పిల్లలు పుట్టకపోవడంతో.. సభ్యసమాజం తలదించుకునే పని

వారిద్దరిదీ లేట్ మ్యారేజ్. ఒక సంవత్సరం క్రితం 40 ఏళ్ల వయసులో వారిద్దరూ పెద్దల సమక్షంలోనే పెళ్లాడారు. ఆరు నెలలపాటు వారి కాపురం అన్యోన్యంగానే సాగింది. అయితే పెళ్లి జరిగి ఆరు నెలలు దాటినా కోడలు గర్భం దాల్చకపోవడం.. అందులోనూ వయసు కూడా ఎక్కువగా ఉండటంతో హాస్పిటల్‌కు వెళ్లమని అత్తగారు సూచించింది. దీంతో దంపతులు ఇద్దరూ ఆస్పత్రికి వెళ్లగా.. పరీక్షించిన వైద్యులు భర్తకు స్పెర్మ్ కౌంట్ తక్కువగా ఉందని, అందుకే పిల్లలు పుట్టడం లేదని తెలిపారు.

ఐవీఎఫ్ చేయించుకుంటే ఫలితం ఉంటుందని వైద్యులు సూచించారు. దీంతో ఆ మహిళ ఐవీఎఫ్ చేయించుకుంది. అయినా లాభం లేకపోవడంతో.. ఎవరినైనా దత్తత తెచ్చుకుని పెంచుకుందామని అత్తింటి వారికి చెప్పింది. కానీ వారు అందుకు అంగీకరించలేదు. ముఖ్యంగా ఆమె మామ.. ఓరోజు కోడలు ఒంటరిగా నిద్రిస్తుండగా వెళ్లి ఆమెపై అత్యాచారం చేశాడు. విషయం ఎవరికీ చెప్పొద్దని.. తనతో పడక సుఖం పంచుకోవడం వల్ల పిల్లలు పుడతారని నచ్చజెప్పే ప్రయత్నం చేశాడు. దీంతో జరిగిన ఘోరాన్ని భర్తకు చెప్పిన ఆమె భోరుమంది.

కానీ భర్త కూడా తండ్రినే సమర్థించాడు. ఎవరికైనా విషయం చెబితే.. నీ నగ్న ఫొటోలు సోషల్ మీడియాలో పెడతానంటూ బెదిరించాడు. దీంతో ఆమె నోరు మెదపకపోవడంతో చాలా నెలల పాటు సొంత మామ.. ఆమెపై అత్యాచారం చేశాడు. అయినా సరే ఆమె గర్భం దాల్చకపోవడంతో.. ఆమె ఆడపడుచు భర్తను రంగంలోకి దింపారు. వరుసకి అన్నయ్య అయ్యే అతడు కూడా ఏమాత్రం కనికరం లేకుండా వివాహితపై దారుణానికి ఒడిగట్టాడు. అతడు చాలా రోజుల పాటు ఆమెపై అత్యాచారం చేశాడు. ఫలితంగా జూన్ నెలలో ఆమె గర్భం దాల్చింది. అయితే ఆ తర్వాతి నెలలోనే గర్భస్రావం జరిగింది.

సంతానం కోసం మళ్లీ ఈ దారుణాలను, అత్యాచారాలను ఎదుర్కోవాల్సి వస్తుందని భయపడిన ఆ వివాహిత.. తన అత్తింటి వారు చేస్తున్న అరాచకాలపై పోలీసులకు ఫిర్యాదు చేసింది. కేసు నమోదు చేసుకున్న పోలీసులు దర్యాప్తు చేస్తున్నారు. త్వరలోనే వారిని అరెస్ట్ చేసి విచారణ జరిపి.. నిందితులపై కఠిన చర్యలు తీసుకుంటామన్నారు. గుజరాత్‌లోని వడోదరలో వెలుగు చూసిన ఈ ఘటన స్థానికంగా సంచలనమైంది. పిల్లల కోసం మరీ ఇంతకు తెగిస్తారా? అని జనం ప్రశ్నిస్తున్నారు. కన్నతండ్రిలా చూసుకోవాల్సిన మామ, సోదరుడిలా అండగా ఉండాల్సిన ఆడపడుచు భర్త ఆమెపై రోజుల తరబడి అత్యాచార పర్వం కొనసాగించడం.. భర్త కూడా వారికి మద్దతు పలకడం నిజంగా సిగ్గుచేటు.