టర్కీలో భారీ భూకంపం.. కుప్పకూలిన భవనాలు

టర్కీలో మరోసారి భూకంపం సంభవించింది. పశ్చిమ టర్కీలోని పలు ప్రాంతాలను 6.1 తీవ్రతతో కూడిన శక్తివంతమైన భూకంపం వణికించింది. దీనితో రాజధాని ఇస్తాంబుల్, ఇజ్మీర్ వంటి ప్రధాన నగరాల్లోనూ తీవ్ర ప్రకంపనలు సంభవించాయి. స్థానిక కాలమానం ప్రకారం ఆదివారం సాయంత్రం సంభవించిన ఈ భూకంపం ప్రజల్లో తీవ్ర భయాందోళనలను సృష్టించింది. చాలా మంది తమ ఇళ్ల నుంచి భయంతో బయటకు పరుగులు తీశారు. ఈ భూకంపం కారణంగా ఇప్పటివరకు ఓ యువతి ప్రాణాలు కోల్పోగా.. గణనీయమైన ఆస్తి నష్టం గురించి ఎలాంటి సమాచారం లేదని అధికారులు వెల్లడించారు.

టర్కీ విపత్తు నిర్వహణ సంస్థ ప్రకారం.. ఈ భూకంపం బలికేసిర్ ప్రావిన్స్‌లోని సిందిర్గి జిల్లాలో కేంద్రీకృతమైంది. భూమి లోపల 11 కిలో మీటర్ల లోతులో దీని కేంద్రం ఉన్నట్లు గుర్తించారు. జర్మన్ రీసెర్చ్ సెంటర్ ఫర్ జియోసైన్సెస్ (GFZ) ఈ భూకంప తీవ్రతను 6.19గా, లోతును 10 కిలో మీటర్లుగా అంచనా వేసింది. ప్రధాన భూకంపం తర్వాత 4.6 తీవ్రతతో సహా అనేక చిన్న ప్రకంపనలు సంభవించాయి. ఇది ప్రజల్లో ఆందోళనను మరింత పెంచింది.

ఈ భూకంపం దాదాపు 200 కిలో మీటర్ల దూరంలో ఉన్న ఇస్తాంబుల్ నగరంలో కూడా చాలా స్పష్టంగా అనుభవించినట్లు అధికారులు వివరించారు. అలాగే భూకంపం కేంద్రమైన సిందిర్గి జిల్లాలో ఒక భవనం కూలిపోయినట్లు స్థానిక మీడియా నివేదించింది. అంతర్గత వ్యవహారాల మంత్రి అలీ యెర్లికాయ మాట్లాడుతూ.. అత్యవసర బృందాలు ప్రభావిత ప్రాంతాలను పరిశీలిస్తున్నాయని, ఇప్పటి వరకు ఎటువంటి ప్రతికూల నివేదికలు రాలేదని పేర్కొన్నారు.

టర్కీ ఒక ప్రధాన భూకంప జోన్‌లో ఉంది. అందుకే అక్కడ తరచుగా భూకంపాలు సంభవిస్తుంటాయి. గతంలో 2023లో సంభవించిన 7.8 తీవ్రతతో కూడిన భారీ భూకంపం టర్కీ, సిరియా దేశాల్లో 53,000 మందికి పైగా ప్రాణాలను బలిగొంది. ఆ విషాదాన్ని ఈ సందర్భంగా అధికారులు గుర్తు చేసుకున్నారు. ఈ నేపథ్యంలో తాజా భూకంపం సంభవించడంతో ప్రజలు ఆందోళన చెందుతున్నారు. అధికారులు భద్రతా చర్యలను, ప్రజలకు సహాయక కార్యక్రమాలను వేగవంతం చేశారు. భూకంపం వల్ల జరిగిన నష్టంపై పూర్తి వివరాలు ఇంకా వెల్లడి కావాల్సి ఉంది.