జమ్మూ కాశ్మీర్‌లో మళ్లీ క్లౌడ్ బరెస్ట్.. ఆకస్మిక వరదలతో నలుగురు మృతి

జమ్మూ కాశ్మీర్‌లో భారీ వర్షాలు కురుస్తున్నాయి. నాలుగు రోజుల క్రితమే కిష్త్వార్ జిల్లాలో క్లౌడ్ బరస్ట్ చోటు చేసుకుంది. దాదాపు 60 మంది వరకూ ప్రాణాలు కోల్పోయారు. వందల మంది తీవ్రంగా గాయపడ్డారు. ఈ విషాధం నుంచి తేలుకోకముందే తాజాగా మరో క్లౌడ్ బరస్ట్ చోటు చేసుకుంది. ఈ ఘటనలో నలుగురు వ్యక్తులు మరణించినట్లు అధికారులు ధృవీకరించారు. మరికొందరు గాయపడినట్లు వెల్లడించారు. ఈ అనూహ్య ఘటన రాత్రిపూట సంభవించడంతో ప్రజలు భయాందోళనలకు గురయ్యారు. రక్షణ చర్యలు చేపట్టడం కూడా క్లిష్టంగా మారింది.

నలుగురు మృతి.. అనేక మంది గాయాలపాలు!

ఈ మేఘవిస్ఫోటనం కథువాలోని జంగ్లోట్ గ్రామంలో శనివారం అర్ధరాత్రి దాటిన తర్వాత సంభవించింది. కేవలం కొన్ని గంటల వ్యవధిలో కురిసిన భారీ వర్షం కారణంగా వరదలు పోటెత్తాయి. ఈ ఆకస్మిక వరదలు గ్రామంలోని పలు ఇళ్లను ముంచెత్తాయి. ఫలితంగా రోడ్లు, ఇతర మౌలిక వసతులకు తీవ్ర నష్టం కలిగింది. అయితే దురదృష్టవశాత్తు వరద ప్రవాహంలో చిక్కుకుని నలుగురు వ్యక్తులు ప్రాణాలు కోల్పోయారు. ఈ ఘటనపై సమాచారం అందిన వెంటనే.. అధికారులు సహాయక చర్యలను వేగవంతం చేశారు. పోలీసులు, రాష్ట్ర విపత్తు నిర్వహణ బృందాలు, జాతీయ విపత్తు నిర్వహణ దళం బృందాలు సంయుక్తంగా సహాయక చర్యలు చేపట్టాయి.

 మేఘవిస్ఫోటనం వల్ల వరద నీరు సమీపంలోని రైల్వే ట్రాక్, జాతీయ రహదారిపైకి చేరడంతో రాకపోకలకు తీవ్ర అంతరాయం ఏర్పడింది. రహదారిపై భారీగా నీరు చేరడంతో వాహనాలు నిలిచిపోయాయి. అధికారులు యుద్ధ ప్రాతిపదికన వరద నీటిని తొలగించే ప్రయత్నాలు చేస్తున్నారు. ప్రభావిత ప్రాంతాల ప్రజలను సురక్షిత ప్రాంతాలకు తరలించారు. ఈ సందర్భంగా అధికారులు ప్రజలకు పలు సూచనలు జారీ చేశారు. ముఖ్యంగా భారీ వర్షాల నేపథ్యంలో వరద నీటి ప్రవాహానికి దగ్గరగా ఉండవద్దని, సురక్షిత ప్రాంతాలకు వెళ్లాలని హెచ్చరించారు.

కేంద్ర మంత్రి జితేంద్ర సింగ్, జమ్మూ కశ్మీర్ మాజీ ముఖ్యమంత్రి ఒమర్ అబ్దుల్లా ఈ ఘటనపై తీవ్ర విచారం వ్యక్తం చేశారు. మృతుల కుటుంబాలకు తమ ప్రగాఢ సానుభూతిని తెలియజేస్తూ.. గాయపడిన వారికి మెరుగైన వైద్యం అందేలా చూస్తామని హామీ ఇచ్చారు. మరోవైపు సహాయక చర్యలు ముమ్మరంగా కొనసాగుతున్నాయి. అయితే మృతుల సంఖ్య మరింతగా పెరిగే అవకాశం ఉందని అధికారులు చెబుతున్నారు. గాయపడినవారు ఉండే అవకాశం కూడా ఎక్కువగా ఉన్నందున గాలింపు చర్యలు కొనసాగుతున్నాయి.