3 నెలల ముందే మెక్‌గ్రాత్ వర్సెస్ బ్రాడ్ మాటల యుద్ధం

యాషెస్ సిరీస్ ప్రారంభానికి సుమారు 100 రోజుల ముందే ఇరు జట్ల మధ్య మాటల యుద్ధం మొదలైంది. ప్రతిష్టాత్మక ఈ సిరీస్‌లో ఇంగ్లాండ్, ఆస్ట్రేలియా జట్లు తలపడనున్నాయి. ప్రపంచ క్రికెట్‌లో భారత్- పాకిస్థాన్ మ్యాచుకు ఎలాంటి క్రేజ్ ఉంటుందో.. అదే రేంజ్‌లో ఈ సిరీస్‌కు కూడా ఆదరణ ఉంటుంది. ఈ నేపథ్యంలో రెండు జట్లూ కూడా ఈ సిరీస్‌ను ప్రతిష్టాత్మకంగా తీసుకుంటాయి. అయితే ఇరు జట్ల మాజీలు కూడా ఈ సిరీస్‌పై ఫోకస్ చేస్తుంటారు. ఈ క్రమంలోనే మాటల యుద్ధాలు కూడా జరుగుతుంటాయి. ఈ సారి కూడా అలాంటి పరిస్థితే కనిపిస్తోంది.

నవంబర్ 21 నుంచి ఆస్ట్రేలియా వేదికగా ఈ టెస్ట్ సిరీస్ ప్రారంభం కానుంది. అందుకు సమారు ఇంకా మూడు నెలలకు పైగా టైమ్ అయింది. అయితే ఇటీవల ఓ ఇంటర్వ్యూలో మాట్లాడిన ఆస్ట్రేలియా దిగ్గజ పేసర్ గ్లెన్ మెక్‌గ్రాత్ .. సిరీస్ ఎలా ఉండబోతుందో అంచనా వేశాడు. ఈ సిరీస్‌లో తమ జట్టే విజయం సాధిస్తుందని.. క్లీన్ స్వీప్ చేస్తుందని జోస్యం చెప్పాడు.

"నేను ఒక జట్టు జయాపజయాలపై అంచనా వేయడం ఇదే తొలిసారి. ఈసారి యాషెస్ సిరీస్‌లో ఆస్ట్రేలియా 5-0తో గెలవడం ఖాయం. ఇది తప్ప నాకు వేరే ఫలితం కనిపించడం లేదు. ఈ విషయంలో మా జట్టు మీద నాకు పూర్తి నమ్మకం ఉంది. ప్యాట్ కమిన్స్, మిచెల్ స్టార్క్, జోష్ హేజిల్‌వుడ్, నాథన్ లైయాన్ సొంతగడ్డపై సత్తాచాటేందుకు రెడీగా ఉన్నారు. వారిని ఎదుర్కోవడం ఇంగ్లాండ్ బ్యాటర్లకు చాలా కష్టం" అని మెక్ గ్రాత్ వ్యాఖ్యానించాడు. ఇటీవల సొంతగడ్డపై భారత్‌తో సిరీస్‌ను ఇంగ్లాండ్ 2-2తో సమం చేసుకున్న తర్వాత అతడు ఈ వ్యాఖ్యలు చేశాడు.

దీనిపై ఇంగ్లాండ్ మాజీ పేసర్ స్టువర్ట్ బ్రాడ్ స్పందించాడు. "ఇది ఇంకా ఆగస్టే.. కనీసం మేం మీ దేశంలో అడుగుపెట్టేవరకైనా ఆగు గ్లెన్ మెక్‌గ్రాత్" అని కౌంటర్ ఇచ్చాడు. కాగా ఇటీవల కాలంలో యాషెస్‌లో ఆస్ట్రేలియా ఆధిపత్యం ప్రదర్శిస్తోంది. 2015 నుంచి యాషెస్ సిరీస్‌లో ఇంగ్లాండ్ విజేతగా నిలవలేదు. మరీ ముఖ్యంగా రెండు దశాబ్దాలుగా ఆస్ట్రేలియా గడ్డపై సిరీస్ గెలవలేదు. 2021-22లో ఆస్ట్రేలియాలో జరిగిన సిరీస్‌లో 0-4 తేడాతో ఇంగ్లాండ్ ఓడిపోయింది. రెండేళ్ల తర్వాత తమ దేశంలో జరిగిన యాషెస్ సిరీస్‌ను 2-2తో డ్రా చేసుకుంది.