జెర్సీల వేలంలోనూ గిల్‌దే హవా.. రూ.5.41 లక్షలు పలికిన టీమిండియా కెప్టెన్ టీషర్ట్

భారత్, ఇంగ్లాండ్ జట్ల మధ్య జరిగిన టెస్ట్ సిరీస్‌లో టీమిండియా కెప్టెన్ శుభ్‌మన గిల్ పరుగుల వరద పారించిన విషయం తెలిసిందే. ఈ సిరీస్‌లో అత్యధికంగా అతడు.. 754 పరుగులు స్కోరు చేశాడు. ఇందులో ఒక డబుల్ సెంచరీ, మూడు సెంచరీలు ఉన్నాయి. దీంతో పలు రికార్డులను గిల్ బద్దలు కొట్టాడు. టెస్ట్ సిరీస్ 2-2తో సమం కావడంలో కీలకపాత్ర పోషించాడు. తాజాగా అతడు మరో రికార్డు క్రియేట్ చేశాడు. పరుగుల్లోనే కాదు.. వేలంలోనూ అగ్రస్థానంలో నిలిచాడు.

భారత్, ఇంగ్లాండ్ టెస్ట్ సిరీస్‌లో పాల్గొన్న ఆటగాళ్లకు సంబంధించిన జెర్సీలను ఇంగ్లాండ్‌లో వేలం నిర్వహించారు. ఆటగాళ్ల జెర్సీలు, టోపీలను ఇంగ్లాండ్ మాజీ ప్లేయర్ ఆండ్రూ స్ట్రాస్‌కు చెందిన రూత్‌స్ట్రాస్ ఫౌండేషన్ ఆధ్వర్యంలో వేలం నిర్వహించారు. ఇందులో లార్డ్స్ టెస్ట్‌లో గిల్ ధరించిన జెర్సీ అత్యధిక ధర పలికింది. టీమిండియా కెప్టెన్ గిల్ సంతకం చేసిన ఈ జెర్సీ 4600 యూరోలకు అంటే.. భారత కరెన్సీలో రూ.5.41 లక్షల ధర పలికింది. దీంతో ఈ వేలంలో అత్యంత ధర పలికిన వస్తువుగా నిలిచింది.

మిగతా ఆటగాళ్ల విషయానికి వస్తే.. రవీంద్ర జడేజా, జస్‌ప్రీత్ బుమ్రా ధరించిన జెర్సీలు రూ.4.94 లక్షల చొప్పున ధర పలికాయి. రిషభ్ పంత్ జెర్సీ రూ.4 లక్షలు పలికింది. ఆతిథ్య ఇంగ్లాండ్ ప్లేయర్లలో జో రూట్ జెర్సీ రూ.4.47 లక్షలు, కెప్టెన్ బెన్ స్టోక్స్ రూ.4 లక్షలు పలికింది. భారత వికెట్ కీపర్, బ్యాటర్ రిషభ్ పంత్ క్యాప్ రూ.1.76 లక్షలు.. కేఎల్ రాహుల్ జెర్సీ రూ.4.70 లక్షలకు అమ్ముడైంది.

ఇంగ్లాండ్ మాజీ కెప్టెన్ ఆండ్రూ స్ట్రాస్‌ భార్య రూత్ స్ట్రాస్ స్మారకార్థం ‘రెడ్ ఫర్ రూత్’ ఫౌండేషన్‌ స్థాపించారు. రూత్ స్ట్రాస్ ఊపిరితిత్తుల క్యాన్సర్‌తో చనిపోయారు. స్మోకింగ్‌కు వ్యతిరేకంగా అవగాహన కల్పించడం, క్యాన్సర్ బాధితులకు సపోర్ట్ అందించడం ఈ ఫౌండేషన్ ముఖ్యం లక్ష్యం. ఇందులో భాగంగానే.. భారత్, ఇంగ్లాండ్ టెస్ట్ సిరీస్‌లో భాగంగా లార్డ్స్‌లో ఆటగాళ్లు ధరించిన జెర్సీలను వేలం వేశారు. ఇందులో వచ్చిన మొత్తాన్ని ఫౌండేషన్‌కు అందజేస్తారు.