ఏపీలో మహిళలకు అలర్ట్.. ఉచిత బస్సుకు ఆ కార్డు చెల్లదు

ఆంధ్రప్రదేశ్ వ్యాప్తంగా స్త్రీ శక్తి పథకం విజయవంతంగా అమలవుతోంది. స్త్రీ శక్తి పథకంలో భాగంగా మహిళలు రాష్ట్రవ్యాప్తంగా ఉచిత ప్రయాణ సదుపాయాన్ని పొందుతున్నారు. పల్లెవెలుగు, అల్ట్రా పల్లెవెలుగు, సిటీ ఆర్డినరీ, మెట్రో ఎక్స్‌ప్రెస్, ఎక్స్‌ప్రెస్ బస్సులలో ఉచితంగా ప్రయాణిస్తున్నారు. ఇక ఘాట్ రోడ్లలో ఉచిత బస్సు ప్రయాణ సౌకర్యం వద్దని తొలుత నిర్ణయించిన ప్రభుత్వం.. ఆ తర్వాత ఆ నిర్ణయంలో కొంతమేరకు మార్పులు చేసింది. సింహాచలం అప్పన్న ఆలయానికి వచ్చే మహిళా భక్తులకు కూడా ఉచిత బస్సు పథకం అమలు చేయాలని నిర్ణయించింది. ఈ మేరకు సీఎం నారా చంద్రబాబు నాయుడు అధికారులను ఆదేశించారు. దీంతో సింహాచలం కొండపైకి వెళ్లే ఆర్టీసీ బస్సులలో మహిళలకు ఉచితంగా ప్రయాణించే సౌలభ్యం చిక్కింది.

మరోవైపు కేంద్ర, రాష్ట్ర ప్రభుత్వాలు జారీ చేసిన గుర్తింపు కార్డులను చూపించి ఆంధ్రప్రదేశ్ మహిళలు స్త్రీ శక్తి పథకం ద్వారా బస్సులలో ఉచితంగా ప్రయాణిస్తున్నారు. ఆధార్ కార్డు, రేషన్ కార్డు, ఓటర్ కార్డు, డ్రైవింగ్ లైసెన్స్ వంటి ఒరిజినల్ పత్రాలను చూపించి ఉచిత బస్సు పథకం లబ్ధి పొందుతున్నారు. ఈ క్రమంలోనే ఆర్టీసీ అధికారులు మహిళలకు కీలక విజ్ఞప్తి చేశారు. స్త్రీ శక్తి ఉచిత బస్సు పథకానికి పాన్ కార్డు పనికిరాదని ఆర్టీసీ అధికారులు చెప్తున్నారు. ఆధార్ కార్డు చూపించి పాన్ కార్డు పొందే వీలుంది.

అయితే పాన్ కార్డు మీద అడ్రస్ ఉండదు. ఈ నేపథ్యంలో పాన్ కార్డు ద్వారా ఆర్టీసీ బస్సులలో మహిళలు ఉచితంగా ప్రయాణించేందుకు వీలుకాదని ఆర్టీసీ అధికారులు చెప్తున్నారు. స్త్రీ శక్తి పథకాన్ని కేవలం రాష్ట్రంలోని మహిళలకు మాత్రమే అమలు చేస్తున్న నేపథ్యంలో.. పాన్ కార్డు ఉపయోగపడదని చెప్తున్నారు. మహిళలు ఆధార్, రేషన్ కార్డు, ఓటర్ గుర్తింపు కార్డు వంటి కేంద్ర, రాష్ట్ర ప్రభుత్వాలు జారీ చేసిన అడ్రస్ కలిగిన గుర్తింపు కార్డుల సాయంతో బస్సులలోఉచితంగా ప్రయాణించవచ్చని సూచిస్తున్నారు. విభిన్న ప్రతిభావంతులు, సీనియర్‌ సిటిజన్‌ కార్పొరేషన్‌ జారీ చేసిన పత్రాలకు కూడా అనుమతి ఉందంటున్నారు ఆర్టీసీ అధికారులు.

మరోవైపు స్త్రీ శక్తి ఉచిత బస్సు పథకం అమలుపై హర్షాతిరేకాలు వ్యక్తమవుతున్నాయి. ముఖ్యంగా నెలవారీ బస్ పాసులు తీసుకుంటూ కాలేజీలు, స్కూళ్లకు వెళ్లే విద్యార్థినులు, ఆఫీసులకు వెళ్లే ఉద్యోగినులు, వ్యాపారాల నిమిత్తం రోజువారీ ప్రయాణాలు సాగించే మహిళలకు ఉచిత బస్సు పథకం ద్వారా ఆ మేరకు డబ్బులు ఆదా కానున్నాయి. దీంతో ఆయావర్గాల నుంచి ప్రభుత్వ నిర్ణయం పట్ల హర్షం వ్యక్తమవుతోంది.