ఏపీలో ఉచిత బస్సు పథకం ప్రారంభం.. మహిళలూ ఈ విషయాలను గుర్తుపెట్టుకోకుంటే ఇబ్బందే!

ఏపీలోని టీడీపీ కూటమి ప్రభుత్వం మరో హామీ నెరవేర్చింది. మహిళలకు ఉచిత బస్సు ప్రయాణం కల్పిస్తామని హామీ ఇచ్చిన టీడీపీ కూటమి.. ఆగస్ట్ 15 నుంచి ఏపీలో ఉచిత బస్సు పథకం అమలు ప్రారంభించింది. స్త్రీ శక్తి పేరుతో మహిళలకు ఉచిత బస్సు ప్రయాణ సౌకర్యం కల్పిస్తున్నారు. ఈ మేరకు విజయవాడలో సీఎం నారా చంద్రబాబు నాయుడు, డిప్యూటీ సీఎం పవన్ కళ్యాణ్ చేతుల మీదుగా స్త్రీ శక్తి పథకం ప్రారంభమైంది. అంతకుమందు చంద్రబాబు, పవన్‌ కల్యాణ్‌, నారా లోకేష్, మాధవ్ ఆర్టీసీ బస్సులో మహిళలతో కలిసి ప్రయాణించారు. ఉండవల్లి గుహల వద్ద నుంచి తాడేపల్లి, కనకదుర్గ వంతెన మీదుగా విజయవాడ సిటీ టెర్మినల్‌ వరకు ఆర్టీసీ బస్సులో ప్రయాణించారు. ఈ సందర్భంగా మహిళా ప్రయాణికుల నుంచిప్రయాణ అవసరాలు, వారి కుటుంబ జీవనోపాధికి సంబధించిన అంశాలు తెలుసుకున్నారు. వారి కష్ట సుఖాలు అడిగి తెలుసుకున్నారు.

మరోవైపు స్త్రీ శక్తి పథకంలో భాగంగా మహిళలకు ఉచిత బస్సు సదుపాయం కల్పిస్తున్నారు. మహిళలతో పాటుగా, బాలికలు, ట్రాన్స్‌జెండర్లకు ఈ అవకాశం కల్పిస్తున్నారు. పల్లెవెలుగు, అల్ట్రా పల్లెవెలుగు, సిటీ ఆర్డినరీ, మెట్రో ఎక్స్‌ప్రెస్, ఎక్స్‌ప్రెస్ బస్సులలో ఈ సదుపాయం ఉంది. ఈ బస్సులలో కేంద్ర, రాష్ట్ర ప్రభుత్వాలు జారీ చేసిన ఆధార్ కార్డు, ఓటర్ కార్డు, రేషన్ కార్డు వంటి గుర్తింపు పత్రాలను చూపించి ఉచితంగా ప్రయాణించవచ్చు. అయితే లగ్జరీ సర్వీసులైన అల్ట్రా డీలక్స్, సూపర్ డీలక్స్, స్టార్ లైనర్ ఏసీ బస్సులలో ఉచిత బస్సు ప్రయాణానికి అనుమతి లేదు. అలాగే తిరుపతి నుంచి తిరుమలకు రాకపోకలు సాగించే సప్తగిరి బస్సులలోనూ ఉచిత బస్సు పథకం వర్తించదు. అలాగే నాన్ స్టాప్ బస్సులు, ఇతర రాష్ట్రాలకు వెళ్లే బస్సులకు కూడా వర్తించదని ప్రభుత్వం మార్గదర్శకాల్లో పేర్కొంది.

 అలాగే ప్రయాణికుల భద్రత కోసం ఆర్టీసీ బస్సులలో సీసీ కెమెరాలు ఏర్పాటు చేయనున్నారు.అలాగే మహిళా కండక్టర్లకు బాడీ ఓర్న్ కెమెరాలు అందించనున్నారు. ఇక ఉచిత బస్సు ప్రయాణం నేపథ్యంలో బస్సులు, బస్టాండ్లలో రద్దీ పెరగనుంది. ఆ విషయాన్ని దృష్టిలో పెట్టుకుని బస్టాపుల వద్ద మౌలిక వసతులు మెరుగు పరచాలని సీఎం చంద్రబాబు ఇప్పటికే అధికారులకు స్పష్టం చేశారు.

మొత్తంగా ఎప్పుడెప్పుడా అని ఎదురు చూస్తున్న ఏపీ మహిళలకు ఉచిత బస్సు ప్రయాణం పథకం నేటి నుంచి అమల్లోకి వచ్చేసింది. అయితే ఏయే బస్సులకు అనుమతి ఉంది.. ఏయే గుర్తింపు కార్డులు ఉండాలనే రెండు విషయాలను గుర్తు పెట్టుకుంటే ఎలాంటి ఇబ్బంది లేకుండా ఉచితంగా ప్రయాణించవచ్చు.