ట్యాక్స్ రీఫండ్ తక్కువ వస్తే ఎలా? ఐటీ శాఖ కీలక సూచన

 మీరు ఆదాయపు పన్ను రిటర్న్స్ ఫైల్ చేసి ఇ-వెరిఫికేషన్ పూర్తి చేసిన తర్వాతే ఐటీ శాఖ ప్రాసెసింగ్ పూర్తి చేస్తుంది. ఇప్పటికే రెండు కోట్ల మందికిపైగా ట్యాక్స్ పేయర్లు రిటర్నులు ఫైల్ చేశారు. అందులో 90 శాతం వరకు రిటర్నులు ప్రాసెసింగ్ సైతం పూర్తయినట్లు తెలుస్తోంది. వారందరూ రీఫండ్ కోసం ఎదురుచూస్తున్నారు. సాధారణంగా ప్రాసెసింగ్ పూర్తయిన 4-5 వారాల్లో ట్యాక్స్ పేయర్ల అకౌంట్లలో రీఫండ్ డబ్బులు జమ చేస్తారు. అయితే అంతకన్నా ముందే ఆదాయపు పన్ను చెల్లింపుదారులకు ప్రాసెసింగ్ పూర్తయినట్లు ఆదాయపు పన్ను చట్టం సెక్షన్ 143(1) కింద మెయిల్స్‌ ద్వారా వివరాలు పంపుతుంది. ఇ-ఫైలింగ్ పొర్టల్‌ ద్వారానూ ఐటీఆర్ స్టేటస్ తనిఖీ చేయవచ్చు. అందులో మీకు ఎంత పన్ను ఉంటుంది, రీఫండ్ ఎంత వస్తుంది అనేది తెలుసుకోవాలి.

మీకు కూడా సెక్షన్ 143(1) కింద ఇన్ఫర్మేషన్ నోటీసు వస్తే అందులో మీకు రావాల్సిన రీఫండ్ వివరాలు ఉంటాయి. అయితే మీకు రావాల్సిన దానికంటే తక్కువ రీఫండ్ చూపించినట్లయితే ఓసారి తనిఖీ చేసుకోవాలి. మీరు ఐటీ శాఖ ఎలాంటివి పరిగణనలోకి తీసుకుని పన్ను లెక్కించిందని చెక్ చేసుకోవాలి. ఒకవేళ తప్పుగా లెక్కగట్టినట్లు గుర్తిస్తే మీరు అనుకున్న రీఫండ్ పొందవచ్చు. ఐటీ చట్టం 1961, సెక్షన్ 154 కింద దిద్దుబాటు అభ్యర్థన చేసి పొందవచ్చు.

 'ఐటీ శాఖ సెక్షన్ 143(1)కింద వచ్చిన నోటీసులో రీఫండ్ లెక్కల్లో ఏవైనా తప్పులు గుర్తించినట్లయితే సరిచేసి సరైన రీఫండ్ ఇవ్వాలంటూ సెక్షన్ 154 కింద రిక్వెస్ట్ చేయవచ్చు. ఇ-ఫైలింగ్ వెబ్‌‍సైట్ ద్వారా రెక్టిఫికేషన్ రిక్వెస్ట్ చేయొచ్చు. అయితే ఇప్పటికే సెంట్రల్ ప్రాసెసింగ్ కమిటీ ప్రాసెసింగ్ పూర్తి చేసిన రిటర్నులకు మాత్రమే రిక్వెస్ట్ చేయవచ్చు. మిగితా వారికి అవకాశం ఉండదు. సరైన ఆధారాలు చూపించించాల్సి ఉంటుంది. ఇతర తప్పులు చోటు చేసుకున్నప్పుడు రెక్టిఫికేషన్ రిక్వెస్ట్ చేయడానికి లేదు. ఆర్థిక సంవత్సరం పూర్తయిన 4 సంవత్సరాల తర్వాత ఇలా దిద్దుబాటు రిక్వెట్ చేసేందుకు అవకాశం ఉండదు. మీ రెక్టిఫికేషన్ రిక్వెస్ట్‌ను సైతం ఇ-వెరిఫై చేయాలి' అని ఆదాయపు పన్ను శాఖ సూచిస్తోంది.

ఐటీ శాఖ పేర్కొన్న వివరాల ప్రకారం.. మూడు రకాలుగా రెక్టిఫికేషన్ రిక్వెస్ట్ చేసుకోవచ్చు. రీప్రాసెస్ రిటర్న్స్, ట్యాక్స్ క్రెడిట్‌లోని పొరపాట్లు సవరించడం, రిటర్నుల్లో డేటా సవరణ రిక్వెస్ట్ చేయవచ్చు. సెక్షన్ 143 కింద వచ్చిన నోటీసుల్లో రీఫండ్, వడ్డీ వివరాలు ఉంటాయి. మీ ఆదాయపు పన్ను రిటర్నుల్లో సమాచారం, ఐటీ శాఖ రికార్డుల్లో సమాచారంలో ఏవైనా వ్యత్యాసాలు ఉంటే నోటీసులు ఇస్తారు.