాలు కురవనున్నాయి. ఈ విషయాన్ని ఏపీ విపత్తుల నిర్వహణ సంస్థ వెల్లడించింది. దక్షిణ కోస్తాంధ్ర నుంచి ఉత్తర శ్రీలంక వరకు తమిళనాడు తీరం మీదుగా ద్రోణి కొనసాగుతోందని ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. ఈ ద్రోణి కారణంగా ఆగస్ట్ 13 (బుధవారం) నాటికి వాయువ్య బంగాళాఖాతం, దానిని ఆనుకుని ఉన్న పశ్చిమ మధ్య బంగాళాఖాతంలో అల్పపీడనం ఏర్పడేందుకు అవకాశం ఉందని అంచనా వేశారు.

అలాగే శనివారం రోజున ప్రకాశం, నెల్లూరు, కర్నూలు, నంద్యాల, చిత్తూరు, తిరుపతి జిల్లాల్లో అక్కడక్కడా పిడుగులతో కూడిన మోస్తారు నుంచి భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ అంచనా వేసింది. మిగతా జిల్లాల్లో తేలికపాటి నుంచి మోస్తారు వర్షాలు కురిసే అవకాశం ఉందని వెల్లడించింది. పిడుగులతో కూడిన భారీ వర్షాల నేపథ్యంలోప్రజలు అప్రమత్తంగా ఉండాలని సూచించింది.

మరోవైపు కొన్ని చోట్ల వర్షం కురుస్తున్నప్పటికీ మరికొన్ని ప్రాంతాలలో వేసవి తరహా వాతావరణ పరిస్థితులు కొనసాగుతున్నాయి. ఆగస్ట్ నెల ప్రారంభం నుంచి ఇదే తరహా వాతావరణం కొనసాగుతోంది. దీంతో ప్రజలు కాస్త ఇబ్బందులు పడుతున్నారు. అయితే బంగాళాఖాతంలో ఉపరితల ఆవర్తనం ప్రభావంతో శనివారం నుంచి రాష్ట్రంలో వర్షాలు జోరందుకుంటాయని వాతావరణ శాఖ అధికారులు చెప్తున్నారు. రాబోయే రెండు వారాల్లో ఎక్కువ రోజులు వానలు పడే అవకాశం ఉందని చెప్తున్నారు. దీంతో ఎండ తీవ్రత తగ్గుతుందని చెప్తున్నారు. ఆగస్ట్ 13 నాటికి బంగాళాఖాతంలో అల్పపీడనం ఏర్పడుతుందని.. ఆ తర్వాత అల్పపీడనాలు ఏర్పడే అవకాశం ఉందని అంచనా వేస్తున్నారు.

మరోవైపు రాష్ట్రంలోని నైరుతి రుతుపవనాలు ప్రవేశించినప్పటికీ ఇప్పటి వరకూ చెప్పుకోదగ్గ స్థాయిలో వర్షాలు కురవలేదు. జూన్‌ 1 నుంచి ఇప్పటి వరకు ఆంధ్రప్రదేశ్ వ్యాప్తంగా సగటున 288.8 మిల్లీమీటర్ల వర్షం కురవాల్సింది. అయితే కేవలం 215.6 మి.మీ. నమోదైనట్లు అధికారులు చెప్తున్నారు. ఆగస్టులో విస్తారంగా వర్షాలు కురుస్తాయని.. సెప్టెంబరు చివరి నాటికి సాధారణం కంటే ఎక్కువ వర్షపాతం నమోదయ్యే అవకాశం ఉందని వాతావరణ శాఖ అధికారులు అంచనా వేస్తున్నారు. అలాగే శనివారం, మంగళ, బుధవారాల్లో రాష్ట్రంలో కొన్నిచోట్ల భారీ వర్షాలు కురిసే అవకాశముందని అమరావతి వాతావరణ కేంద్రం అంచనా వేసింది.